Kwestin From Reader

Man wea raetem Proverbs 30:​18, 19 sei dat “wei blo man taem hem stap witim young gele” hem “winim savve blo mi.” Wat nao datfala raeta minim?

Staka pipol, includim samfala Bible scholar tu wonder wat nao really mining blo tufala toktok hia. Lo Niu World Transleison hem sei: “Thrifala samting stap wea winim savve blo mi, and fofala samting wea mi no savve minim: Hao eagle flae lo skae, hao snek krol antap lo ston, hao ship go lo open sea, and wei blo man taem hem stap witim young gele.”—Prov. 30:​18, 19.

Lo bifor iumi sei, disfala toktok “wei blo man taem hem stap witim young gele,” hem minim samting wea hem nogud. Why? Lo olketa nara verse lo disfala chapter hem storyim olketa samting wea hem nogud, wea no savve sei “inaf.” (Prov. 30:​15, 16) And verse 20 hem storyim “woman wea duim adultery” bat hem sei hem nating duim eni rong samting. From datwan, iumi ting dat disfala verse hem story abaotem olketa samting wea if olketa go pas finis, iumi no savve lukim moa eni mark wea showim dat olketa go pas, olsem wanfala eagle wea flae lo skae, snek krol antap lo ston, or ship lo open sea, and tu man wea duim samting and no eniwan savve abaotem datwan. From olketa reason hia nao, iumi sei disfala toktok “wei blo man taem hem stap witim young gele,” hem minim samting wea hem nogud, wea hem nao taem wanfala kleva young man trikim wanfala young gele for durong witim hem.

Bat, samfala reason stap wea showim dat luk olsem tufala verse hia storyim olketa samting wea hem gud. Really, disfala raeta hem describem nomoa olketa samting wea mekem hem for barava sapraes and olketa spesol lo hem.

Olketa Hebrew manuscript tu showim dat tufala verse hia storyim olketa samting wea hem gud. Olsem Theological Lexicon of the Old Testament talem, datfala Hebrew word wea olketa transleitim olsem “winim savve blo mi” lo Proverbs 30:18 hem “describem samting wea mekem samwan for sapraes, hard for understandim, and hem even barava beautiful.”

Professor Crawford H. Toy blo Harvard University lo United States tu sei dat tufala Bible verse hia no story abaotem olketa samting wea hem nogud. Hem sei: “Diswan hem describem hao olketa samting hia barava mekem hem sapraes and olketa beautiful.”

So hem stret for iumi sei dat olketa toktok wea stap lo Proverbs 30:​18, 19 hem describem olketa samting wea barava beautiful, wea even winim savve blo iumi. Olsem datfala Bible raeta, iumi tu sapraes lo hao wanfala eagle flae lo skae, hao wanfala snek wea no garem leg krol fast antap lo ston, hao wanfala big maeti ship savve go antap lo sea, and hao wanfala young man and wanfala young gele savve lovem each other and stap hapi tugeta.