پطرس دا دُوجا خط
1 مَیں شمعون پطرس، یسوع مسیح دا غلام تے رسول آں تے ایہہ خط اوہناں نُوں لکھ رہیا واں جنہاں نُوں ساڈے خدا تے ساڈے نجاتدہندہ یسوع مسیح دی نیکی دے ذریعے ساڈے ورگا قیمتی ایمان ملیا اے۔
2 میری دُعا اے کہ تُسی خدا تے ساڈے مالک یسوع بارے صحی علم حاصل کردے رہوو تاکہ توانوں ہور وی زیادہ عظیم رحمت تے سلامتی ملے 3 کیونکہ خدا دی طاقت نال سانوں اوہ ساریاں چیزاں ملیاں نیں جیہڑیاں زندگی گزارن تے خدا دی بندگی کرن لئی ضروری نیں۔ ایہہ چیزاں سانوں اوہدے بارے صحی علم دے ذریعے ملیاں نیں جنہے سانوں اپنی شان تے اچھائی دی وجہ توں بلایا سی۔ 4 ایس شان تے اچھائی دی وجہ توں ساڈے نال بوہت شاندار تے قیمتی وعدے کیتے گئے نیں تاکہ ایہناں دے ذریعے تُسی خدا ورگے بن جاؤ کیونکہ تُسی دُنیا دی اوس گندگی چوں نکل آئے او جیہڑی بھیڑیاں خواہشاں* دی وجہ توں پیدا ہوندی اے۔
5 ایس لئی پورے دل نال کوشش کرو کہ تواڈے چ ایمان دے نال نال اچھائی ہووے، اچھائی دے نال نال علم ہووے 6 علم دے نال نال اپنے آپ اُتے قابو ہووے، اپنے آپ اُتے قابو ہون دے نال نال صبر* ہووے، صبر دے نال نال خدا دی بندگی ہووے، 7 خدا دی بندگی دے نال نال بھین بھراواں لئی پیار ہووے، بھین بھراواں لئی پیار دے نال نال محبت ہووے 8 کیونکہ جے تواڈے چ ایہہ خوبیاں ہے نیں تے ہور ودھدیاں جا رہیاں نیں تے تُسی ساڈے مالک یسوع مسیح دے صحی علم مطابق چلن چ ڈِھلے نئیں پووو گے تے بےپھل نئیں ہووو گے۔
9 جیس بندے چ ایہہ خوبیاں نئیں نیں، اوہ اَنھا اے یعنی اوہنے اپنیاں اَکھاں بند کر لئیاں نیں* تاکہ روشنی نُوں نہ ویکھے۔ اوہ بُھل گیا اے کہ خدا نے اوہدے اوہ گُناہ دھو دِتے نیں جیہڑے اوہنے پہلاں کیتے سن۔ 10 ایس لئی بھراوو، خدا نے توانوں جیس کم لئی بلایا تے چُنیا اے، تُسی اوہدے قابل رہن دی ہور وی کوشش کرو کیونکہ جے تُسی ایہناں خوبیاں نُوں نکھاردے رہوو گے تے تُسی کدی ناکام نئیں ہووو گے۔ 11 ایس طرحاں توانوں ساڈے مالک تے نجاتدہندہ یسوع مسیح دی ابدی بادشاہی چ داخل ہون دا شاندار مان بخشیا جائے گا۔
12 ایس لئی مَیں توانوں ایہہ ساریاں گلاں یاد کراندا رہواں گا بھانویں کہ تُسی ایہناں نُوں جان دے او تے اوس سچائی تے مضبوطی نال قائم او جیہڑی تُسی سکھی اے۔ 13 جِنّاں چِر مَیں زندہ* واں، مَیں توانوں ایہہ گلاں یاد کرا کے تواڈا حوصلہ ودھاندا رہواں گا۔ 14 مینوں پتہ اے کہ میری زندگی* چھیتی ختم ہون والی اے جیویں کہ ساڈے مالک یسوع مسیح نے دَسیا سی۔ 15 ایس لئی مَیں ہمیشاں اپنی پوری وا لا کے توانوں ایہہ گلاں یاد کراندا رہواں گا تاکہ میرے جان دے بعد تُسی آپ ایہہ گلاں یاد کر سکو۔
16 جدوں اَسی توانوں اپنے مالک یسوع مسیح دی طاقت تے موجودگی بارے سکھایا سی تے اَسی انساناں دِیاں گھڑیاں ہوئیاں کہانیاں دا سہارا نئیں لیا سی سگوں اَسی توانوں اوہدی اوس شان بارے دَسیا سی جیہڑی اَسی اپنی اَکھیں ویکھی سی 17 کیونکہ خدا یعنی باپ جیہڑا عظیم شان دا مالک اے، اوہنے یسوع نُوں اوہدوں عزت تے شان بخشی جدوں اوہنے کہیا: ”ایہہ میرا پیارا پُتر اے جدے توں مَیں خوش آں۔“ 18 ہاں، اَسی ایہہ گل اسمانوں سُنی سی جدوں اَسی اوہدے نال مُقدس پہاڑ تے ساں۔
19 ایس لئی خدا دِیاں پیشینگوئیاں تے ساڈا ایمان ہور پکا ہویا اے۔ تُسی ایہناں تے دھیان دے کے بوہت چنگا کر رہے او کیونکہ ایہہ پیشینگوئیاں اوس دِیوے وانگوں نیں جیہڑا نھیرے چ یعنی تواڈے دِلاں چ چمک رہیا اے۔ ایس لئی جدوں تک دن نہ چڑھے تے دن دا تارا نہ نکلے، اِنج کردے رہوو۔ 20 توانوں پتہ اے کہ پاک کلام چ لکھی کسے وی پیشینگوئی چ انسانی سوچ شامل نئیں ہوندی 21 کیونکہ کوئی وی پیشینگوئی انساناں دی مرضی نال نئیں کیتی گئی سگوں انسان پاک روح دی رہنمائی چ خدا وَلّوں بولدے سن۔