کُرنتھیوں دے ناں دُوجا خط

12 بھانویں کہ مینوں شیخی مارن دا کوئی فائدہ نئیں پر فیر وی مَیں اِنج کراں گا۔ ہُن مَیں توانوں مالک وَلّوں مِلن والے پیغام تے رُویا بارے دَسنا واں۔ 2 مسیح دا اِک شاگرد*‏ اے جنہوں 14 سال پہلاں تیجے اسمان*‏ تے لجایا گیا۔ مینوں نئیں پتہ کہ اوہ آپ اوتھے گیا سی یاں نئیں، ایہہ تے خدا ای جان دا اے۔ 3 ہاں، واقعی ایہو جیہا اِک بندہ ہے وے۔ پر مینوں نئیں پتہ کہ اوہ آپ اوتھے گیا سی یاں نئیں، ایہہ تے خدا ای جان دا اے۔ 4 اوہنوں فردوس چ لجایا گیا جِتھے اوہنے ایہو جہیاں گلاں سُنیاں جیہڑیاں دَسیاں نئیں جا سکدیاں تے جنہاں بارے گل کرنا انساناں لئی جائز وی نئیں اے۔ 5 مَیں اوس بندے بارے شیخی ماراں گا۔ پر مَیں اپنے بارے نئیں سگوں اپنیاں کمزوریاں بارے شیخی ماراں گا۔ 6 پر جے مَیں کدی اپنے بارے شیخی ماراں وی تے ایہہ غلط نئیں ہوئے گا کیونکہ مَیں سچ بول رہیا واں۔ پر مَیں اپنے آپ نُوں شیخی مارن توں روکاں گا تاکہ کوئی وی حدوں ودھ میری تعریف نہ کرے۔ مَیں چاہنا واں کہ لوک اوہدے مطابق میرے بارے رائے قائم کرن، جو کجھ اوہ مینوں کردے یاں کہندے ہوئیاں ویکھدے نیں نہ کہ ایس وجہ توں 7 کہ مالک نے مینوں شان‌دار پیغام دِتے نیں۔‏

خدا نئیں چاہندا کہ مَیں غرور نال پُھل جاواں۔ ایس لئی مینوں اِک تکلیف چوں لنگھنا پے رہیا اے جیہڑی اِک کنڈے وانگوں میرے جسم چ چُبھدی رہندی اے۔ شیطان دا اِک فرشتہ مینوں چنڈاں ماردا رہندا اے تاکہ مَیں غرور نال پُھل نہ جاواں۔ 8 مَیں مالک*‏ اَگے تِن وار اِلتجا کیتی کہ اوہ میری ایہہ تکلیف ختم کر دَوے۔ 9 پر اوہنے مینوں کہیا:‏ ”‏میری عظیم رحمت تیرے لئی کافی اے کیونکہ جدوں تُوں کمزور ہُنا ایں، اوہدوں میری طاقت پوری طرحاں تیرے چ کم کردی اے۔“‏ ایس لئی مَیں اپنیاں کمزوریاں تے بڑی خوشی نال شیخی ماراں گا تاکہ مسیح دی طاقت اِک خیمے وانگوں میرے تے سایہ کردی رہوے۔ 10 ہاں، مَیں مسیح دی خاطر بڑی خوشی نال کمزوری، بے‌عزتی، تنگی، ظلم تے مشکلاں برداشت کراں گا کیونکہ جدوں مَیں کمزور ہُنا واں، اوہدوں مَیں طاقتور ہُنا واں۔‏

11 جے مَیں ناسمجھ بنیا واں تے تُسی مینوں اِنج کرن تے مجبور کیتا اے کیونکہ تُسی میرے حق چ نئیں بولے۔ بھانویں کہ تُسی مینوں کجھ نئیں سمجھدے پر مَیں کسے وی لحاظ نال تواڈے ”‏وڈے رسولاں“‏*‏ توں گھٹ نئیں آں۔ 12 مَیں بڑے صبر نال توانوں ایس گل دے ثبوت دِتے کہ مَیں اِک رسول آں۔ مَیں توانوں نشانیاں، معجزے تے حیران کرن والے کم وکھائے۔ 13 باقی کلیسیاواں نُوں کیہڑا شرف ملیا اے جیہڑا توانوں نئیں ملیا؟ بس ایہی کہ مَیں تواڈے اُتے اپنے خرچیاں دا بوجھ نئیں پایا۔ جے مَیں غلط کیتا تے مہربانی کر کے مینوں معاف کر دَوو۔‏

14 ویکھو، مَیں تیجی وار تواڈے کول آن لئی تیار آں۔ پر ایس وار وی مَیں تواڈے تے بوجھ نئیں پاواں گا۔ مینوں تواڈیاں چیزاں دی نئیں سگوں تواڈی ضرورت اے کیونکہ بچیاں توں امید نئیں کیتی جاندی کہ اوہ ماں پیو لئی پیسے جوڑن سگوں ماں پیو توں امید کیتی جاندی اے کہ اوہ بچیاں لئی پیسے جوڑن۔ 15 مَیں تے تواڈے لئی خوشی خوشی اپنا سب کجھ قربان کرن لئی تیار آں۔ جے میرے دل چ تواڈے لئی اینی محبت اے تے کیہہ تواڈے دل چ وی میرے لئی محبت نئیں ہونی چاہی دی؟ 16 خیر جو وی اے، مَیں تواڈے تے بوجھ نئیں پایا۔ پر فیر وی تُسی کہندے او کہ مَیں دھوکھےباز آں تے مَیں چالاکی نال توانوں پھسایا اے۔ 17 کیہہ مَیں اوہناں بھراواں دے ذریعے تواڈا فائدہ چُکیا جنہاں نُوں مَیں تواڈے کول گھلیا سی؟ بالکل نئیں۔ 18 مَیں طِطُس نُوں حوصلہ دِتا کہ اوہ تواڈے کول جائے۔ نالے مَیں اِک بھرا نُوں وی اوہدے نال گھلیا۔ کیہہ طِطُس نے کدی وی تواڈا فائدہ چُکیا؟ نئیں سگوں ساڈے دونواں دا مقصد اِکو ای سی تے اَسی اِکو راہ تے چلے۔‏

19 شاید توانوں لگے کہ اَسی تواڈے سامنے اپنیاں صفائیاں پیش کر رہے آں۔ پر ایہہ گل نئیں اے سگوں مسیح دے شاگرد ہون دے ناتے اَسی خدا دے حضور سچ بول رہے آں۔ پیارے بھراوو، اَسی جو وی کرنے آں تواڈا حوصلہ ودھان لئی کرنے آں۔ 20 پر مینوں ڈر اے کہ جدوں مَیں تواڈے کول آواں گا تے تواڈا رویہ اوہو جیہا نئیں ہوئے گا جیہو جیہا مَیں چاہنا واں تے میرا رویہ تواڈے نال اوہو جیہا نئیں ہوئے گا جیہو جیہا تُسی چاہندے او۔ مَیں نئیں چاہندا کہ اوس ویلے تُسی جھگڑے کرو، اِک دُوجے توں سڑو، غصے چ بھڑکو، تواڈے چ پُھٹ پئی ہوئے، جھوٹھیاں افواہواں پھیلیاں ہون، چغلیاں ہون، غرور ہوئے تے گڑبڑ ہوئے۔ 21 مینوں ڈر اے کہ جدوں مَیں اوتھے آواں گا تے مینوں خدا سامنے شرمندہ ہونا پووے گا تے اوہناں لوکاں دی وجہ توں سوگ منانا پووے گا جنہاں نے گُناہ کیتا اے تے جنہاں نے ناپاکی، جنسی‌بدکاری تے بے‌حیائی نال غلط کم کرن*‏ توں توبہ نئیں کیتی۔‏