یوحنا نُوں مِلن والا مُکاشفہ
21 فیر مَیں نواں اسمان تے نوِیں زمین ویکھی کیونکہ پرانا اسمان تے پرانی زمین ختم ہو گئے سن تے سمندر وی نہ رہیا۔ 2 مَیں مُقدس شہر یعنی نویں یروشلم نُوں اسمان توں خدا کولوں تھلے آندے ویکھیا۔ اوہنوں دُلہن وانگوں تیار کیتا گیا سی جیہڑی اپنے دُلہے لئی سجی ہوئے۔ 3 فیر مَیں تخت کولوں کسے نُوں اُچی آواز چ ایہہ کہندے سُنیا: ”ویکھو! خدا نے انساناں دے وچکار خیمہ لایا اے تے ہُن اوہ اوہناں دے نال رہوے گا۔ اوہ اوہدے بندے ہون گے تے خدا آپ اوہناں دے نال ہوئے گا۔ 4 خدا اوہناں دِیاں اَکھاں دے ہر آنسو نُوں پونجھ دَوے گا تے نہ موت رہوے گی، نہ ماتم، نہ رونا، نہ درد۔ تکلیف دین والی ہر چیز* ختم ہو گئی اے۔“
5 فیر تخت تے بیٹھے خدا نے کہیا: ”ویکھو! مَیں سب کجھ نواں بنا رہیا واں۔“ اوہنے ایہہ وی کہیا: ”ایہہ گلاں لکھ لے کیونکہ ایہہ بھروسے دے لائق تے سچیاں نیں۔“ 6 فیر اوہنے مینوں کہیا: ”ایہہ گلاں پوریاں ہو گئیاں نیں۔ مَیں الفا تے اومیگا واں۔* ہاں، مَیں ای شروع تے آخر آں۔ جیہڑا پیاسا اے، اوہنوں مَیں زندگی دے چشمے دا پانی تحفے* چ دَواں گا۔ 7 جیہڑا دُنیا تے فتح پائے گا، اوہنوں ایہہ سب کجھ ورثے چ ملے گا۔ اوہ میرا پُتر ہوئے گا تے مَیں اوہدا خدا ہوواں گا۔ 8 پر جیہڑے لوک ڈرپوک نیں، خدا تے ایمان نئیں رکھدے، بھیڑے تے گھٹیا کم کردے نیں، جھوٹھ بولدے نیں تے قتل، جنسیبدکاری، جادوٹونا تے بُتپرستی کردے نیں، اوہناں نُوں اَگ تے گندھک نال بلدی جھیل چ سُٹیا جائے گا۔ ایہدا اشارہ دُوجی موت* وَل اے۔“
9 جیہڑے سَت فرشتیاں کول سَت آفتاں نال بھرے ہوئے سَت کٹورے سن، اوہناں چوں اِک نے میرے کول آ کے کہیا: ”آ، میمنے دی دُلہن، ہاں اوہدی بیوی نُوں ویکھ۔“ 10 ایس لئی اوہ مینوں پاک روح دی رہنمائی چ اِک وڈے تے اُچے پہاڑ تے لے گیا تے اوہنے مینوں مُقدس شہر یروشلم وکھایا جیہڑا اسمان توں خدا دے کولوں تھلے آ رہیا سی۔ 11 اوہ شہر خدا دی شان نال بھریا ہویا سی تے اوہدی چمک اِک بوہت ای قیمتی پتھر ورگی سی یعنی اوہ صاف شفاف یشب وانگوں شاندار سی۔ 12 اوہدی دیوار بوہت ای وڈی تے اُچی سی۔ اوہدے 12 دروازے سن جنہاں تے 12 فرشتے کھلوتے ہوئے سن۔ اوہناں دروازیاں اُتے اِسرائیل دے 12 قبیلیاں دے ناں لکھے ہوئے سن۔ 13 شہر دے تِن دروازے مشرق وَل، تِن شمال وَل، تِن جنوب وَل تے تِن مغرب وَل سن۔ 14 شہر دی دیوار دی بنیاد 12 پتھر سن جنہاں تے میمنے دے 12 رسولاں دے ناں* لکھے ہوئے سن۔
15 جیہڑا فرشتہ میرے نال گل کر رہیا سی، اوہدے ہتھ چ سونے دا اِک ڈنڈا سی تاکہ اوہ شہر، اوہدے دروازے تے اوہدی دیوار نُوں ناپ سکے۔ 16 اوہ شہر چورَس سی تے اوہدی لمبائی تے چوڑائی اِکو جِنّی سی۔ جدوں اوہنے شہر نُوں ڈنڈے نال ناپیا تے اوہدی لمبائی، چوڑائی تے اُونچائی برابر سی یعنی تقریباً 2200 کلو میٹر۔ 17 فرشتے نے شہر دی دیوار نُوں وی ناپیا تے اوہ 144 ہتھ* سی۔ اوہنے ایہنوں ناپن لئی اوہی پیمانہ استمال کیتا جیہڑا انسان کردے نیں۔ 18 اوہدی دیوار یشب دے پتھر نال بنی ہوئی سی تے شہر خالص سونے دا بنیا ہویا سی۔ اوہ ویکھن چ شیشے وانگوں صاف شفاف سی۔ 19 شہر دی دیوار دی بنیاد لئی ہر طرحاں دے قیمتی پتھر استمال ہوئے سن۔ پہلی بنیاد لئی یشب، دُوجی لئی نیلم، تیجی لئی یمانی، چوتھی لئی زُمُرد، 20 پنجویں لئی سلیمانی عقیق، چھیویں لئی جگری عقیق، ستویں لئی زبرجد، اَٹھویں لئی بَرِیل، نووِیں لئی پیلا یاقوت، دسویں لئی ہرا یاقوت، یاروِیں لئی زرقون تے باروِیں لئی ارغوانی یاقوت۔ 21 نالے شہر دے 12 دروازے 12 موتی سن یعنی ہر دروازہ اِک موتی سی۔ شہر دی وڈی سڑک خالص سونے دی بنی ہوئی سی تے ویکھن چ شیشے وانگوں صاف شفاف سی۔
22 مینوں اوس شہر چ کوئی ہیکل نظر نئیں آئی کیونکہ بےحد طاقت والا خدا یہوواہ تے میمنا اوہدی ہیکل نیں۔ 23 شہر نُوں روشنی لئی سورج یاں چن دی ضرورت نئیں سی کیونکہ خدا دی شان نے اوہنوں روشنی نال بھر دِتا سی تے میمنا اوہدا چراغ سی۔ 24 قوماں اوس شہر دی روشنی چ چلن گیاں تے زمین دے بادشاہ اپنی شان اوس شہر نُوں دین گے۔* 25 اوہدے دروازے کدی وی بند نئیں ہون گے کیونکہ اوتھے کدی وی رات نئیں ہوئے گی سگوں ہمیشاں دن رہوے گا۔ 26 قوماں دی شانوشوکت اوس شہر نُوں دِتی جائے گی۔ 27 اوس شہر وچ کوئی دھوکھےباز یاں گھٹیا کم کرن والا بندہ نئیں آ سکے گا تے نہ ای ایہدے چ کوئی ناپاک چیز لیان دی اجازت ہوئے گی سگوں صرف اوہ لوک ای اندر جا سکن گے جنہاں دا ناں میمنے دی کتاب یعنی زندگی دی کتاب چ لکھیا ہویا اے۔