یوحنا نُوں مِلن والا مُکاشفہ
11 فیر اوہنے مینوں ناپن لئی اِک ڈنڈا دِتا تے کہیا: ”اُٹھ تے خدا دی ہیکل* تے قربانگاہ نُوں ناپ تے اوہدی عبادت کرن والیاں نُوں گن۔* 2 پر ہیکل دے باہر ویہڑے نُوں چھڈ دوِیں تے اوہنوں نہ ناپیں کیونکہ اوہ قوماں دے حوالے کر دِتا گیا اے تے اوہ 42 مہینیاں تک مُقدس شہر نُوں اپنے پیراں تھلے رولن گیاں۔ 3 مَیں اپنے دو گواہواں نُوں گھلاں گا جیہڑے 1260 دِناں تک بوریاں پا کے پیشینگوئی کرن گے۔“ 4 ایہہ گواہ زمین دے مالک دے حضور کھلوتے ہوئے نیں تے زیتون دے دو درخت تے دو شمعدان ایہناں وَل اشارہ کردے نیں۔
5 جے کوئی دُشمن گواہواں نُوں نقصان پونچان دی کوشش کرے گا تے گواہواں دے مُونہہ وچوں نِکلن والی اَگ اوہنوں ساڑ کے سواہ کر دَوے گی۔ جیہڑا وی اوہناں نُوں نقصان پونچان دی کوشش کرے گا، اوہنوں ایسے طرحاں مار دِتا جائے گا۔ 6 اوہناں کول اسمان نُوں بند کرن دا اِختیار اے تاکہ جنہاں دِناں چ اوہ پیشینگوئی کرن، اوہناں دِناں چ بارش نہ پووے۔ اوہناں نُوں ایہہ وی اِختیار دِتا گیا اے کہ اوہ پانیاں نُوں خون چ بدل دین تے جدوں چاہن زمین تے ہر طرحاں دی آفت لیان۔
7 جدوں اوہ گواہی دین دا کم ختم کر لین گے تے اتھاہ گڑھے چوں نِکلن والا وحشی درندہ اوہناں نال جنگ کرے گا تے اوہناں نُوں ہرا کے جانوں مار دَوے گا 8 تے اوہناں دِیاں لاشاں اوس وڈے شہر دے چونک چ پئیاں رہن گیاں جِتھے لوکاں نے اوہناں دے مالک نُوں سُولی تے ٹنگیا سی۔ ایہہ شہر سدوم تے مصر وَل اشارہ کردا اے۔ 9 فرق فرق نسلاں، قبیلیاں، زباناں تے قوماں دے لوک ساڈھے تِن دِناں تک اوہناں دِیاں لاشاں نُوں ویکھن گے تے اوہناں نُوں دفنان دی اجازت نئیں دین گے۔ 10 زمین تے رہن والے اوہناں دی موت توں خوش ہون گے تے جشن منان گے تے اِک دُوجے نُوں تحفے گھلن گے کیونکہ اوہناں دو نبیاں* نے زمین تے رہن والیاں نُوں تڑفایا سی۔
11 ساڈھے تِن دِناں بعد خدا نے اوہناں گواہواں نُوں زندہ کر دِتا* تے اوہ اپنے پیراں تے کھلو گئے تے اوہناں نُوں ویکھن والے سارے لوک بوہت ڈر گئے۔ 12 اسمانوں کسے نے اُچی آواز چ اوہناں نُوں کہیا: ”اُتے آ جاؤ۔“ اوہ اِک بدّل چ اسمان تے چلے گئے۔ اوہناں دے دُشمن اوہناں نُوں ویکھدے رہ گئے۔* 13 اوس ویلے اِک بوہت وڈا زلزلہ آیا جنہے شہر دا دسواں حصہ تباہ کر دِتا تے 7 ہزار لوک مارے گئے۔ پر باقی لوک ڈر گئے تے اسمان دے خدا دی وڈیائی کرن لگ پئے۔
14 دُوجی مصیبت لنگھ گئی اے۔ ویکھو، تیجی مصیبت چھیتی آن والی اے۔
15 جدوں ستویں فرشتے نے اپنا نرسنگا وجایا تے اسمان چ اُچی آواز چ اعلان ہویا: ”دُنیا دی بادشاہی ساڈے مالک تے اوہدے مسیح دی ہو گئی اے تے اوہ* ہمیشاں ہمیشاں تک بادشاہ دے طور تے حکمرانی کرے گا۔“
16 خدا دے سامنے اپنے اپنے تخت تے بیٹھے ہوئے 24 بزرگاں نے گوڈے ٹیک کے اوہنوں سجدہ کیتا 17 تے کہیا: ”اَے بےحد طاقت رکھن والے یہوواہ خدا، تُوں ہمیشاں ہمیشاں توں ایں۔ اَسی تیرا شکر کرنے آں کیونکہ تُوں اپنا عظیم اِختیار سنبھال لیا اے تے بادشاہ دے طور تے حکمرانی شروع کر دِتی اے۔ 18 پر قوماں نُوں غصہ آیا تے تیرا قہر نازل ہویا۔ نالے اوہ طے کیتا ہویا ویلا آ گیا جدوں تُوں مُردیاں دی عدالت کریں گا تے سارے چھوٹے تے وڈے لوکاں نُوں یعنی اپنے غلاماں، ہاں، نبیاں، مُقدس لوکاں تے تیرے ناں توں ڈرن والیاں نُوں انعام دَویں گا تے زمین نُوں تباہ کرن والے لوکاں نُوں تباہ کریں گا۔“
19 اسمان چ خدا دی ہیکل* نُوں کھولیا گیا تے اوہدے چ خدا دے عہد دا صندوق نظر آیا۔ نالے بجلی چمکن لگ پئی، آوازاں تے گرجاں سُنائی دِتیاں، اِک زلزلہ آیا تے بوہت سارے اولے پئے۔