Hao, Iumi Shud Worshipim Olketa Image?

Ansa from Bible

Nomoa, iumi shud no duim datwan. Buk New Catholic Encyclopedia hem story olsem abaotem olketa law wea God givim for nation blo Israel. Hem sei: “Staka Biblical account pruvim dat pipol blo God no iusim olketa image lo worship blo olketa.” Lukim thrifala Bible verse hia:

• “Iufala mas no wakem eni idol or eni samting wea luk olsem eniting wea stap lo skae or lo earth or insaed lo wata. Iufala mas no baodaon or worshipim olketa bikos mi, Jehovah, God blo iufala, mi God wea laekem iufala for mas worshipim mi nomoa.” (Exodus 20:​4, 5) Since God laekem pipol ‘for mas worshipim hem nomoa,’ hem bae no hapi if iumi praisem or worshipim olketa image, piksa, idol, icon, statue, or olketa symbol.

• “Mi no givim glory blo mi lo olketa statue.” (Isaiah 42:8, Easy-to-Read Version) God rejectim worship wea pipol iusim olketa image for worshipim hem. Taem samfala Israelite trae for iusim statue blo young buluka for worshipim hem, God sei dat olketa commitim “wanfala bigfala sin.”​—Exodus 32:​7-9, Easy-to-Read Version.

• “Iumi shud no tingse God hem olsem gold, silver, or ston. Hem no olsem olketa samting wea man designim and wakem.” (Acts 17:29) Pagan worship, evritaem iusim olketa image blo “olketa samting wea man designim and wakem,” bat Bible hem sei olketa Christian shud ‘wakabaot followim faith and no followim samting wea olketa lukim.’​—2 Corinthians 5:7.

• “Iufala mas stap klia lo olketa idol.” (1 John 5:​21) Lo olketa komand wea God givim for nation blo Israel and lo olketa Christian, Bible evritaem talem dat God no hapi lo wei for iusim olketa image and icon lo worship.