Followim Example blo Olketa Faithful Angel

1-2. (a) Hao nao olketa angel difren from iumi? (b) Wat nao iumi semsem lo hem witim olketa angel?

TAEM Jehovah leadim iu for kam lo truth, iu kamap part lo big famili blo hem wea showimaot love and worshipim hem, and diswan includim tu staka million faithful angel. (Dan. 7:​9, 10) Olketa angel, olketa barava difren from iumi. For example, olketa angel laef for long taem winim iumi man. (Job 38:​4, 7) Olketa garem bigfala paoa winim iumi. And olketa angel holy and raeteous winim iumi olketa man wea no perfect.—Luke 9:26.

² Bat, nomata iumi difren from olketa angel, lo samfala samting iumi semsem. For example, olsem olketa angel, iumi tu savve showimaot olketa nambawan quality blo Jehovah. Olketa angel garem freedom for chus and iumi tu garem datfala freedom. Olketa angel garem nem and each wan garem olketa difren wei, and olketa garem olketa difren responsibility, olsem iumi tu. And olsem olketa angel, iumi evriwan garem sem need wea hem nao for worshipim Creator blo iumi.—1 Pet. 1:12.

3. Wat nao iumi savve lanem from olketa faithful angel?

³ From iumi and olketa angel semsem lo staka samting, gud example blo olketa savve encouragem and teachim iumi. Iumi savve lanem staka naes leson from olketa. Lo disfala article, bae iumi storyim hao iumi savve followim example blo olketa faithful angel for hambol, lovem pipol, no givap, and for keepim kongregeson klin.

OLKETA ANGEL HAMBOL

4. (a) Hao nao olketa angel showim dat olketa hambol? (b) Why nao olketa angel hambol? (Psalm 89:7)

⁴ Olketa faithful angel olketa hambol. Nomata olketa garem big savve, paoaful, and wise, olketa obeyim instruction blo Jehovah. (Ps. 103:20) Taem olketa duim assignment blo olketa, olketa no tok praod abaotem wat olketa duim or eni kaen witim spesol paoa blo olketa. Olketa hapi for duim will blo God nomata no eniwan savve lo nem blo olketa.a (Gen. 32:​24, 29; 2 Ki. 19:35) Olketa no laek for acceptim eni glory wea hem blo Jehovah. Why nao olketa angel hambol tumas? Bikos olketa lovem Jehovah and barava respectim hem.—Readim Psalm 89:7.

5. Hao nao wanfala angel showimaot hem hambol taem hem stretem aposol John? (Lukim tu piksa.)

⁵ Tingim wanfala story lo Bible wea showim hao olketa angel hambol. Lo samting olsem 96 C.E., wanfala angel wea Bible no talem nem blo hem, showim wanfala spesol vision lo aposol John. (Rev. 1:1) Wat nao John duim taem hem lukim datfala vision? John laek for worshipim datfala angel. Bat kwiktaem nomoa loyal angel hia stopem hem and sei: “[Careful!] No duim olsem! Mi wanfala wakaman nomoa olsem iu and olsem olketa brata bilong iu . . . Iu mas worshipim God nomoa.” (Rev. 19:10) Wat datfala angel duim showim hem hambol! Angel hia no laek for kasem glory or for pipol mekhae lo hem. Hem kwiktaem stretem tingting blo John for givim glory go lo Jehovah God. And lo semtaem, datfala angel no ting daonem John. Nomata datfala angel servem Jehovah for long taem winim John and hem moa paoaful, hem hambol for sei hem and aposol John, tufala evriwan wakaman blo God. Nomata angel hia mas stretem John, hem no raf or tok kros lo datfala olo aposol. Instead, hem tok kaen lo hem. Luk olsem, angel hia luksavve John duim datwan bikos hem barava tinghae lo wat hem lukim insaed lo vision.

6. Hao nao iumi savve followim example blo olketa angel for hambol?

⁶ Hao nao iumi savve followim example blo olketa angel for hambol? Olsem olketa angel, taem iumi duim olketa assignment blo iumi, iumi no laek tok praod abaotem wat iumi duim or laekem pipol for tinghae lo datwan. (1 Cor. 4:7) And tu, if iumi servem Jehovah longtaem winim olketa narawan or garem samfala privilege, iumi shud no tingse iumi gud winim olketa. Actually, taem iumi garem moa responsibility hem nao taem iumi shud no ting lo iumiseleva olsem iumi important. (Luke 9:48) Olsem olketa angel, iumi laek duim samting for helpem olketa narawan. Iumi no laek for self-promote.

7. Hao nao iumi savve hambol taem iumi stretem or givim kaonsel lo samwan?

⁷ Taem iumi need for stretem or kaonselem wanfala brata or sista, or pikinini blo iumi, iumi tu savve showimaot iumi hambol. Samfala taem, iumi need for tok stret taem iumi givim kaonsel. Bat olsem datfala angel wea givim kaonsel lo John lo kaenfala wei, iumi tu savve tok stret bat no lo wei wea mekem narawan feel nogud. If iumi no ting lo iumiseleva olsem iumi gud winim olketa narawan, bae iumi savve givim kaonsel from Bible lo wei wea showimaot respect and kaen.—Col. 4:6.

OLKETA ANGEL LOVEM PIPOL

8. (a) Olsem Luke 15:10 storyim, wat nao olketa angel duim wea showimaot olketa lovem pipol? (b) Hao nao olketa angel involve insaed lo preaching waka? (Lukim tu piksa.)

⁸ Olketa angel interest lo pipol. Olketa lovem pipol. Olketa hapi taem wanfala sinner hem repent, and taem wanfala sheepsheep wea lus hem kam bak lo Jehovah, or taem samwan changem wei blo hem and kam insaed lo truth. (Readim Luke 15:10.) Olketa angel active tu for join insaed waka for preach abaotem Kingdom. (Rev. 14:6) Nomata olketa no preach direct lo pipol, olketa savve leadim wanfala pablisa lo samwan wea laek for lane abaotem Jehovah. Hem tru, hard for iumi savve which specific situation nao olketa angel involve insaed, bikos Jehovah savve iusim staka nara samting tu for helpem or gaedem pipol blo hem, olsem holy spirit blo hem. (Acts 16:​6, 7) Bat staka taem, Jehovah iusim olketa angel blo hem for helpem iumi. So taem iumi preachim gud nius, iumi savve sure dat olketa angel stap for sapotim iumi.—Lukim box “Olketa Kasem Ansa for Prea blo Olketa.”b

9. Hao nao iumi savve followim example blo olketa angel for lovem pipol?

⁹ Hao nao iumi savve followim example blo olketa angel for lovem pipol? Taem iumi herem announcement dat samwan hem reinstate, iumi tu savve hapi olsem olketa angel. Iumi laek for welkamim datfala brata or sista and showimaot iumi lovem hem. (Luke 15:​4-7; 2 Cor. 2:​6-8) Iumi savve followim example blo olketa angel tu taem iumi duim best blo iumi lo preaching waka. (Eccl. 11:6) And olsem olketa angel wea sapotim iumi taem iumi preachim gud nius, iumi tu savve luk for olketa difren wei for sapotim olketa brata and sista lo ministry. For example, iumi savve mekem plan for waka witim wanfala niu pablisa. Or iumi savve sapotim olketa brata and sista wea olo or sik, mekem olketa savve share lo ministry.

10. Wat nao iumi savve lanem from experience blo Sara?

¹⁰ Hao if situation blo iumi no letem iumi for duim staka samting lo ministry? Iumi still savve duim samting for faendem wei for waka witim olketa angel lo preaching waka. Tingim experience blo Sista Sara,c lo India. Sara bin pioneer for samting olsem 20 years, gogo hem sik and hard for getap from bed. Hem barava feel depress. Bat witim loving sapot blo olketa brata and sista, witim wei for duim Bible reading evritaem, Sara isisi kasem bak positive tingting. Sara changem hao hem duim ministry blo hem for fitim niu situation blo hem. Bikos hem hard for sidaon for raet leta, hem only fit for duim telephone witnessing. Hem ringim olketa return visit blo hem, and then olketa savve talem hem samfala narawan wea maet interest. Wat nao result? Insaed tu-thri month nomoa, Sara garem 70 Bible study. Datwan winim wat hem fit for lukaftarem! So hem givim samfala lo olketa Bible study hia, lo olketa narawan lo kongregeson. Staka lo olketa student hia attendim olketa meeting distaem. Olketa angel mas barava hapi for waka witim olketa brata and sista, olsem Sara, wea duim best blo olketa lo preaching waka!

OLKETA ANGEL NO GIVAP

11. Hao nao olketa faithful angel showim nambawan example lo wei for no givap?

¹¹ Olketa faithful angel showim nambawan example for no givap. For staka thousand years, olketa mas deal witim injustice and wicked fasin. Olketa lukim Satan and olketa nara angel wea olketa bin waka tugeta, olketa againstim Jehovah. (Gen. 3:1; 6:​1, 2; Jude 6) Bible storyim wanfala faithful angel wea faet witim wanfala paoaful demon. (Dan. 10:13) And tu, start from bifor kam, olketa angel lukim hao samfala pipol nomoa chus for sapotim tru worship. Nomata olsem, olketa loyal angel hia gohed hapi and strong for servem Jehovah. Olketa savve dat lo raet taem, God bae finisim evri injustice.

12. Wat nao savve helpem iumi for no givap?

¹² Hao nao iumi savve followim example blo olketa angel for no givap? Olsem olketa angel, iumi tu lukim staka injustice or deal witim wei wea pipol againstim iumi. Bat iumi garem sem feeling olsem olketa angel bikos iumi sure dat lo raet taem, God bae finisim evriwan wea wicked. So, olsem olketa faithful angel “iumi mas gohed for duim gudfala samting.” (Gal. 6:9) And God promis for helpem iumi for no givap. (1 Cor. 10:13) Iumi savve prea tu for Jehovah givim iumi holy spirit wea savve helpem iumi for patient and hapi. (Gal. 5:22; Col. 1:11) Bat hao if pipol againstim iumi? Barava trust lo Jehovah and no fraet. Jehovah bae evritaem sapotim and strongim iumi.—Heb. 13:6.

OLKETA ANGEL HELP FOR KEEPIM KONGREGESON KLIN

13. Wat nao spesol assignment wea olketa angel kasem lo olketa last day? (Matthew 13:​47-49)

¹³ Lo olketa last day, Jehovah givim wanfala spesol assignment lo olketa angel. (Readim Matthew 13:​47-49.) Bikos lo preaching waka staka million pipol interest lo gud nius. Samfala pipol disaed for kamap olketa tru Christian, and samfala nomoa. Assignment blo olketa angel hem for olketa “separatem nogud pipol from pipol wea raeteous.” Diswan minim olketa kasem assignment for help for protectim and keepim kongregeson klin. Bat hem no minim eniwan wea stop for associate witim iumi bae hard for kam bak lo Jehovah. And tu, hem no minim dat kongregeson bae no garem eni problem. Bat, iumi sure olketa angel waka hard for help for keepim kongregeson klin.

14-15. Hao nao iumi savve followim example blo olketa angel for keepim kongregeson klin? (Lukim tu piksa.)

¹⁴ Hao nao iumi savve followim example blo olketa angel for keepim kongregeson klin? Iumi mas duim part blo iumi for keepim kongregeson klin saed lo fasin and lo spiritual saed. For duim diswan, iumi mas waka hard for protectim heart blo iumi taem iumi chusim gud association and rejectim eni samting wea bae spoelem iumi. (Ps. 101:3) Iumi savve helpem tu olketa brata and sista blo iumi for gohed faithful lo Jehovah. For example, wat nao iumi bae duim if iumi savve wanfala brata or sista hem duim wanfala serious sin? From iumi lovem hem, iumi bae encouragem hem for story lo olketa elder. If hem no duim datwan, then iumiseleva nao need for go and storyim lo olketa elder. Iumi laekem olketa wea wik lo spiritual wei for kwiktaem kasem help!—Jas. 5:​14, 15.

¹⁵ Sorre samting nao, samfala wea duim serious sin olketa mas aotem from kongregeson. Taem olsem, iumi mas no associate witim olketa.d (1 Cor. 5:​9-13) Disfala arrangement help for keepim kongregeson klin. Taem iumi chus for no associate witim eniwan wea olketa aotem from kongregeson, datwan showim iumi kaen lo olketa. Wei wea iumi disaed strong for no associate witim olketa, savve helpem olketa for kam bak lo Jehovah. If olketa duim datwan, Jehovah and olketa angel bae hapi and iumi tu.—Luke 15:7.

16. Hao nao iu savve followim example blo olketa angel?

¹⁶ Hem nambawan privilege for iumi lukim olketa angel witim eye blo faith and for waka tugeta witim olketa! Iumi laek for followim nambawan example blo olketa for hambol, lovem pipol, no givap, and keepim kongregeson for klin saed lo fasin and lo spiritual saed. If iumi followim example blo olketa faithful angel, iumi tu savve part lo spiritual famili blo Jehovah for olowe.