رومیوں دے ناں خط

4 فیر اَسی اپنے باپ ابراہام بارے کیہہ کہہ سکنے آں، اوہنوں کیہہ ملیا؟ 2 جے ابراہام نُوں اوہدے کماں دی وجہ توں نیک ٹھہرایا جاندا تے اوہ ایس گل تے شیخی مار سکدا سی۔ پر اوہدے کول خدا سامنے شیخی مارن دی کوئی وجہ نئیں سی۔ 3 یاد رکھو کہ پاک‌کلام چ کہیا گیا اے:‏ ”‏ابراہام نے یہوواہ*‏ تے ایمان رکھیا جدی وجہ توں اوہنوں نیک ٹھہرایا*‏ گیا۔“‏ 4 مثال لئی، مزدور نُوں اوہدی مزدوری دے کے اوہدے تے احسان*‏ نئیں کیتا جاندا سگوں ایہہ تے اوہدا حق ہوندا اے۔ 5 پر فرض کرو کہ اِک بندہ اپنے کماں تے بھروسا کرن*‏ دی بجائے خدا تے ایمان رکھدا اے۔ اوہ بندہ خدا دی نظر چ نیک اے کیونکہ خدا اوہناں گُناہ‌گاراں نُوں نیک ٹھہراندا اے جیہڑے ایمان لیاندے نیں۔ 6 داؤد نے وی دَسیا کہ اوہ بندہ خوش اے جیہڑا خدا دی نظر چ نیک اے بھانویں کہ اوہدے سارے کم شریعت دے مطابق نئیں ہوندے۔ اوہنے کہیا:‏ 7 ‏”‏خوش نیں اوہ لوک جنہاں دِیاں غلطیاں معاف کیتیاں گئیاں تے جنہاں دے گُناہ بخش*‏ دِتے گئے۔ 8 خوش اے اوہ بندہ جدے گُناہواں دا حساب یہوواہ نئیں رکھدا۔“‏

9 فیر کیہہ ایہہ خوشی صرف اوس بندے نُوں مِلدی اے جدا ختنہ ہویا اے یاں اوہنوں وی مِلدی اے جدا ختنہ نئیں ہویا؟ اَسی پہلاں ای کہہ چُکے آں کہ ”‏ابراہام نُوں اوہدے ایمان دی وجہ توں نیک ٹھہرایا*‏ گیا۔“‏ 10 پر اوہنوں کدوں نیک ٹھہرایا گیا؟ جدوں اوہدا ختنہ ہو گیا سی؟ نئیں سگوں اوہنوں اوہدوں نیک ٹھہرایا گیا جدوں اوہدا ختنہ حالے نئیں ہویا سی۔ 11 پر بعد چ خدا نے ابراہام نُوں ختنہ کران لئی کہیا۔ ایہہ ایس گل دی نشانی*‏ سی کہ اوہنوں اوس ایمان دی وجہ توں نیک ٹھہرایا گیا جیہڑا اوہ ختنہ کران توں پہلاں رکھدا سی۔ ایس طرحاں اوہ اوہناں سارے لوکاں دا باپ بنیا جیہڑے ختنہ کرائے بغیر ایمان رکھدے نیں تاکہ اوہناں نُوں وی نیک ٹھہرایا جا سکے۔ 12 نالے ابراہام اوہناں لوکاں دا وی باپ بنیا جیہڑے ختنے دی رویت تے چلدے نیں۔ پر اوہ صرف اوہناں دا ای باپ نئیں اے۔ اوہ اوہناں لوکاں دا وی باپ اے جیہڑے اوہدے وانگوں ایمان دی راہ تے چلدے نیں یعنی اوہ ایہو جیہا ایمان رکھدے نیں جیہڑا ابراہام ختنہ کران توں پہلاں رکھدا سی۔‏

13 خدا نے ابراہام نال وعدہ کیتا سی کہ اوہ زمین دا وارث ہوئے گا۔ پر ابراہام تے اوہدی اولاد نال ایہہ وعدہ شریعت تے چلن دی وجہ توں نئیں سگوں ایس لئی کیتا گیا کیونکہ ابراہام نے ایمان ظاہر کیتا جدی وجہ توں اوہنوں نیک ٹھہرایا گیا۔ 14 جے لوکاں نُوں وراثت شریعت تے چلن دی وجہ توں مِلدی تے فیر ایمان دا کوئی فائدہ نہ ہوندا تے ابراہام نال کیتا گیا وعدہ جھوٹھا ہوندا۔ 15 اصل چ شریعت دے خلاف جان دی وجہ توں خدا وَلّوں سزا مِلدی اے۔‏*‏ پر جے شریعت ہووے ای نہ تے فیر اوہدے خلاف جان دا سوال ای پیدا نئیں ہوندا۔‏

16 ایس لئی ایمان رکھن دی وجہ توں خدا ساڈے تے عظیم رحمت کرے گا تے سانوں ایہہ وراثت دَوے گا۔ اوہ ابراہام نال کیتا گیا وعدہ اوہدی ساری اولاد لئی پورا کرے گا یعنی اوہناں لئی وی جیہڑے شریعت تے چلدے نیں تے اوہناں لئی وی جیہڑے ابراہام ورگا ایمان رکھدے نیں جیہڑا ساڈے ساریاں دا باپ اے۔ 17 ‏(‏جیویں کہ پاک کلام چ لکھیا اے:‏ ”‏مَیں تینوں بوہت ساریاں قوماں دا باپ ٹھہرایا اے۔“‏)‏ ابراہام نے خدا تے ایمان ظاہر کیتا جیہڑا مُردیاں نُوں زندہ کردا اے تے جیہڑے کم حالے نئیں ہوئے، اوہناں بارے اِنج گل کردا اے جیویں کہ اوہ ہو گئے نیں۔ 18 بھانویں کہ ابراہام دے باپ بنن دی کوئی امید نظر نئیں آ رہی سی پر فیر وی اوہنوں امید سی کہ اوہ بوہت ساریاں قوماں دا باپ بنے گا کیونکہ اوہ خدا دی ایس گل تے ایمان رکھدا سی کہ ”‏تیری نسل بے‌شمار ہوئے گی۔“‏ 19 اوہدا ایمان کمزور نئیں سی پر اوہنوں لگدا سی کہ اوہدا جسم اِک لحاظ نال مُردہ اے (‏کیونکہ اوہ تقریباً 100 سال دا ہو گیا سی)‏۔ اوہنوں ایہہ وی پتہ سی کہ سارہ وی بچے پیدا نئیں کر سکدی۔‏*‏ 20 پر خدا دے وعدے دی وجہ توں ابراہام نے شک نئیں کیتا تے نہ ای اوہدا ایمان کمزور پیا سگوں اوہدے ایمان توں اوہنوں طاقت ملی تے اوہنے خدا دی وڈیائی کیتی۔ 21 اوہنوں پکا یقین سی کہ خدا اپنا وعدہ پورا کر سکدا اے۔ 22 ایسے لئی ”‏اوہنوں نیک ٹھہرایا*‏ گیا۔“‏

23 پر ایہہ گل کہ ”‏اوہنوں نیک ٹھہرایا گیا“‏ صرف ابراہام بارے ای نئیں لکھی گئی سی 24 سگوں ساڈے بارے وی لکھی گئی سی۔ سانوں وی نیک ٹھہرایا جائے گا کیونکہ اَسی خدا تے ایمان رکھنے آں جنہے ساڈے مالک یسوع نُوں مُردیاں چوں زندہ کیتا۔ 25 یسوع نُوں ساڈے گُناہواں دی خاطر موت دے حوالے کیتا گیا تے فیر زندہ کیتا گیا تاکہ سانوں نیک ٹھہرایا جائے۔‏