تھسلُنیکیوں دے ناں پہلا خط
5 بھراوو، جتھوں تک خدا دے ٹھہرائے ہوئے وقتاں تے دِناں دی گل اے، سانوں ایہدے بارے توانوں کجھ لکھن دی لوڑ نئیں 2 کیونکہ تُسی آپ چنگی طرحاں جان دے او کہ یہوواہ دا دن اونویں ای آئے گا جیویں رات نُوں چور آندا اے۔ 3 جدوں لوک کہہ رہے ہون گے کہ ”امن تے سلامتی قائم ہو گئی اے!“ تے اوسے ویلے اچانک اوہناں تے تباہی آئے گی جیویں اِک حاملہ عورت نُوں بچے دی پیدائش ویلے اچانک درداں لگدیاں نیں۔ اوہ لوک کسے وی طرحاں بچ نئیں سکن گے۔ 4 پر بھراوو، تُسی نھیرے چ* نئیں او کہ اوہ دن اچانک تواڈے تے آ پووے جیویں دن دی روشنی چور تے اچانک آ پیندی اے 5 کیونکہ تُسی سارے دن تے روشنی دے پُتر او۔ اَسی رات تے نھیرے دے پُتر نئیں آں۔
6 ایس لئی آؤ اَسی باقی لوکاں وانگوں سُتے نہ رہیے سگوں جاگدے رہیے تے ہوش قائم رکھئے 7 کیونکہ سون والے رات نُوں سوندے نیں تے شرابی رات نُوں نشے چ ٹُن ہوندے نیں۔ 8 پر اَسی دن دے پُتر آں۔ ایس لئی آؤ، اَسی ہوش قائم رکھئے تے ایمان تے محبت دا سینہبند تے نجات دی امید دا ہیلمٹ پائیے 9 کیونکہ خدا نے سانوں ایس لئی نئیں چُنیا کہ سانوں سزا دَوے* سگوں ایس لئی چُنیا اے کہ اَسی اپنے مالک یسوع مسیح دے ذریعے نجات پائیے۔ 10 یسوع نے ساڈی خاطر اپنی جان دِتی تاکہ اَسی اوہدے نال رہیے، فیر بھانویں اَسی جاگدے ہوئیے یاں سوں جائیے۔* 11 ایس لئی اِک دُوجے نُوں تسلی دیندے رہوو تے اِک دُوجے دا حوصلہ ودھاندے رہوو جیویں کہ تُسی کر وی رہے او۔
12 بھراوو، مَیں تواڈے کولوں درخاست کرنا واں کہ اوہناں دی عزت کرو جیہڑے تواڈے وچ سخت محنت کردے نیں تے مالک دی خدمت چ تواڈی پیشوائی کردے نیں تے توانوں نصیحت کردے نیں۔ 13 تُسی اوہناں دی محنت لئی دِلوں قدر وکھاؤ تے اوہناں لئی محبت ظاہر کرو۔ نالے اِک دُوجے نال صلح قائم رکھو۔ 14 بھراوو، اَسی توانوں ایہہ تاکید وی کرنے آں کہ اپنی منمرضی کرن والے لوکاں نُوں خبردار کرو، بےحوصلہ لوکاں نُوں تسلی دَوو، کمزوراں* نُوں سہارا دَوو تے ساریاں نال صبر نال پیش آؤ۔ 15 تواڈے چوں کوئی وی کسے نال بُرائی دے بدلے بُرائی نہ کرے سگوں تُسی ہمیشاں اِک دُوجے نال تے باقی سارے لوکاں نال بھلائی کردے رہوو۔
16 ہمیشاں خوش رہوو۔ 17 ہر ویلے دُعا کرو۔ 18 ہر چیز لئی خدا دا شکر کرو کیونکہ مسیح یسوع دے شاگرد ہون دی وجہ توں خدا تواڈے کولوں ایہی چاہندا اے۔ 19 پاک روح دے کم چ رُکاوٹ نہ بنو۔* 20 پیشینگوئیاں دی بےقدری نہ کرو۔ 21 ساریاں گلاں نُوں پَرکھو تے جیہڑیاں چنگیاں نیں، اوہناں تے قائم رہوو۔* 22 ہر طرحاں دی بُرائی توں دُور رہوو۔
23 بھراوو، دُعا اے کہ خدا جیہڑا اِطمینان دا چشمہ اے، توانوں پوری طرحاں پاک کرے۔ نالے اوہ تواڈے دل، جان تے جسم نُوں ساڈے مالک یسوع مسیح دی موجودگی دے دوران ہر لحاظ نال بےعیب تے بےاِلزام رکھے۔ 24 خدا جیہڑا توانوں بلا رہیا اے، اِنج ضرور کرے گا کیونکہ اوہ وفادار اے۔
25 بھراوو، ساڈے لئی دُعا کردے رہوو۔
26 سارے بھراواں نُوں گلے مِل کے* سلام کرو۔
27 مَیں مالک دے ناں تے توانوں ایہہ خاص ذمےداری دینا واں کہ ایہہ خط سارے بھین بھراواں دے سامنے پڑھیا جائے۔
28 دُعا اے کہ ساڈے مالک یسوع مسیح دی عظیم رحمت تواڈے تے ہووے۔