Hao, Olketa Demon Real?

Ansa from Bible

Yes. Olketa demon hem ‘olketa angel wea sin,’ olketa spirit creature wea rebel againstim God. (2 Peter 2:4) First angel wea mekem hemseleva for kamap demon hem Satan datfala Devil, wea Bible kolem hem “boss blo olketa demon.”—Matthew 12:24, 26.

Rebellion lo taem blo Noah

Bible storyim dat bifor Flood lo taem blo Noah olketa angel rebel againstim God: “Olketa son blo datfala tru God lukim olketa gele blo olketa man hia barava naesbola. So olketa start for tekem eni gele wea olketa laekem for kamap waef blo olketa.” (Genesis 6:2) Olketa wicked angel hia “lusim ples wea olketa shud stap” lo heven and change for garem body olsem olketa man mekem olketa savve duim sex witim olketa woman.—Jude 6.

Lo taem blo Flood, olketa bighed angel hia change bak for garem spirit body and go bak lo heven. Bat, God aotem olketa from famili blo hem. Part lo panis blo olketa demon nao hem for no enitaem change moa for garem body olsem olketa man.—Ephesians 6:11, 12.