متی دی اِنجیل

9 ایس لئی اوہ کشتی وچ بہہ کے جھیل دے دُوجے پاسے اپنے شہر* چلا گیا۔ 2 تے ویکھو!‏ کجھ لوک فالج دے مارے اِک بندے نُوں منجی تے پا کے یسوع کول لیائے۔ اوہناں دے ایمان نُوں ویکھ کے یسوع نے اوس بندے نُوں کہیا:‏ ”‏حوصلہ رکھ میرے پُتر، تیرے گُناہ معاف ہو گئے نیں۔“‏ 3 ایہہ سُن کے شریعت دے کجھ عالم آپس چ کہن لگ پئے:‏ ”‏ایہہ بندہ تے کفر بک رہیا اے!‏“‏ 4 یسوع نُوں پتہ سی کہ اوہ کیہہ سوچ رہے نیں۔ ایس لئی اوہنے کہیا:‏ ”‏تُسی اپنے دل چ بھیڑیاں گلاں کیوں سوچ رہے او؟ 5 تواڈے خیال چ کیہہ کہنا سوکھا اے، ایہہ کہ ”‏تیرے گُناہ معاف ہو گئے نیں“‏ یاں ایہہ کہ ”‏اُٹھ تے ٹُر پھر“‏؟ 6 پر مَیں توانوں وکھانا چاہنا واں کہ انسان دے بیٹے نُوں زمین تے گُناہ معاف کرن دا اِختیار دِتا گیا اے۔“‏ فیر اوہنے فالج دے مارے بندے نُوں کہیا:‏ ”‏اُٹھ، اپنی منجی چُک تے اپنے گھر چلا جا۔“‏ 7 اوہ بندہ اُٹھ پیا تے اپنے گھر چلا گیا۔ 8 ایہہ ویکھ کے لوک ڈر گئے تے خدا دی وڈیائی کرن لگ پئے جنہے انسان نُوں ایناں اِختیار دِتا۔‏

9 فیر جدوں یسوع اوتھوں جا رہیا سی تے اوہنے ٹیکس دی چونکی تے بیٹھے اِک بندے نُوں ویکھیا جدا ناں متی سی۔ یسوع نے اوہنوں کہیا:‏ ”‏میرا شاگرد بن جا۔“‏ ایہہ سُن کے متی اُٹھیا تے اوہدے پچھے ٹُر پیا۔ 10 بعد چ جدوں اوہ اِک گھر* چ بہہ کے کھانا کھا رہیا سی تے بوہت سارے ٹیکس لین والے تے گُناہ‌گار لوک وی آ کے یسوع تے اوہدے شاگرداں نال کھانا کھان لگ پئے۔ 11 ایہہ ویکھ کے فریسیاں نے یسوع دے شاگرداں نُوں کہیا:‏ ”‏تواڈا اُستاد ٹیکس لین والیاں تے گُناہ‌گاراں نال کیوں کھاندا پیندا اے؟“‏ 12 اوہناں دی گل سُن کے یسوع نے کہیا:‏ ”‏ تندرست لوکاں نُوں حکیم دی ضرورت نئیں ہوندی سگوں بیماراں نُوں ہوندی اے۔ 13 جاؤ تے پہلاں ایس گل دا مطلب سمجھو کہ ”‏مینوں قربانی دی بجائے رحم پسند اے۔“‏ مَیں نیک لوکاں نُوں نئیں سگوں گُناہ‌گاراں نُوں بلا‌ن آیا واں۔“‏*

14 فیر یوحنا دے شاگرداں نے آ کے اوہنوں پچھیا:‏ ”‏اَسی تے فریسی روزہ رکھنے آں پر تیرے شاگرد روزہ کیوں نئیں رکھدے؟“‏ 15 یسوع نے اوہناں نُوں کہیا:‏ ”‏جدوں تک لاڑا اپنے دوستاں نال ہوندا اے، اوہناں نُوں سوگ منان دی کوئی لوڑ نئیں ہوندی۔ پر اوہ دن وی آن گے جدوں لاڑے نُوں اوہناں توں جدا کر دِتا جائے گا، فیر اوہ روزہ رکھن گے۔ 16 کوئی وی پرانے کپڑے تے نویں کپڑے* دی ٹاکی نئیں لاندا کیونکہ نویں کپڑے دے زور نال پرانا کپڑا ہور وی پاٹ جاندا اے۔ 17 نہ ای لوک نوِیں مے نُوں پرانیاں مشکا‌ں چ رکھدے نیں۔ جے اوہ رکھدے نیں تے مشکا‌ں پاٹ جاندیاں نیں تے مے ڈُلھ جاندی اے تے مشکا‌ں وی خراب ہو جاندیاں نیں۔ ایس لئی لوک نوِیں مے نُوں نوِیاں مشکا‌ں چ رکھدے نیں تے اِنج دونویں چیزاں صحی رہندیاں نیں۔“‏

18 جدوں یسوع اوہناں نال ایہہ گلاں کر ای رہیا سی تے عبادت‌گاہ دا اِک نگران* اوہدے کول آیا تے گوڈے ٹیک کے اوہنوں کہیا:‏ ”‏میری دھی بڑی بیمار اے۔ ہُن تک تے اوہ مر وی گئی ہونی اے۔ پر جے تُوں آ کے اوہدے تے اپنا ہتھ رکھیں تے اوہ زندہ ہو جائے گی۔“‏

19 فیر یسوع اُٹھیا تے اپنے شاگرداں نُوں لے کے اوس نگران دے نال ٹُر پیا۔ 20 تے ویکھو!‏ بِھیڑ وچ اِک عورت سی جنہوں 12 سالاں توں خون آ رہیا سی۔ اوہنے پچھوں دی آ کے یسوع دے کپڑیاں دی جھالر نُوں چُھویا 21 کیونکہ اوہ اپنے دل چ سوچ رہی سی:‏ ”‏جے مَیں اوہدے کپڑیاں نُوں ای چُھو لواں گی تے مَیں ٹھیک ہو جاواں گی۔“‏ 22 یسوع نے پچھے مُڑ کے اوہنوں ویکھیا تے کہیا:‏ ”‏حوصلہ رکھ دِھیئے، تُوں اپنے ایمان دی وجہ توں ٹھیک ہوئی ایں۔“‏ اوہ عورت اوسے ویلے ٹھیک ہو گئی سی۔‏

23 جدوں یسوع اوس نگران دے گھر پونچیا تے اوہنے ویکھیا کہ لوک بانسری تے دُکھی دُھناں وجا رہے نیں تے ماتم کر رہے نیں۔ 24 یسوع نے اوہناں نُوں کہیا:‏ ”‏ایتھوں چلے جاؤ، بچی مری نئیں سگوں سوں رہی اے۔“‏ ایہہ سُن کے اوہ اوہدا مخول اُڈان لگ پئے۔ 25 لوکاں نُوں باہر بھیجن توں بعد اوہنے اندر جا کے بچی دا ہتھ پھڑیا تے اوہ اُٹھ پئی۔ 26 ایہہ گل اوس پورے علاقے چ پھیل گئی۔‏

27 جدوں یسوع اوس جگہ توں ٹُر پیا تے دو اَنھے آدمی اوہدے پچھے پچھے آ کے اُچی آواز چ کہن لگ پئے:‏ ”‏اَے داؤد دے پُتر، ساڈے تے رحم کر۔“‏ 28 جدوں یسوع اِک گھر چ گیا تے اوہ دونویں اَنھے آدمی اوہدے کول آئے۔ یسوع نے اوہناں نُوں پچھیا:‏ ”‏کیہہ توانوں یقین* اے کہ مَیں توانوں ٹھیک کر سکنا واں؟“‏ اوہناں نے کہیا:‏ ”‏جی مالک۔“‏ 29 فیر اوہنے اوہناں دِیاں اَکھاں نُوں چُھویا تے کہیا:‏ ”‏تُسی ایمان نال جو منگیا اے، اوہی ہووے۔“‏ 30 اوسے ویلے اوہناں دِیاں اَکھاں دی روشنی واپس آ گئی۔ پر یسوع نے اوہناں نُوں سختی نال کہیا:‏ ”‏کسے نُوں ایہدے بارے نہ دَسنا۔“‏ 31 پر اوہناں نے باہر جا کے سارے علاقے چ یسوع بارے رولا پا دِتا۔‏

32 حالے اوہ دونویں اوتھوں نکل ای رہے سن کہ لوک اِک گونگے آدمی نُوں یسوع کول لیائے جنہوں اِک باغی فرشتہ چِمبڑیا ہویا سی۔ 33 جدوں یسوع نے اوہدے چوں باغی فرشتے نُوں کڈھ دِتا تے اوہ گُونگا بولن لگ پیا۔ ایہہ ویکھ کے لوک بوہت حیران ہوئے تے کہن لگ پئے:‏ ”‏اِسرائیل چ اِنج پہلاں کدی نئیں ہویا۔“‏ 34 پر فریسیاں نے کہیا:‏ ”‏اوہ باغی فرشتیاں دے سردار دی مدد نال ای لوکاں چوں باغی فرشتیاں نُوں کڈھدا اے۔“‏

35 فیر یسوع نے سارے شہراں تے پِنڈاں دا دَورہ کرنا شروع کیتا۔ اوہنے اوتھوں دِیاں عبادت‌گاہواں چ تلیم دِتی، بادشاہی دی خوش‌خبری دی مُنادی کیتی تے لوکاں دی ہر طرحاں دی بیماری تے معذوری نُوں ٹھیک کیتا۔ 36 لوکاں نُوں ویکھ کے یسوع نُوں بڑا ترس آیا کیونکہ اوہ ایہو جہیاں زخمی* تے لاچار بھیڈاں وانگوں سن جنہاں دا کوئی چرواہا نہ ہووے۔ 37 فیر اوہنے اپنے شاگرداں نُوں کہیا:‏ ”‏ویکھو!‏ فصل تے بوہت اے پر واڈھی لئی مزدور تھوڑے نیں۔ 38 ایس لئی کھیت دے مالک دی مِنت کرو کہ اوہ واڈھی لئی ہور مزدور بھیجے۔“‏