Waswe, Iu Savve Finis?
Lo first century, taem olketa priest lo temple sakrifaesim olketa animal, wat nao olketa duim witim evri blood blo olketa animal hia?
EVRI year, olketa priest lo Israel bifor savve sakrifaesim staka thousand animal lo altar lo temple. Josephus, wanfala man lo Jew wea raetem history, storyim hao lo day blo Pasova, olketa savve sakrifaesim winim 250,000 sheepsheep. So masbi staka blood nao pour aot lo datfala day. (Lev. 1:10, 11; Num. 28:16, 19) Wat nao olketa duim witim evri blood hia?
Olketa archaeologist faendemaot dat temple wea Herod buildim wea distroe lo 70 C.E, hem garem wanfala big drainage system. Luk olsem, olketa drain hia nao olketa priest savve iusim for pourimaot evri blood blo olketa animal lo hem.
Bae iumi storyim tufala samting abaotem datfala drainage system:
Olketa hol stap lo botom blo datfala altar: Mishnah, wea hem wanfala old buk wea storyim olketa law and kastom blo olketa Jew lo early part lo mek-thri century C.E. hem tu storyim tu disfala drainage system. Hem sei: “Tufala hol stap lo south-western kona . . . so blood from olketa sakrifaes and wata wea olketa iusim for wasim, hem ran go daon lo western saed and southern saed and hem olowe go daon lo drain wea go kasem Kidron valley.”
Wat olketa archaeologist distaem faendemaot hem agree witim wat datfala buk hem talem abaotem “olketa hol” wea stap klosap lo datfala altar. The Cambridge History of Judaism hem confirmim dat olketa faendem “wanfala big drainage system” klosap lo datfala temple. Hem sei: “Luk olsem, diswan hem drain wea olketa savve iusim for wata and blood blo olketa sakrifaes wea kam from datfala Temple Maunt.”
Wanfala gud wata supply: For keepim klin botom blo altar and olketa drain, olketa priest needim staka wata. So for duim datfala important waka, olketa priest need for evritaem garem access lo gud wata supply wea kam from taon. Datfala wata from taon kamap followim olketa canal and olketa aqueduct, and thru lo olketa cistern and olketa pool. Datfala Archaeologist Joseph Patrich hem sei: “No eni nara temple lo datfala taem garem kaen wata system olsem, wea savve tekem kam klin wata and drainem aot dirty wata.”