رسولاں دے اعمال
10 قیصریہ چ کُرنیلیُس ناں دا اِک بندہ رہندا سی جیہڑا اِطالوی دستے* چ اِک فوجی افسر* سی۔ 2 اوہ اِک نیک بندہ سی۔ اوہ تے اوہدے گھر والے خدا دا ڈر من دے سن۔ کُرنیلیُس ضرورتمند لوکاں دی بڑی مدد کردا سی تے خدا اَگے اِلتجاواں کردا رہندا سی۔ 3 اِک دن اوہنے دوپہر دے تقریباً 3 وجے* رُویا چ خدا دے اِک فرشتے نُوں ویکھیا جنہے اوہدے کول آ کے کہیا: ”کُرنیلیُس!“ 4 کُرنیلیُس فرشتے نُوں ویکھ کے بوہت ڈر گیا تے اوہنے کہیا: ”جی مالک، میرے لئی کیہہ حکم اے؟“ فرشتے نے اوہنوں کہیا: ”خدا نے تیریاں دُعاواں سُنیاں نیں تے اوہنے ویکھیا اے کہ تُوں ضرورتمنداں دی مدد کرنا ایں۔ اوہنے تیری نیکی نُوں یاد رکھیا اے۔ 5 ایس لئی کجھ بندیاں نُوں یافا گھل تے اوتھوں شمعون نُوں بلا جنہوں پطرس وی کہیا جاندا اے۔ 6 اوہ اوس شمعون دے نال ٹھہریا ہویا اے جیہڑا چمڑا تیار کرن دا کم کردا اے تے جدا گھر سمندر دے نیڑے وے۔“ 7 ایہہ کہہ کے فرشتہ چلا گیا۔ فیر کُرنیلیُس نے فوراً اپنے دو نوکراں تے اِک فوجی نُوں بلایا جیہڑا اوہدے خادماں وچوں اِک سی تے مذہبی بندہ سی۔ 8 کُرنیلیُس نے اوہناں نُوں سارا کجھ دَسیا تے یافا گھل دِتا۔
9 اگلے دن اوہ سفر کردے کردے یافا دے نیڑے پونچے۔ پطرس دوپہر دے تقریباً 12 وجے* دُعا کرن لئی چھت تے گیا۔ 10 پر اوہنوں بوہت بُھکھ لگی ہوئی سی تے اوہ کجھ کھانا چاہندا سی۔ جدوں کھانا تیار ہو رہیا سی تے پطرس نے اِک رُویا ویکھی۔ 11 اوہنے ویکھیا کہ اسمان کُھلیا ہویا اے تے لیلن دی وڈی چادر ورگی اِک شے تھلے زمین وَل آ رہی اے* 12 جدے تے ہر قسم دے چار پیراں والے جانور، زمین تے پھرن والے جانور تے اسمان دے پرندے سن۔ 13 فیر اوہنوں اِک آواز آئی: ”پطرس، اُٹھ تے ایہناں نُوں ذِبح کر کے کھا۔“ 14 پر پطرس نے کہیا: ”نئیں مالک، مَیں کدی وی کوئی ناپاک تے حرام چیز نئیں کھادی۔“ 15 فیر اوہنوں دُوجی واری آواز آئی: ”تُوں اوہناں چیزاں نُوں ناپاک نہ کہہ جنہاں نُوں خدا نے پاک ٹھہرایا اے۔“ 16 تیجی واری وی ایسے طرحاں ہویا تے فیر اوس شے نُوں فوراً اسمان تے چُک لیا گیا۔
17 پطرس حالے ایس اُلجھن چ سی کہ رُویا دا کیہہ مطلب اے کہ اوسے ویلے کُرنیلیُس دے بندے شمعون دے گھر دا پتہ پچھدے پچھدے دروازے تے آ گئے۔ 18 اوہناں نے گھر چوں کسے نُوں بلایا تے پچھیا: ”کیہہ شمعون جنہوں پطرس وی کہندے نیں، ایسے گھر چ ٹھہریا ہویا اے؟“ 19 پطرس حالے وی اوس رُویا بارے سوچ رہیا سی۔ پر خدا نے پاک روح دے ذریعے اوہنوں کہیا: ”ویکھ، تِن بندے تیرے بارے پچھ رہے نیں۔ 20 ایس لئی اُٹھ کے تھلے جا تے بےفکر ہو کے اوہناں نال چلا جا کیونکہ اوہناں نُوں مَیں گھلیا اے۔“ 21 فیر پطرس نے تھلے جا کے اوہناں بندیاں نُوں کہیا: ”مَیں ای آں جنہوں تُسی لبھ رہے او۔ دَسو کیویں آنا ہویا؟“ 22 اوہناں نے کہیا: ”فوجی افسر کُرنیلیُس نے سانوں تیرے کول گھلیا اے۔ اوہ اِک نیک بندہ اے جیہڑا خدا توں ڈردا اے تے پوری یہودی قوم اوہدی تعریف کردی اے۔ خدا نے اِک فرشتے دے ذریعے اوہنوں ہدیت دِتی اے کہ اوہ تینوں اپنے گھر بلائے تے تیرے کولوں کلام سُنے۔“ 23 ایس لئی پطرس نے اوہناں نُوں اندر بلایا تے رات ٹھہرن لئی کہیا۔
اگلے دن اوہ اُٹھ کے اوہناں نال چلا گیا تے یافا توں کجھ بھرا وی اوہدے نال گئے۔ 24 اوس توں اگلے دن اوہ قیصریہ پونچے۔ کُرنیلیُس اوہناں دا اِنتظار کر رہیا سی تے اوہنے اپنے رشتےداراں تے قریبی دوستاں نُوں وی گھر بلایا ہویا سی۔ 25 جیویں ای پطرس دروازے توں اندر گیا، کُرنیلیُس اوہنوں مِلن آیا تے اوہدے پیراں چ ڈِگ کے اوہنوں سجدہ کیتا۔ 26 پر پطرس نے اوہنوں اُٹھا کے کہیا: ”اُٹھ، مَیں وی تیرے وانگوں انسان ای آں۔“ 27 اوہ کُرنیلیُس نال گلاں کردا کردا اندر گیا تے اوہنے ویکھیا کہ اوتھے بوہت سارے لوک جمع نیں۔ 28 پطرس نے اوہناں نُوں کہیا: ”تُسی چنگی طرحاں جان دے او کہ اِک یہودی لئی کسے ہور قوم دے بندے نال میل جول رکھنا یاں اوہدے کول جانا وی جائز نئیں اے۔ پر خدا نے مینوں سمجھایا اے کہ مینوں کسے وی بندے نُوں ناپاک نئیں کہنا چاہی دا۔ 29 ایس لئی جدوں مینوں ایتھے بلایا گیا تے مَیں کوئی اِعتراض نئیں کیتا۔ ہُن مینوں دَسو کہ تُسی مینوں ایتھے کیوں بلایا اے۔“
30 فیر کُرنیلیُس نے کہیا: ”چار دن پہلاں ایسے وقت دوپہر دے تقریباً 3 وجے* مَیں اپنے گھر چ دُعا کر رہیا ساں کہ اچانک اِک آدمی میرے سامنے آ کے کھلو گیا جدے کپڑے بڑے چمک رہے سن۔ 31 اوہنے مینوں کہیا: ”کُرنیلیُس، خدا نے تیریاں دُعاواں سُنیاں نیں تے اوہنے ویکھیا اے کہ تُوں ضرورتمنداں دی مدد کرنا ایں۔ اوہنے تیری نیکی نُوں یاد رکھیا اے۔ 32 ایس لئی کجھ بندیاں نُوں یافا گھل تے اوتھوں شمعون نُوں بلا جنہوں پطرس وی کہیا جاندا اے۔ اوہ چمڑا تیار کرن والے شمعون دے گھر ٹھہریا ہویا اے جیہڑا سمندر دے نیڑے رہندا اے۔“ 33 مَیں اوسے ویلے تینوں بلان لئی بندے گھلے۔ تیری بڑی مہربانی کہ تُوں آیا ایں۔ ہُن اَسی ایتھے خدا دے سامنے اوہ ساریاں گلاں سُنن لئی جمع ہوئے آں جیہڑیاں یہوواہ نے تینوں دَسن دا حکم دِتا اے۔“
34 ایہہ سُن کے پطرس نے کہیا: ”ہُن مَیں واقعی سمجھ گیا واں کہ خدا کسے دی طرفداری نئیں کردا 35 سگوں اوہ ہر قوم وچوں اوس انسان نُوں قبول کردا اے جیہڑا اوہدے توں ڈردا اے تے صحی کم کردا اے۔ 36 خدا نے اِسرائیلیاں نُوں ایہہ خوشخبری سُنائی کہ یسوع مسیح دے ذریعے ساڈی اوہدے نال صلح ہو سکدی اے تے یسوع ای ساریاں دا مالک اے۔ 37 تُسی جان دے او کہ یوحنا نے مُنادی کیتی سی کہ لوک بپتسمہ لین۔ ایہدے بعد گلیل توں جیس گل دا چرچا شروع ہویا تے فیر پورے یہودیہ چ پھیل گیا اوہ ایہہ سی کہ 38 خدا نے یسوع ناصری نُوں پاک روح نال مسح کیتا تے اوہنوں طاقت بخشی۔ خدا اوہدے نال سی ایس لئی اوہنے پورے ملک چ جا کے چنگے کم کیتے تے اوہناں لوکاں نُوں شفا دِتی جیہڑے اِبلیس دے ظلم دا شکار سن۔ 39 اَسی اوہناں سارے کماں دے گواہ واں جیہڑے اوہنے یروشلم تے یہودیاں دے پورے ملک چ کیتے۔ پر اوہناں لوکاں نے اوہنوں سُولی* تے ٹنگ کے مار دِتا۔ 40 فیر خدا نے اوہنوں تیجے دن زندہ کیتا تاکہ لوک اوہنوں ویکھ سکن۔ 41 پر سارے لوکاں نے اوہنوں نئیں ویکھیا سگوں صرف اوہناں نے ویکھیا جنہاں نُوں خدا نے پہلاں توں ای گواہ بنن لئی چُنیا سی یعنی اَسی جنہاں نے اوہدے جی اُٹھن توں بعد اوہدے نال کھادا پیتا۔ 42 نالے اوہنے سانوں ایہہ حکم وی دِتا کہ اَسی لوکاں چ مُنادی کریئے تے ایس گل دی چنگی طرحاں گواہی دَئیے کہ خدا نے زندہ لوکاں تے مُردیاں دا اِنصاف کرن لئی اوہنوں ای چُنیا اے۔ 43 سارے نبیاں نے اوہدے بارے ای ایہہ گواہی دِتی کہ خدا یسوع دے ناں تے اوس انسان دے گُناہ معاف کر دَوے گا جیہڑا یسوع تے ایمان لیائے گا۔“
44 حالے پطرس ایہہ گلاں کہہ ای رہیا سی کہ خدا دا کلام سُنن والے سارے لوکاں تے پاک روح نازل ہوئی۔ 45 پطرس نال آئے یہودی شاگرد* ایہہ ویکھ کے بڑے حیران ہوئے کہ پاک روح دی نعمت غیریہودیاں* نُوں وی مِل رہی اے 46 کیونکہ شاگرداں نے ویکھیا کہ اوہ فرق فرق زباناں بول رہے نیں تے خدا دی وڈیائی کر رہے نیں۔ فیر پطرس نے کہیا: 47 ”ساڈے وانگوں ایہناں نُوں وی پاک روح مِل گئی اے تے فیر کیہہ کوئی ایہناں نُوں پانی چ بپتسمہ لین توں روک سکدا اے؟“ 48 ایہہ کہہ کے اوہنے اوہناں نُوں یسوع مسیح دے ناں تے بپتسمہ لین دا حکم دِتا۔ فیر اوہناں لوکاں نے پطرس نُوں کہیا کہ اوہ کجھ دن اوہناں نال ٹھہرے۔