تیمُتھیُس دے ناں پہلا خط

2 سب توں پہلاں مَیں توانوں نصیحت کرنا واں کہ خدا دے حضور ہر طرحاں دے لوکاں لئی اِلتجاواں، دُعاواں، درخاستاں تے شکرگزاری کرو۔ 2 بادشاہواں تے اُچا عہدہ رکھن والیاں لئی وی دُعا کرو تاکہ اَسی آرام سکون نال زندگی گزار سکئے، پورے دل نال خدا دی بندگی کر سکئے تے ہر معاملے چ سوچ سمجھ کے*‏ فیصلے کر سکئے۔ 3 ساڈا نجات دین والا خدا ایس گلوں خوش ہوندا اے تے اوہ چاہندا اے کہ اَسی ایہناں ساریاں لئی دُعا کریئے۔ 4 اوہدی خواہش اے کہ ہر طرحاں دے لوکاں نُوں نجات ملے تے اوہ سچائی بارے صحی علم حاصل کرن 5 کیونکہ اِک ای خدا اے تے خدا تے انساناں چ وِچولا*‏ وی اِک ای آدمی اے یعنی مسیح یسوع۔ 6 اوہنے اپنی جان دے کے سارے*‏ لوکاں لئی پورا فدیہ*‏ دِتا تاکہ اوہ گُناہ توں رِہا ہو سکن۔ ایہناں گلاں دی گواہی طے کیتے ہوئے ویلے تے دِتی جائے گی۔ 7 ایہی گواہی دین لئی مینوں مُناد تے رسول چُنیا گیا اے تاکہ مَیں قوماں نُوں ایمان تے سچائی بارے تلیم دَواں۔ مَیں سچ کہہ رہیا واں، جھوٹھ نئیں بول رہیا۔‏

8 ایس لئی مَیں چاہنا واں کہ جدوں وی*‏ تُسی جمع ہووو تے آدمی صاف‌دل نال ہتھ چُک کے دُعا کرن تے غصہ تے بحث نہ کرن۔ 9 ایسے طرحاں عورتاں نُوں وی مناسب تے حیادار کپڑے پانے چاہی دے نیں تے اپنے آپ نُوں سمجھداری نال سنوارنا چاہی دا اے۔ اوہ عجیب طریقے نال میڈیاں بنا کے،‏*‏ سونے تے موتیاں دے زیور یاں مہنگے مہنگے کپڑے پا کے دُوجیاں دا دھیان اپنے وَل نہ کِھچن 10 سگوں اوہناں دے نیک کماں توں ساریاں نُوں نظر آنا چاہی دا اے کہ اوہ واقعی خدا دی بندگی کردیاں نیں۔‏

11 جدوں تلیم دِتی جاندی اے اوہدوں عورتاں نُوں خاموشی تے تابع‌داری نال سکھنا چاہی دا اے۔ 12 مَیں کسے عورت نُوں ایہہ اجازت نئیں دیندا کہ اوہ تلیم دَوے یاں کسے آدمی تے اِختیار رکھے سگوں اوہ خاموش رہوے 13 کیونکہ پہلے آدم نُوں بنایا گیا سی تے بعد چ حوّا نُوں۔ 14 نالے آدم دھوکھے چ نئیں آیا سی سگوں حوّا پوری طرحاں دھوکھے چ آئی تے گُناہ‌گار بن گئی۔ 15 پر اِک عورت ماں ہون دی وجہ توں*‏ فضول کماں چ پین توں بچ سکدی اے۔ پر ضروری اے کہ اوہ ایمان، محبت، پاکیزگی تے سمجھداری نال زندگی گزاردی رہوے۔‏