Hao, Bible Savve Helpem Mi If Mi Depress?

Ansa from Bible

Yes, bikos best person for helpem iumi hem “God, Wea comfortim and encouragem and strongim and mekem olketa wea depress for hapi.”—2 Corinthians 7:6, The Amplified Bible.

Wat God givim for helpem samwan wea depress

Strong. God “strongim” and mekem iu hapi, no bikos hem finisim evri problem blo iu, bat from hem ansarem olketa prea blo iu taem iu prea lo hem for strongim iu deal witim datwan. (Philippians 4:13) Iu savve sure dat hem redi for lisin lo iu, bikos Bible sei: “Jehovah stap klosap lo olketa wea heart blo olketa brek. Hem sevem olketa wea discourage.” (Psalm 34:18) God savve herem iu taem iu kol lo hem for help even if iu no savve hao for explainim hao iu feel.—Romans 8:26, 27.
Olketa gud example. Wanfala Bible raeta prea olsem lo God: “From olketa deep ples wea mi sorre mi kol go lo iu.” Disfala psalmist hem kasem comfort from depression blo hem taem hem tingim dat God laek for forgivim olketa sin blo man. Dastawe, hem sei lo God: “If iu keepim record blo olketa sin mifala duim, hu nao fit for ranawe from judgment blo iu? Bat iu forgivim mifala, mekem mifala savve standap and fraet lo iu.”—Psalm 130:1, 3, 4, Good News Translation.
Hope. God givim comfort for iumi distaem, bat no datwan nomoa hem promis tu for finisim evri problem wea kosim man for depress. Taem hem fulfillim datfala promis for, “olketa samting wea happen bifor [includim depression] bae no kamap moa lo mind blo pipol, and bae olketa no kamap tu lo heart.”—Isaiah 65:17.

Note: Olketa Jehovah’s Witness appreciatim help wea God provaedem, bat olketa lukaotem tu medical treatment for olketa kaen sik olsem clinical depression. (Mark 2:17) Nomata olsem, mifala no forcem eni specific medical treatment lo eniwan. Mifala luksavve each person nao shud mekem disison seleva lo kaen samting olsem.