یوحنا دی اِنجیل
14 یسوع نے کہیا: ”تُسی پریشان نہ ہووو۔ خدا تے ایمان ظاہر کرو۔ نالے میرے تے وی ایمان ظاہر کرو۔ 2 میرے باپ دے گھر چ رہن لئی بوہت جگہ اے۔ جے نہ ہوندی تے مَیں توانوں دَس دیندا۔ پر ہُن مَیں تواڈے لئی جگہ تیار کرن جا رہیا واں۔ 3 نالے جدوں مَیں جاکے جگہ تیار کر لواں گا تے مَیں فیر آواں گا تے توانوں اپنے نال اپنے گھر لے جاواں گا تاکہ جِتھے مَیں آں اوتھے تُسی وی ہووو۔ 4 جِتھے مَیں جا رہیا واں، توانوں اوہدی راہ پتہ اے۔“
5 توما نے اوہنوں کہیا: ”مالک، سانوں تے ایہہ ای نئیں پتہ کہ تُوں کتھے جا رہیا ایں تے فیر راہ کیویں پتہ ہو سکدی اے؟“
6 یسوع نے اوہنوں کہیا: ”راہ، سچائی تے زندگی مَیں آں۔ اِک انسان صرف میرے ای ذریعے باپ کول جا سکدا اے۔ 7 جے تُسی مینوں جان دے تے میرے باپ نُوں وی جان دے۔ ہُن تُسی اوہنوں جان گئے او تے اوہنوں ویکھ لیا اے۔“
8 فِلپّس نے اوہنوں کہیا: ”مالک، سانوں وکھا کہ باپ کیہو جیہا اے۔ ساڈے لئی ایہہ ای کافی اے۔“
9 یسوع نے اوہنوں کہیا: ”مَیں ایناں چِر تواڈے نال رہیا واں تے فِلپّس، تُوں حالے وی مینوں نئیں جان دا؟ جنہے مینوں ویکھیا اے، اوہنے باپ نُوں وی ویکھیا اے۔ فیر تُوں کیوں کہنا ایں کہ ”سانوں وکھا کہ باپ کیہو جیہا اے؟“ 10 کیہہ تینوں یقین نئیں کہ مَیں باپ نال اِک مُٹھ آں تے باپ میرے نال اِک مُٹھ اے؟ جیہڑیاں وی گلاں مَیں توانوں کہنا واں، اوہ اپنے وَلّوں نئیں کہندا سگوں باپ جیہڑا میرے نال اِک مُٹھ اے، اوہ میرے ذریعے اپنے کم کردا اے۔ 11 میرا یقین کرو کہ مَیں باپ نال اِک مُٹھ آں تے باپ میرے نال اِک مُٹھ اے، نئیں تے میرے کماں دی وجہ توں میرا یقین کرو۔ 12 مَیں توانوں سچ کہنا واں کہ جیہڑا میرے تے ایمان ظاہر کردا اے، اوہ وی اوہی کم کرے گا جیہڑے مَیں کرنا واں سگوں اوہ ایہناں توں وی وڈے کم کرے گا کیونکہ مَیں تے باپ کول جا رہیا واں۔ 13 میرے ناں توں تُسی جو کجھ وی منگو گے، اوہ مَیں توانوں دَواں گا تاکہ پُتر دے ذریعے باپ دی وڈیائی ہووے۔ 14 تُسی میرے ناں توں جو کجھ وی منگو گے، اوہ مَیں توانوں دَواں گا۔
15 جے تُسی مینوں پیار کردے او تے تُسی میرے حکماں تے عمل کرو گے۔ 16 تے مَیں اپنے باپ نُوں درخاست کراں گا تے اوہ تواڈے لئی اِک ہور مددگار* گھلے گا جیہڑا ہمیشاں تواڈے نال رہوے گا 17 یعنی سچائی دی روح جنہوں دُنیا حاصل نئیں کر سکدی کیونکہ اوہ نہ تے ایہنوں ویکھ سکدی اے تے نہ ای ایہنوں جان دی اے۔ پر تُسی ایہنوں جان دے او کیونکہ ایہہ تواڈے نال رہندی اے تے تواڈے اندر وَسدی اے۔ 18 مَیں توانوں بےآسرا* نئیں چھڈاں گا۔ مَیں تواڈے کول آواں گا۔ 19 ہور تھوڑی دیر بعد دُنیا مینوں نئیں ویکھے گی۔ پر تُسی مینوں ویکھو گے کیونکہ مَیں زندہ واں تے تُسی وی زندگی پاؤ گے۔ 20 اوس دن تُسی سمجھ جاؤ گے کہ مَیں باپ نال اِک مُٹھ آں تے تُسی میرے نال تے مَیں تواڈے نال اِک مُٹھ آں۔ 21 جیہڑا میرے حکماں نُوں قبول کردا اے تے اوہناں تے عمل کردا اے، اوہ مینوں پیار کردا اے تے جیہڑا مینوں پیار کردا اے، اوہنوں میرا باپ وی پیار کرے گا تے مَیں وی اوہنوں پیار کراں گا تے اوہنوں اپنے بارے صاف صاف دَساں گا۔“
22 یہوداہ (ایہہ یہوداہ اِسکریوتی نئیں سی) نے کہیا: ”مالک، ایہدی کیہہ وجہ اے کہ تُوں سانوں تے اپنے بارے صاف صاف دَسنا چاہنا ایں پر دُنیا نُوں نئیں دَسنا چاہندا؟“
23 یسوع نے اوہنوں جواب دِتا: ”جیہڑا بندہ مینوں پیار کردا اے، اوہ میریاں گلاں تے عمل کرے گا تے میرا باپ اوہنوں پیار کرے گا تے اَسی اوہدے کول آواں گے تے اوہدے نال رہواں گے۔ 24 جیہڑا مینوں پیار نئیں کردا، اوہ میریاں گلاں تے عمل نئیں کردا۔ جیہڑیاں گلاں مَیں توانوں دَس رہیا واں، اوہ میریاں نئیں سگوں میرے باپ دِیاں نیں جنہے مینوں گھلیا اے۔
25 مَیں ایہہ گلاں توانوں ایس لئی دَس رہیا واں کیونکہ مَیں حالے تواڈے نال آں۔ 26 پر میرا باپ میرے ناں تے تواڈے لئی اِک مددگار یعنی پاک روح گھلے گا۔ پاک روح توانوں اوہ ساریاں گلاں سکھائے گی تے یاد دَوائے گی جیہڑیاں مَیں توانوں دَسیاں نیں۔ 27 مَیں توانوں اپنا اِطمینان دے رہیا واں۔ میرے جان دے بعد وی ایہہ تواڈے نال رہوے گا۔ دُنیا توانوں ایہہ اِطمینان نئیں دے سکدی۔ تُسی پریشان نہ ہووو تے ڈر دی وجہ توں نہ گھبراؤ۔ 28 مَیں توانوں کہیا سی کہ ”مَیں جا رہیا واں تے فیر تواڈے کول واپس آواں گا۔“ جے تُسی مینوں پیار کردے او تے خوش ہووو کہ مَیں باپ کول جا رہیا واں کیونکہ باپ میرے توں وڈا اے۔ 29 مَیں ایہناں گلاں دے ہون توں پہلاں ای توانوں ایہناں بارے دَس دِتا اے تاکہ جدوں ایہہ ہون تے تُسی میرا یقین کرو۔ 30 مَیں ایہدے بعد تواڈے نال ہور گلاں نئیں کراں گا کیونکہ دُنیا دا حاکم آ رہیا اے تے اوہدا میرے تے کوئی وَس نئیں چلدا 31 سگوں مَیں اوہی کرنا واں جو باپ نے مینوں حکم دِتا اے تاکہ دُنیا جان لوے کہ مَیں باپ نُوں پیار کرنا واں۔ چلو اُٹھو، ایتھوں چلئے۔“