متی دی اِنجیل
15 فیر یروشلیم توں فریسی تے شریعت دے عالم آ کے یسوع نُوں کہن لگ پئے: 2 ”تیرے چیلے ساڈے پیو دادے دِیاں رویتاں نُوں کیوں توڑدے نیں؟ مثال لئی، اوہ کھانا کھان توں پہلاں ہتھ نئیں دھوندے۔“*
3 اوہنے اوہناں نُوں جواب دِتا: ”پہلے تُسی دَسو کہ تُسی اپنیاں رویتاں دی خاطر خدا دے حکماں نُوں کیوں توڑدے او؟ 4 مثال لئی، خدا نے کہیا اے کہ ”تُوں اپنے ماں پیو دی عزت کرِیں“ تے ”جیہڑا اپنے ماں یاں پیو دی بےعزتی کردا اے، اوہنوں جانوں مار دِتا جائے۔“ 5 پر تُسی کہندے او کہ ”جیہڑا بندہ اپنے ماں یاں پیو نُوں کہندا اے: ”جنہاں چیزاں توں توانوں فائدہ ہوسکدا سی، اوہ مَیں خدا دے ناں کر دِتیاں نیں،“ 6 اوہنوں اپنے ماں پیو دی عزت کرن دی کوئی لوڑ نئیں۔“ اِنج تُسی اپنیاں رویتاں دی خاطر خدا دے کلام نُوں ردّ کر دِتا اے۔ 7 اَے پاکھنڈیو، یسعیاہ نبی نے تواڈے بارے پیشینگوئی کردے ہوئیاں بالکل ٹھیک کہیا سی 8 ”ایہہ لوک موُنہوں تے میری عزت کردے نیں پر ایہناں دے دل میرے توں بوہت دُور نیں۔ 9 اوہ فضول میری عبادت کردے نیں کیونکہ اوہ میرے حکماں دی بجائے انساناں دِیاں رویتاں دی تلیم دیندے نیں۔““ 10 فیر یسوع نے لوکاں نُوں اپنے کول بلا کے کہیا: ”میری گل سُنو تے ایہدا مطلب سمجھو: 11 انسان دے مُونہہ چ جو کجھ جاندا اے، اوہدے نال اوہ ناپاک نئیں ہوندا سگوں اوہدے موُنہوں جو کجھ نکلدا اے، اوہدے نال اوہ ناپاک ہوندا اے۔“
12 فیر شاگرداں نے آ کے اوہنوں کہیا: ”تینوں پتہ اے کہ تیریاں گلاں فریسیاں نُوں بوہت چُبیاں نیں؟“ 13 اوہنے اوہناں نُوں کہیا: ”جیہڑا وی بُوٹا میرے اسمانی باپ نے نئیں لایا، اوہ پُٹیا جائے گا۔ 14 فریسیاں نُوں چھڈو۔ اوہ تے آپ اَنھے نیں، اوہ دُوجیاں نُوں کیہہ راہ وکھان گے۔ جے اِک اَنھا، اِک اَنھے نُوں راہ وکھائے گا تے دونویں ٹوئے چ ڈِگ پین گے۔“ 15 فیر پطرس نے اوہنوں کہیا: ”سانوں پہلاں اوس مثال دا مطلب سمجھا جیہڑی تُوں دِتی اے۔“ 16 یسوع نے کہیا: ”تُسی وی میری گل حالے تک نئیں سمجھے؟ 17 کیہہ توانوں نئیں پتہ کہ انسان دے مُونہہ تھانی جو وی اوہدے ٹیڈھ چ جاندا اے، اوہ بعد چ باہر نکل جاندا اے؟ 18 پر جیہڑیاں گلاں اوہدے مُونہہ تھانی باہر آندیاں نیں، اوہ اصل چ اوہدے دل چوں نکلدیاں نیں تے اوہی اوہنوں ناپاک کردیاں نیں۔ 19 مثال لئی، دل وچوں بھیڑی سوچ نکلدی اے جدا نتیجہ ہوندا اے قتل، زناکاری، حرامکاری،* چوری، جھوٹھی گواہی تے کفرُ۔ 20 ایہناں گلاں نال انسان ناپاک ہوندا اے نہ کہ ہتھ دھوئے بغیر* کھانا کھان نال۔“
21 فیر اوتھوں نکل کے یسوع صور تے صیدا دے علاقے چ چلا گیا۔ 22 تے ویکھو! اوس علاقے دی اِک فنیکی عورت آ کے اوہدے اَگے ترلے پان لگ پئی: ”مالک، داؤد دے پُتر، میرے تے رحم کر۔ میری دھی نُوں اِک باغی فرشتہ چِمبڑیا ہویا اے تے اوہدی حالت بڑی خراب اے۔“ 23 پر یسوع نے اوہنوں کوئی جواب نہ دِتا۔ ایس لئی شاگرداں نے آ کے یسوع نُوں کہیا: ”ایہہ عورت تے ساڈا کھیڑا ای نئیں چھڈدی پئی۔ ایہنوں کہہ کہ ایتھوں چلی جائے۔“ 24 یسوع نے جواب دِتا: ”مینوں صرف اِسرائیل دے گھرانے دِیاں گواچیاں ہوئیاں بھیڈاں کول گھلیا گیا اے۔“ 25 پر اوس عورت نے اوہدے اَگے گوڈے ٹیک کے مِنت کیتی تے کہیا: ”مالک، میری مدد کر۔“ 26 یسوع نے اوہنوں کہیا: ”بچیاں کولوں روٹی لے کے کتوریاں نُوں پانا صحی نئیں اے۔“ 27 عورت نے کہیا: ”مالک، تُوں صحی کہہ رہیا ایں۔ پر کتورے وی تے اپنے مالک دی میز توں ڈِگن والے ٹکڑے کھاندے نیں نا۔“ 28 یسوع نے اوہنوں کہیا: ”بیبی، تیرا ایمان بوہت مضبوط اے۔ جا، تیرے دل دی مُراد پوری ہووے۔“ تے اوسے ویلے اوہدی دھی ٹھیک ہو گئی۔
29 اوتھوں یسوع گلیل دی جھیل دے لاگے چلا گیا تے پہاڑ تے جاکے بہہ گیا۔ 30 فیر بوہت سارے لوک اوہدے کول آئے۔ اوہناں نے لنگڑیاں،لُولیاں،اَنھیاں، گُونگیاں تے بوہت سارے بیماراں نُوں لیا کے اوہدے پیراں چ پا دِتا تے اوہنے اوہناں ساریاں نُوں ٹھیک کر دِتا۔ 31 جدوں لوکاں نے ویکھیا کے گُونگے بول رہے نیں، لُولے ٹھیک ہو رہے نیں، لنگڑے ٹُر پھر رہے نیں تے اَنھے ویکھ رہے نیں تے اوہ بڑے حیران ہوئے تے اِسرائیل دے خدا دی وڈیائی کرن لگ پئے۔
32 فیر یسوع نے اپنے شاگرداں نُوں کول بلا کے کہیا: ”مینوں لوکاں تے بڑا ترس آ رہیا اے۔ اوہ تِن دِناں توں میرے نال نیں تے اوہناں نے کجھ نئیں کھادا۔ مَیں اوہناں نُوں بُھکھا نئیں گھلنا چاہندا، نئیں تے اوہ راہ چ ای بےہوش ہو جان گے۔“ 33 پر شاگرداں نے یسوع نُوں کہیا: ”ایس ویران جگہ تے اَسی اینے سارے لوکاں دا پیٹ بھرن لئی روٹیاں کتھوں لیائیے؟“ 34 یسوع نے اوہناں نُوں پچھیا: ”تواڈے کول کِنّیاں روٹیاں نیں؟“ اوہناں نے کہیا: ”سَت روٹیاں نیں تے تھوڑیاں جہیاں چھوٹیاں مچھیاں نیں۔“ 35 فیر اوہنے لوکاں نُوں زمین تے بیہن لئی کہیا 36 تے سَت روٹیاں تے مچھیاں لے کے دُعا چ خدا دا شکر کیتا تے اوہناں نُوں توڑ کے شاگرداں نُوں دِتا تے شاگرداں نے اوہناں نُوں لوکاں چ وَنڈیا۔ 37 سارے لوکاں نے رَج کے کھادا۔ فیر شاگرداں نے بچے ہوئے ٹکڑیاں نُوں جمع کیتا جنہاں نال سَت وڈے ٹوکرے بھر گئے۔ 38 کھان والیاں چ 4000 مرداں دے علاوہ عورتاں تے بچے وی شامل سن۔ 39 فیر لوکاں نُوں رُخصت کرن دے بعد اوہ کشتی چ بہہ کے مگدن دے علاقے چ آگیا۔