Kwestin From Reader
Wat taem nao preaching waka wea iumi duim distaem bae finis?
Jesus sei: “Disfala gud nius abaotem Kingdom bae olketa talemaot lo evri ples lo earth for pipol lo evri kantri mas herem, and bihaen datwan nao, end bae kam.” (Matt. 24:14) Lo disfala verse and lo verse 6 and 13, Greek word wea olketa transleitim olsem “end,” hem nao teʹlos. Datfala word hem minim barava end, hem nao taem world blo Satan hem finis lo Armageddon. (Rev. 16:14, 16) So, iumi bae gohed for preachim gud nius go kasem barava end, diswan minim disfala waka bae stop just bifor Armageddon. Diswan hem niu understanding abaotem disfala point.
Lo bifor, iumi tingse waka for preachim gud nius bae stop taem bigfala trabol hem start, wea datwan bae happen taem Bigfala Babylon hem distroe. (Rev. 17:3, 5, 15, 16) Iumi sei tu dat bigfala trabol hem nao end blo datfala tokpiksa “year blo Jehovah for duim gud samting.” (Isa. 61:2) And tu, iumi tingse olketa wea bae sev, hem olketa wea pruvim finis dat olketa faithful lo Jehovah bifor bigfala trabol hem start. Iumi comparem olketa hia wea faithful, witim olketa Jew wea sev taem Jerusalem distroe lo 607 B.C.E. Olketa Jew hia worshipim Jehovah and heitim olketa nogud wei, so olketa kasem mark for showim olketa bae sev. (Ezek. 5:11; 9:4) Bat, hao iumi minim diswan bifor, hem no fitim toktok blo Jesus lo Matthew 24:14, wea storyim hao pipol bae garem chance for acceptim gud nius go kasem taem wea iumi stop for preach just bifor datfala barava end, wea hem nao lo Armageddon.
Disfala niu understanding abaotem Matthew 24:14 hem adjustim tu understanding blo iumi abaotem datfala message wea olsem hail ston wea Revelation 16:21 hem storyim. Taem iumi lukluk gud lo tufala scripture hia bae iumi lukim hao story blo tufala hem sapotim each other. Lo wanem wei? Samting wea helpem iumi for savve, hem hao Bible describem wei wea pipol respond lo Kingdom message. Aposol Paul sei for “olketa wea bae sev,” datfala message hem gud nius, hem smel naes lo olketa, “hem smel olsem laef.” Bat for olketa enemy blo God, datfala message hem bad nius, hem “smel olsem dae.” (2 Cor. 2:15, 16) Olketa enemy hia heitim Kingdom message bikos hem barava showimaot klia hao Satan nao rulim world blo olketa, and hao world hia hem wicked, and klosap for distroe.—John 7:7; 1 John 2:17; 5:19.
Tingim tu hao datfala tokpiksa hail storm bae “spoelem staka samting” winim enitaem bifor. Datwan maet minim during lo bigfala trabol, message wea iumi talemaot bae hem moa direct and bae hem kasem staka pipol winim enitaem bifor. From datwan, staka pipol moa bae savve lo nem blo Jehovah. (Ezek. 39:7) Lo datfala taem bihaen Bigfala Babylon hem distroe, hao, samfala pipol bae ting lo datfala message olsem samting wea smel naes and acceptim? Maet olsem. Maet olketa bae tingim bak dat for staka year finis Olketa Jehovah’s Witness bin talemaot dat false religion bae distroe or samfala maet just lane abaotem datwan.
Tingim samting wea happen afta Tenfala Trabol kasem olketa lo Egypt bifor. Bihaen Jehovah “judgem and panisim evri god blo Egypt,” “staka foreigner” nao joinim olketa Israelite. (Ex. 12:12, 37, 38) Maet staka foreigner hia chus for followim Jehovah taem olketa lukim hao evri warning wea Moses talem abaotem Tenfala Trabol hem kamap tru.
Eniwan wea chus for followim Jehovah bihaen Bigfala Babylon hem distroe, bae garem privilege for duim gud samting for olketa brata blo Christ wea stap yet lo earth. (Matt. 25:34-36, 40) Tru nao, chance for Jesus judgem samwan olsem sheepsheep bae hem end just bifor Armageddon taem olketa last anointed wan kasem reward blo olketa for go lo heven.
Disfala niu understanding hem barava pruvim bigfala love and mercy blo Jehovah. Tru nao, hem “no laekem eniwan for dae bat hem laekem evriwan for repent.”—2 Pet. 3:9.