یوحنا دی اِنجیل

9 جدوں یسوع اوتھوں جا رہیا سی تے اوہنوں اِک بندہ نظر آیا جیہڑا پیدائشی اَنھا سی۔ 2 اوہدے شاگرداں نے اوہنوں پچھیا:‏ ”‏اُستاد،‏*‏ کیہہ ایہہ بندہ اپنے گُناہ دی وجہ توں اَنھا پیدا ہویا یاں اپنے ماں پیو دے گُناہ دی وجہ توں؟“‏ 3 یسوع نے جواب دِتا:‏ ”‏اوہ نہ تے اپنے تے نہ ای اپنے ماں پیو دے گُناہ دی وجہ توں اَنھا پیدا ہویا۔ پر ایس بندے دی وجہ توں لوکاں نُوں خدا دے کم ویکھن دا موقع ملے گا۔ 4 جدوں تک دن اے سانوں اوہدے کم کرنے چاہی دے نیں جنہے مینوں گھلیا اے۔ اوہ رات آن والی اے جدے چ کوئی وی بندہ کم نئیں کر سکے گا۔ 5 جدوں تک مَیں دُنیا وچ آں، مَیں دُنیا دا چانن آں۔“‏ 6 ایہہ کہن توں بعد اوہنے زمین تے تُھکیا تے تُھک نال مٹی دا لیپ بنا کے اوس بندے دِیاں اَکھاں تے لایا 7 تے اوہنوں کہیا:‏ ”‏جا، سِلُوام دے تلا چ اپنیاں اَکھاں دھو لے۔“‏ (‏ سِلُوام دا مطلب اے:‏ ”‏بھیجیا گیا۔“‏)‏ اوہنے جا کے اپنیاں اَکھاں دھوتیاں تے جدوں اوہ واپس آیا تے اوہدیاں اَکھاں ٹھیک ہو گئیاں سن۔‏

8 اوہدے گوانڈھی تے اوہ لوک جنہاں نے اوہنوں بھیک منگدے ویکھیا سی، کہن لگ پئے:‏ ”‏کیہہ ایہہ اوہی بندہ نئیں اے جیہڑا پہلاں بہہ کے بھیک منگدا ہوندا سی؟“‏ 9 کجھ لوک کہہ رہے سن:‏ ”‏ایہہ اوہی بندہ اے۔“‏ پر کجھ لوک کہہ رہے سن:‏ ”‏نئیں، ایہدی بس شکل اوہدے نال مِلدی اے۔“‏ پر اوہ بندہ وار وار کہندا رہیا:‏ ”‏مَیں اوہی آں۔“‏ 10 ایس لئی لوکاں نے اوہنوں پچھیا:‏ ”‏فیر تیریاں اَکھاں ٹھیک کیویں ہوئیاں؟“‏ 11 اوہنے جواب دِتا:‏ ”‏یسوع ناں دے بندے نے مٹی دا لیپ بنا کے میریاں اَکھاں تے لایا تے مینوں کہیا:‏ ”‏جا کے سِلُوام دے تلا چ اپنیاں اَکھاں دھو لے۔“‏ تے جدوں مَیں جا کے اَکھاں دھوتیاں تے مینوں نظر آن لگ پیا۔“‏ 12 لوکاں نے اوہنوں پچھیا:‏ ”‏اوہ بندہ کتھے وے؟“‏ اوہنے کہیا:‏ ”‏مینوں نئیں پتہ۔“‏

13 فیر اوہ اوس بندے نُوں جیہڑا پہلاں اَنھا ہوندا سی فریسیاں کول لے گئے۔ 14 اِتفاق دی گل اے کہ جیس دن یسوع نے لیپ بنا کے اوس بندے دِیاں اَکھاں ٹھیک کیتیاں سن، اوہ سبت دا دن سی۔ 15 ایس لئی فریسی وی اوہنوں پچھن لگ پئے کہ اوہدیاں اَکھاں ٹھیک کیویں ہوئیاں۔ اوہنے جواب دِتا:‏ ”‏اوہنے میریاں اَکھاں تے مٹی دا لیپ بنا کے لایا۔ فیر مَیں اپنیاں اَکھاں دھوتیاں تے مینوں نظر آن لگ پیا۔“‏ 16 پر کجھ فریسی کہن لگ پئے:‏ ”‏اوہ بندہ خدا وَلّوں نئیں ہو سکدا کیونکہ اوہ سبت نُوں نئیں من دا۔“‏ پر کجھ نے کہیا:‏ ”‏بھلا اِک گُناہ‌گار بندہ اِنج دے معجزے کیویں کر سکدا اے؟“‏ ایس طرحاں اوہناں چ پُھٹ پے گئی۔ 17 ایس لئی اوہناں نے فیر اوس بندے نُوں پچھیا:‏ ”‏تیرا اوہدے بارے کیہہ خیال اے، تیریاں تے اوہنے اَکھاں ٹھیک کیتیاں نیں نا؟“‏ اوہنے کہیا:‏ ”‏اوہ اِک نبی اے۔“‏

18 پر یہودی رہنما ایہہ منن لئی تیار نئیں سن کہ اوہ پہلاں اَنھا سی، پر ہُن اوہنوں نظر آن لگ پیا اے۔ایس لئی اوہناں نے اوہدے ماں پیو نُوں بلا‌یا 19 تے اوہناں نُوں پچھیا:‏ ”‏کیہہ ایہہ تواڈا پُتر اے جدے بارے تُسی کہندے او کہ ایہہ اَنھا پیدا ہویا سی؟ تے فیر ہُن ایہدیاں اَکھاں ٹھیک کیویں ہو گئیاں؟“‏ 20 اوہدے ماں پیو نے کہیا:‏ ”‏ہاں، ایہہ ساڈا ای پُتر اے تے ایہہ اَنھا پیدا ہویا سی۔ 21 پر ایہدیاں اَکھاں ٹھیک کیویں ہوئیاں ایہدے بارے سانوں کجھ نئیں پتہ۔ نہ ای سانوں ایہہ پتہ اے کہ ایہنوں ٹھیک کنہے کیتا اے۔ تُسی ایہنوں ای پچھ لوو، ایہہ کیہڑا بچہ اے۔ ایہہ توانوں آپ دَسے گا۔“‏ 22 اوہدے ماں پیو نے ایہہ ایس لئی کہیا سی کیونکہ اوہ یہودی رہنماواں توں ڈردے سن۔ اصل چ اوہناں رہنماواں نے ایہہ طے کیتا ہویا سی کہ جیہڑا وی بندہ یسوع نُوں مسیح منے گا، اوہنوں عبادت‌گاہ چوں کڈھ دِتا جائے گا۔‏*‏ 23 ایسے لئی اوہدے ماں پیو نے کہیا سی:‏ ”‏ایہنوں ای پچھ لوو، ایہہ کیہڑا بچہ اے۔“‏

24 فیر اوہناں نے اوس بندے نُوں جیہڑا پہلاں اَنھا ہوندا سی دُوجی واری بلا کے کہیا:‏ ”‏خدا دے سامنے سچ‌سچ بول، سانوں پتہ اے کہ اوہ آدمی گُناہ‌گار اے۔“‏ 25 اوہنے جواب دِتا:‏ ”‏مینوں ایہہ تے نئیں پتہ کہ اوہ گُناہ‌گار ہے یاں نئیں، مینوں بس ایناں پتہ اے کہ مَیں پہلاں اَنھا ساں پر ہُن مَیں ویکھ سکنا واں۔“‏ 26 فیر اوہناں نے اوہنوں پچھیا:‏ ”‏اوہنے تیرے نال کیتا کیہہ؟ اوہنے تیریاں اَکھاں کیویں ٹھیک کیتیاں؟“‏ 27 اوہنے کہیا:‏ ”‏مَیں توانوں پہلاں وی دَسیا اے پر تُسی میری گل سُن دے ای نئیں۔ ہُن تُسی فیر پچھی جا رہے او۔ کِتے تُسی وی تے اوہدے شاگرد نئیں بننا چاہندے؟“‏ 28 اوہناں نے اوہنوں بڑا گھٹیا سمجھدے ہوئیاں کہیا:‏ ”‏تُوں ہوویں گا اوہدا شاگرد۔ اَسی تے موسیٰ دے شاگرد آں۔ 29 سانوں پتہ اے کہ موسیٰ نال تے خدا نے گلاں کیتیاں سن۔ پر ایس آدمی بارے سانوں نئیں پتہ کہ ایہنوں کنہے گھلیا اے۔“‏ 30 اوہنے جواب دِتا:‏ ”‏ایہہ تے بڑی حیرانی دی گل اے کہ توانوں ایہہ ای نئیں پتہ کہ اوہنوں کنہے گھلیا اے حالانکہ اوہنے میریاں اَکھاں ٹھیک کیتیاں نیں۔ 31 سانوں پتہ اے کہ خدا گُناہ‌گاراں دی نئیں سُن دا سگوں اوہدی سُن دا اے جیہڑا خدا توں ڈردا اے تے اوہدی مرضی تے چلدا اے۔ 32 اَج تک ایہہ سُنن چ نئیں آیا کہ کسے نے پیدائشی اَنھے دِیاں اَکھاں ٹھیک کیتیاں ہون۔ 33 جے اوہ بندہ خدا وَلّوں نہ ہوندا تے اوہ کجھ نئیں کر سکدا سی۔“‏ 34 اوہناں نے اوہنوں جواب دِتا:‏ ”‏تُوں تے آپ گُناہ چ جمیا ایں تے تُوں سانوں مَت دے رہیا ایں؟“‏ فیر اوہناں نے اوہنوں عبادت‌گاہ چوں کڈھ دِتا۔‏

35 یسوع نُوں پتہ لگا کہ اوہناں لوکاں نے اوس بندے نُوں عبادت‌گاہ چوں کڈھ دِتا اے۔ جدوں یسوع اوہنوں ملیا تے اوہنوں پچھیا:‏ ”‏کیہہ تُوں انسان دے بیٹے*‏ تے ایمان لے آیا ایں؟“‏ 36 اوہنے جواب دِتا:‏ ”‏مینوں دَسو کہ اوہ کون اے تاکہ مَیں اوہدے تے ایمان لیاواں۔“‏ 37 یسوع نے اوہنوں کہیا:‏ ”‏تُوں اوہنوں ویکھیا اے سگوں اوہی تیرے نال گل کر رہیا اے۔“‏ 38 اوہنے کہیا:‏ ”‏جی مالک، مَیں اوہدے تے ایمان لیانا واں۔“‏ فیر اوہنے یسوع اَگے سِر جُھکا‌یا۔ 39 یسوع نے کہیا:‏ ”‏مَیں دُنیا چ ایس لئی آیا واں کہ لوکاں دی عدالت ہوئے تاکہ جیہڑے اَنھے نیں، اوہ ویکھ سکن تے جیہڑے ویکھ سکدے نیں، اوہ اَنھے ہو جان۔“‏ 40 جدوں اوتھے موجود فریسیاں نے اوہدیاں ایہہ گلاں سُنیاں تے اوہناں نے کہیا:‏ ”‏کیہہ اَسی تینوں اَنھے لگنے آں؟“‏ 41 یسوع نے اوہناں نُوں کہیا:‏ ”‏جے تُسی اَنھے ہوندے تے توانوں قصوروار نہ ٹھہرایا جاندا۔ پر تُسی تے کہہ رہے او کہ ”‏اَسی ویکھ سکنے آں۔“‏ ایس لئی تواڈا گُناہ معاف نئیں ہوئے گا۔“‏