Wat Nao Happen Taem Iu Dae?

Ansa from Bible

Bible sei: “Olketa wea laef savve dat olketa bae dae, bat olketa wea dae no savve lo eni samting.” (Ecclesiastes 9:5; Psalm 146:4) So taem iumi dae, iumi no exist nao. Man wea dae no savve tingting, duim samting, or feelim eniting.

“Bae iu go bak moa lo dust”

Taem God story witim first man Adam, hem explainim wat hem happen taem man hem dae. From Adam disobey, God sei lo hem: “Iu dust nomoa and bae iu go bak moa lo dust.” (Genesis 3:19) Bifor God creatim Adam “from dust blo graon,” Adam hem no exist. (Genesis 2:7) Lo sem wei, taem Adam dae, hem go bak lo dust and hem no exist nao.

Sem samting happen tu lo pipol wea dae distaem. Bible sei olsem taem hem story abaotem olketa man and animal: “Evriwan kam from dust, and evriwan bae go bak lo dust.”​—Ecclesiastes 3:19, 20.

Dae hem no really end blo evri samting

Staka taem Bible comparem dae witim sleep. (Psalm 13:3; John 11:11-14; Acts 7:60) Man wea deepim sleep no savve wat nao happen raonem hem. Hem semsem tu, man wea dae no savve lo eni samting. Bible teachim dat God savve wekapem olketa wea dae olsem hem wekapem man from sleep and mekem olketa laef bak. (Job 14:13-15) For pipol wea God resurrectim, dae hem no end blo evri samting.