پطرس دا دُوجا خط
3 پیارے بھراوو، مَیں اپنے پہلے خط وانگوں ایس دُوجے خط چ وی توانوں کجھ گلاں یاد کرا کے حوصلہ دے رہیا واں کہ تُسی اپنی سوچن سمجھن دی صلاحیت نُوں چنگی طرحاں استمال کرو 2 تاکہ تُسی مُقدس نبیاں دِیاں پیشینگوئیاں تے ساڈے مالک تے نجاتدہندہ دے اوس حکم نُوں یاد رکھو جیہڑا رسولاں دے ذریعے توانوں دِتا گیا اے۔ 3 سب توں پہلے تے ایہہ جان لوو کہ آخری زمانے چ ایہو جہے لوک آن گے جیہڑے چنگیاں گلاں دا مخول اُڈان گے، اپنیاں بھیڑیاں خواہشاں مطابق چلن گے 4 تے کہن گے: ”اوہنے تے آن* دا وعدہ کیتا سی، فیر کتھے وے اوہ؟ ساڈے دادے پڑدادے آئے تے چلے گئے۔ پر اوہناں دے زمانے توں سب کجھ اونویں ای چلدا آ رہیا اے جیویں دُنیا دے شروع چ سی۔“
5 اوہ جان بجھ کے ایہہ گل بُھل جاندے نیں کہ خدا دے حکم نال پرانے زمانے توں اسمان موجود سی تے زمین پانی وچوں نکلی تے پانی وچ قائم سی 6 تے ایہدے ای ذریعے اوس زمانے چ دُنیا طوفان نال تباہ ہوئی۔ 7 پر اوسے حکم مطابق اَج جیہڑا اسمان تے زمین موجود اے، اوہنوں اَگ نال ساڑن لئی عدالت دے دن تک رکھیا گیا اے۔ اوس دن بھیڑے لوکاں نُوں تباہ کیتا جائے گا۔
8 پر پیارے بھراوو، تُسی ایہہ گل بالکل نہ بُھلو کہ یہوواہ لئی اِک دن ہزار سال دے برابر اے تے ہزار سال اِک دن دے برابر۔ 9 یہوواہ اپنا وعدہ پورا کرن چ دیر نئیں کر رہیا جیویں کہ کجھ لوک سوچدے نیں سگوں اوہ تواڈی خاطر صبر کر رہیا اے کیونکہ اوہ نئیں چاہندا کہ کوئی وی ماریا جائے۔ اصل چ اوہ چاہندا اے کہ سارے لوک توبہ کرن۔ 10 پر یہوواہ دا دن اِک چور وانگوں آئے گا۔ اوہدوں اسمان بڑے شور نال مٹ جائے گا تے اسمان تے زمین دِیاں چیزاں تیز گرمی دی وجہ توں پگھل جان گیاں تے زمین تے ایہدے تے ہون والے کم ظاہر ہو جان گے۔
11 ہُن جے ایہہ ساریاں چیزاں ایس طرحاں پگھلن والیاں نیں تے سوچو کہ توانوں کیہو جہے انسان ہونا چاہی دا اے۔ توانوں اپنا چالچلن پاک رکھنا چاہی دا اے تے خدا دی بندگی کرنی چاہی دی اے 12 تے یہوواہ دے دن دا اِنتظار کرنا چاہی دا اے تے ہمیشاں یاد رکھنا چاہی دا اے کہ ایہہ کِنّاں نیڑے وے۔ اوس دن اسمان اَگ نال ساڑ دِتا جائے گا تے اسمان تے زمین دِیاں چیزاں تیز گرمی دی وجہ توں پگھل جان گیاں۔ 13 پر خدا دے وعدے مطابق اَسی نویں اسمان تے نوِیں زمین دا اِنتظار کر رہے آں جِتھے نیکی دا راج ہوئے گا۔
14 ایس لئی پیارے بھراوو، ایہناں چیزاں دا اِنتظار کردے ہوئیاں پوری کوشش کرو کہ تُسی آخر تک خدا دِیاں نظراں چ پاک صاف، بےداغ تے صلحپسند رہوو۔ 15 نالے ساڈے مالک دے صبر نُوں نجات حاصل کرن دا موقع سمجھو جیویں کہ ساڈے پیارے بھرا پولُس نے وی خدا وَلّوں مِلن والی حکمت دے مطابق توانوں لکھیا سی۔ 16 اوہ اپنے سارے خطاں چ ایہناں گلاں بارے لکھدا اے۔ پر ایہناں چوں کجھ گلاں نُوں سمجھنا مشکل اے۔ جاہل تے کمزور ایمان والے لوک ایہناں گلاں نُوں توڑ مروڑ کے دَسدے نیں جیویں کہ اوہ پاک کلام دِیاں باقی گلاں نال وی کردے نیں تے اِنج اپنی تباہی دے آپ ذمےدار بن دے نیں۔
17 پیارے بھراوو، تُسی پہلاں توں ایہہ گلاں جان دے او۔ ایس لئی خبردار رہوو تاکہ تُسی اوہناں وانگوں بھیڑے لوکاں دِیاں جھوٹھیاں گلاں دا شکار نہ ہو جاؤ تے سِدھی راہ توں بھٹک نہ جاؤ۔ 18 ایہدی بجائے ساڈے مالک تے نجاتدہندہ یسوع مسیح بارے ہور زیادہ علم حاصل کردے جاؤ تے اِنج زندگی گزارو کہ توانوں عظیم رحمت مِلدی رہوے۔ اوہدی وڈیائی ہُن تے ہمیشاں تک ہوندی رہوے۔ آمین۔