عبرانیوں دے ناں خط
11 ایمان* دی وجہ توں اِک بندے نُوں پورا بھروسا ہوندا اے کہ اوہدی امید ضرور پوری ہوئے گی۔ نالے اوہنوں پورا یقین ہوندا اے کہ جیہڑیاں شیواں اوہ ویکھ نئیں سکدا، اوہ واقعی ہے نیں۔* 2 پرانے زمانے چ ایہو جیہا ایمان رکھن والے لوکاں* نُوں خدا نے یقین دَوایا کہ اوہ اوہناں توں خوش اے۔
3 ایمان دی وجہ توں اَسی سمجھ گئے آں کہ ساریاں چیزاں* خدا دے حکم نال بنیاں نیں۔ اَسی جیہڑیاں چیزاں ویکھ سکنے آں، اوہناں نُوں بنان لئی خدا نے اوہ چیزاں استمال کیتیاں جنہاں نُوں اَسی ویکھ نئیں سکدے۔
4 ایمان دی وجہ توں ہابل نے خدا دے سامنے قائن نالوں ودھیا قربانی چڑھائی۔ اوہدے ایمان دی وجہ توں خدا نے اوہنوں یقین دَوایا کہ اوہ اِک نیک انسان اے کیونکہ خدا نے اوہدی قربانی نُوں قبول کیتا۔ بھانویں کہ ہابل مر گیا اے پر اوہ حالے وی اپنے ایمان دے ذریعے گل کردا اے۔
5 حنوک دے ایمان دی وجہ توں اوہنوں کسے ہور جگہ پونچا دِتا* گیا تاکہ اوہنوں مردے ویلے تکلیف نہ سہنی پووے۔ اوہ غائب ہو گیا کیونکہ خدا نے اوہنوں کسے ہور جگہ پونچا دِتا سی۔ پر ایہدے توں پہلاں خدا نے حنوک نُوں یقین دَوایا کہ اوہ اوہدے توں خوش اے۔ 6 جیہڑا بندہ ایمان نئیں رکھدا، اوہ خدا نُوں کدی وی خوش نئیں کر سکدا* کیونکہ خدا دی عبادت کرن والے بندے نُوں یقین ہونا چاہی دا اے کہ خدا ہے وے تے اوہناں سارے لوکاں نُوں اَجر دیندا اے جیہڑے جی جان نال اوہدی مرضی تے چلن دی کوشش کردے نیں۔
7 ایمان دی وجہ توں نوح نے ظاہر کیتا کہ اوہ خدا دا خوف رکھدا اے تے اوہنے اپنے گھر والیاں دی جان بچان لئی کشتی بنائی کیونکہ خدا نے نوح نُوں دَس دِتا سی کہ اَگے جو کجھ ہون والا اے، اوہ انساناں نے پہلاں نئیں ویکھیا۔ نوح نے اپنے ایمان دے ذریعے ثابت کیتا کہ اوہدے زمانے دے لوک سزا دے لائق نیں۔ پر اوہنوں اوہدے ایمان دی وجہ توں نیک ٹھہرایا گیا۔
8 جدوں خدا نے ابراہام نُوں بلایا تے ایمان دی وجہ توں اوہنے اوہدا کہنا منیا تے اوس ملک وَل ٹُر پیا جیہڑا اوہنوں ورثے چ ملنا سی۔ ابراہام نُوں نئیں پتہ سی کہ اوہ کتھے جا رہیا اے۔ پر فیر وی اوہ اپنا ملک چھڈ کے چلا گیا۔ 9 ایمان دی وجہ توں اوہ اِضحاق تے یعقوب نال اوس ملک چ مسافراں وانگوں خیمیاں چ رہیا کیونکہ خدا نے ابراہام وانگوں اوہناں نال وی وعدہ کیتا سی کہ اوہ ملک اوہناں نُوں ورثے چ ملے گا۔ 10 اصل چ ابراہام اوس شہر دا اِنتظار کر رہیا سی جدیاں بنیاداں بڑیاں مضبوط نیں کیونکہ اوہدا نقشہ تیار کرن والا تے اوہنوں بنان والا خدا اے۔
11 بھانویں کہ سارہ دی بچے پیدا کرن دی عمر لنگھ گئی سی پر فیر وی اوہ اپنے ایمان دی وجہ توں حاملہ ہوئی کیونکہ اوہنوں پورا یقین سی کہ خدا وعدے دا پکا* اے۔ 12 ایسے طرحاں ابراہام وی وڈیرا سی تے بچے پیدا نئیں کر سکدا سی۔* پر فیر خدا نے اوس اِک آدمی نُوں اینی اولاد دِتی کہ اوہ اسمان دے تاریاں تے سمندر دی ریت وانگوں بےشمار ہو گئی۔
13 ایہہ سارے لوک مردے دم تک اپنے ایمان تے قائم رہے۔ بھانویں کہ اوہناں نال کیتے گئے وعدے اوہناں دے جیوندے جی پورے نئیں ہوئے سن پر فیر وی اوہ خوش سن کیونکہ اوہناں نے ایمان دِیاں اَکھاں نال ویکھ لیا کہ مستقبل چ ایہہ وعدے ضرور پورے ہون گے تے اوہناں نے ساریاں سامنے اعلان کیتا کہ اوہ ملک چ پردیسی تے مسافر نیں۔ 14 ایس گل دا اعلان کرن والے لوک ظاہر کردے نیں کہ اوہ اپنی اِک جگہ حاصل کرن دی جی جان نال کوشش کر رہے نیں۔ 15 پر جے اوہ اوس جگہ بارے سوچدے رہندے جتھوں اوہ آئے سن تے اوہ واپس جان دی کوئی نہ کوئی وجہ لبھ لیندے۔ 16 پر ایہو جہے لوک بہتر جگہ حاصل کرن دی کوشش کر رہے نیں جدا تعلق اسمان نال اے۔ ایس لئی خدا نُوں اوہناں دا خدا ہون تے کوئی شرمندگی نئیں اے کیونکہ اوہنے اپنے بندیاں لئی اِک شہر تیار کیتا اے۔
17 جدوں ابراہام نُوں پَرکھیا گیا تے ایمان دی وجہ توں اوہنے اپنے وَلّوں اِضحاق نُوں قربان کر ای دِتا سی۔ ابراہام نے خوشی خوشی وعدیاں تے یقین کیتا تے اپنے اکلوتے پُتر نُوں قربان کرن لئی تیار ہو گیا 18 بھانویں کہ اوہنوں کہیا گیا سی کہ ”اوہناں لوکاں نُوں تیری نسل کہیا جائے گا جیہڑے اِضحاق توں پیدا ہون گے۔“ 19 پر ابراہام نُوں ایس گل تے یقین سی کہ خدا اوہدے پُتر نُوں مُردیاں چوں زندہ کر سکدا اے تے اِک لحاظ نال اوہدا پُتر مُردیاں چوں زندہ ہویا وی۔ ایہہ آن والیاں چیزاں دی اِک مثال سی۔
20 ایمان دی وجہ توں اِضحاق نے یعقوب تے عیسُو نُوں برکت دیندے ویلے دَسیا کہ مستقبل چ کیہہ ہوئے گا۔
21 ایمان دی وجہ توں یعقوب نے اوہدوں یوسف دے پُتراں نُوں برکت دِتی جدوں اوہ مرن والا سی تے اوس ویلے اوہنے اپنی لاٹھی دا سہارا لے کے خدا اَگے سجدہ وی کیتا۔
22 ایمان دی وجہ توں یوسف نے اپنی موت توں کجھ دیر پہلاں دَسیا کہ اِسرائیل دے پُتر مصر چوں نکل جان گے۔ نالے اوہنے ہدیت* دِتی کہ اوہدیاں ہڈیاں نال کیہہ کیتا جائے۔*
23 جدوں موسیٰ پیدا ہویا تے اوہدے ماں پیو نے ایمان دی وجہ توں اوہنوں تِن مہینے تک چھپا کے رکھیا کیونکہ اوہناں نے ویکھیا کہ اوہ بچہ سوہنا اے تے اوہ بادشاہ دا حکم توڑن توں نئیں ڈرے۔ 24 جدوں موسیٰ وڈا ہویا تے ایمان دی وجہ توں اوہ نئیں چاہندا سی کہ اوہنوں مصر دے بادشاہ* دی دِھی دا پُتر کہیا جائے۔ 25 اوہنے تھوڑی دیر لئی گُناہ دا مزہ لین دی بجائے خدا دے بندیاں نال ظلم سہن دا فیصلہ کیتا۔ 26 اوہدی نظر چ خدا دے چُنے ہوئے خادم* دے طور تے بےعزتی سہنا مصر دے سارے خزانیاں نالوں زیادہ قیمتی سی کیونکہ اوہدا پورا دھیان اَجر پان تے سی۔ 27 ایمان دی وجہ توں اوہ بادشاہ دے غصے توں نئیں ڈریا سگوں مصر چھڈ کے چلا گیا۔ اوہ اپنے ایمان تے اِنج قائم رہیا جیویں کہ اوہ خدا نُوں ویکھ سکدا اے بھانویں کہ انسان خدا نُوں ویکھ نئیں سکدے۔ 28 ایمان دی وجہ توں اوہنے فسح دی عید منائی تے دروازیاں دے آلے دَوالے* خون چھڑکیا تاکہ تباہ کرن والا فرشتہ اوہناں دے پہلوٹھے بچیاں نُوں مار نہ دَوے۔
29 ایمان دی وجہ توں اِسرائیلی بحرِقلزم* چوں اِنج لنگھے جیویں کہ اوہ سُکی زمین تے چل رہے ہون۔ پر جدوں مصریاں نے لنگھن دی کوشش کیتی تے اوہ ڈُب کے مر گئے۔
30 ایمان دی وجہ توں اِسرائیلیاں نے سَت دِناں تک شہر یریحو دی دیوار دے آلے دَوالے چکر لائے تے فیر دیواراں ڈِگ پئیاں۔ 31 ایمان دی وجہ توں راحب ناں دی طوائف نافرمان لوکاں نال نئیں ماری گئی کیونکہ اوہنے جاسوساں نُوں اپنے گھر ٹھہرایا تے اوہناں دی مدد کیتی۔
32 مَیں ہور کِنہاں کِنہاں بارے دَساں؟ ایناں وقت نئیں کہ مَیں جدعون، برق، سمسون، اِفتاح، داؤد، سموئیل تے دُوجے نبیاں بارے دَساں۔ 33 ایمان دی وجہ توں ایہناں لوکاں نے بادشاہواں نُوں ہرایا، ایہناں نے نیکی دی مثال قائم کیتی، ایہناں نال وعدے کیتے گئے، ایہناں نے شیراں دے مُونہہ بند کیتے، 34 اَگ دے شعلے ٹھنڈے کیتے، تلوار دے وار توں بچے، کمزور حالت چ طاقتور بنے، دلیری نال جنگ لڑی تے دُشمناں دِیاں فوجاں نُوں بھجا دِتا۔ 35 کجھ عورتاں دے رشتےداراں نُوں مُردیاں چوں زندہ کیتا گیا۔ پر کجھ آدمیاں نُوں تڑفا تڑفا کے ماریا گیا کیونکہ اوہ اپنی جان بچان لئی اپنے ایمان توں نئیں پھرے۔ اوہ چاہندے سن کہ اوہناں نُوں مُردیاں چوں زندہ ہون دے بعد بہتر زندگی ملے۔ 36 کجھ دا ایمان اوہدوں پَرکھیا گیا جدوں اوہناں دا مذاق اُڈایا گیا تے کوڑے مارے گئے، ایتھوں تک کہ کجھ نُوں زنجیراں نال بنھیا گیا تے قید کیتا گیا۔ 37 کئیاں نُوں پتھر مارے گئے، کئیاں نُوں اَزمایا گیا، کئیاں نُوں آری نال چیریا گیا، کئیاں نُوں تلوار نال قتل کیتا گیا، کئی بھیڈاں تے بکریاں دِیاں کھلاں پا کے پھرے، کئیاں نے تنگی، مصیبتاں تے ظلم برداشت کیتا۔ 38 ایہہ دُنیا اوہناں دے لائق نئیں سی۔ اوہناں نُوں پہاڑاں تے ریگستاناں چ رہنا پیا تے غاراں تے چٹاناں چ لُکنا پیا۔
39 بھانویں کہ اوہناں دے ایمان دی وجہ توں خدا نے اوہناں نُوں یقین دَوایا سی کہ اوہ اوہناں توں خوش اے پر فیر وی اوہناں نال کیتے گئے وعدے اوہناں دے جیوندے جی پورے نئیں ہوئے 40 کیونکہ خدا نے سانوں بہتر انعام دین دا ارادہ کیتا ہویا سی تاکہ اوہناں نُوں ساڈے توں پہلاں گُناہ توں پاک نہ کیتا جائے۔