یوحنا دی اِنجیل

21 ایہدے بعد یسوع طبریاس دی جھیل دے کنارے فیر اپنے شاگرداں تے ظاہر ہویا۔ اوہ ایس طرحاں ظاہر ہویا۔ 2 جھیل دے کنارے شمعون پطرس، توما (‏جنہوں جُڑواں کہیا جاندا سی)‏، گلیل دے پِنڈ قانا دا نتن‌ایل، زبدی دے پُتر تے دو ہور شاگرد کٹھے سن۔ 3 شمعون پطرس نے اوہناں نُوں کہیا:‏ ”‏مَیں مچھیاں پھڑن جا رہیا واں۔“‏ اوہناں نے اوہنوں کہیا:‏ ”‏اَسی وی تیرے نال چلنے آں۔“‏ ایس لئی اوہ کشتی وچ بہہ کے مچھیاں پھڑن چلے گئے۔ اوہ ساری رات کوشش کردے رہے پر اِک وی مچھی پھڑ نہ سکے۔‏

4 جدوں دن چڑھن والا سی تے یسوع جھیل دے کنارے تے آ کے کھلو گیا۔ پر شاگرد اوہنوں پچھان نہ سکے۔ 5 فیر یسوع نے اوہناں نُوں پچھیا:‏ ”‏بچیو، کیہہ تواڈے کول کجھ*‏ کھان لئی ہے وے؟“‏ اوہناں نے جواب دِتا:‏ ”‏نئیں۔“‏ 6 اوہنے اوہناں نُوں کہیا:‏ ”‏کشتی دے سجے پاسے جال پاؤ تے توانوں کجھ مچھیاں مِلن گیاں۔“‏ اوہناں نے اِنج ای کیتا تے جال مچھیاں نال ایناں بھر گیا کہ اوہناں لئی اوہنوں کِھچنا مشکل ہو گیا۔ 7 فیر جیس شاگرد نُوں یسوع پیار کردا سی، اوہنے پطرس نُوں کہیا:‏ ”‏ایہہ تے مالک اے۔“‏ ایہہ سُن کے شمعون پطرس نے اپنا کُرتا پایا کیونکہ اوہ اَدھا ننگا سی تے جھیل چ چھال مار دِتی۔ 8 پر باقی شاگرد چھوٹی کشتی چ پچھے آئے تے مچھیاں نال بھرے ہوئے جال نُوں کِھچ کے کنارے تے لیائے کیونکہ اوہ کنارے توں بوہتے دُور نئیں سن۔ اوہ صرف کوئی 300 فٹ دُور سن۔‏

9 جدوں اوہ کنارے تے پونچے تے اوہناں نے ویکھیا کہ کوئلے بھخے ہوئے نیں تے اوہناں تے مچھیاں رکھیاں ہوئیاں نیں۔ نالے روٹیاں وی پئیاں ہوئیاں نیں۔ 10 یسوع نے اوہناں نُوں کہیا:‏ ”‏جیہڑیاں مچھیاں تُسی ہُن پھڑیاں نیں، اوہناں وچوں کجھ لے کے آؤ۔“‏ 11 ایس لئی شمعون پطرس کشتی چ گیا تے مچھیاں نال بھریا ہویا جال کنارے تے لے آیا۔ اوہدے وچ 153 وڈیاں مچھیاں سن۔ اینیاں مچھیاں ہون دے باوجود جال پاٹیا نئیں۔ 12 یسوع نے اوہناں نُوں کہیا:‏ ”‏آؤ، ناشتہ کر لوو۔“‏ شاگرداں وچوں کسے نے وی اوہنوں ایہہ پچھن دی ہمت نہ کیتی کہ ”‏تُوں کون ایں؟“‏ کیونکہ اوہناں ساریاں نُوں پتہ سی کہ اوہ مالک ای اے۔ 13 یسوع نے آ کے اوہناں نُوں روٹی دِتی تے اوہدے نال مچھی وی دِتی۔ 14 مُردیاں وچوں زندہ ہون دے بعد ہُن ایہہ تیجی واری سی کہ یسوع اپنے شاگرداں تے ظاہر ہویا۔‏

15 جدوں اوہناں نے ناشتہ کر لیا تے یسوع نے شمعون پطرس نُوں پچھیا:‏ ”‏یوحنا دے پُتر شمعون، کیہہ تُوں مینوں ایہناں*‏ نالوں بوہتی محبت کرنا ایں؟“‏ اوہنے جواب دِتا:‏ ”‏ہاں مالک، تینوں پتہ اے کہ مَیں تینوں پیار کرنا واں۔“‏ یسوع نے اوہنوں کہیا:‏ ”‏ میرے میمنیاں نُوں چرا۔“‏ 16 اوہنے دُوجی وار پطرس نُوں پچھیا:‏ ”‏یوحنا دے پُتر شمعون، کیہہ تُوں مینوں محبت کرنا ایں؟“‏ اوہنے جواب دِتا:‏ ”‏ہاں مالک، تینوں پتہ اے کہ مَیں تینوں پیار کرنا واں۔“‏ یسوع نے اوہنوں کہیا:‏ ”‏میریاں چھوٹیاں بھیڈاں دی دیکھ‌بھال کر۔“‏ 17 یسوع نے اوہنوں تیجی وار پچھیا:‏ ”‏یوحنا دے پُتر شمعون، کیہہ تُوں مینوں پیار کرنا ایں؟“‏ پطرس ایہہ سُن کے بڑا دُکھی ہویا کہ یسوع نے اوہنوں تیجی واری ایہہ گل پچھی اے کہ ”‏کیہہ تُوں مینوں پیار کرنا ایں؟“‏ ایس لئی اوہنے جواب دِتا:‏ ”‏ مالک، تُوں سب کجھ جاننا ایں۔ تینوں پتہ اے کہ مَیں تینوں پیار کرنا واں۔“‏ یسوع نے اوہنوں کہیا:‏ ”‏میریاں چھوٹیاں بھیڈاں نُوں چرا۔ 18 مَیں تینوں سچ کہنا واں، جدوں تُوں جوان سیں تے تُوں آپ اپنے کپڑے پانا سیں تے جدھر چاہنا سیں چلا جانا سیں۔ پر جدوں تُوں بڈھا ہو جائیں گا تے تُوں ہتھ اَگے کریں گا تے کوئی ہور تینوں کپڑے پوائے گا تے تینوں چُک کے اوتھے کھڑے گا جِتھے تُوں نئیں جانا چاہویں گا۔“‏ 19 یسوع نے ایہہ گل ایہہ دَسن لئی کہی سی کہ پطرس کیہو جہی موت مر کے خدا دی وڈیائی کرے گا۔ ایہہ کہن توں بعد اوہنے پطرس نُوں کہیا:‏ ”‏میرے پچھے پچھے چلدا رہ۔“‏

20 پطرس نے مُڑ کے اوس شاگرد نُوں آندیاں ویکھیا جنہوں یسوع پیار کردا سی تے جنہے شام دے کھانے دے دوران یسوع دے سینے نال ٹیک لا کے ایہہ پچھیا سی:‏ ”‏مالک، اوہ بندہ کون اے جیہڑا تینوں دھوکھے نال پھڑوائے گا؟“‏ 21 اوس شاگرد نُوں ویکھ کے پطرس نے یسوع نُوں کہیا:‏ ”‏مالک، ایہدا کیہہ بنے گا؟“‏ 22 یسوع نے اوہنوں کہیا:‏ ”‏جے مَیں چاہواں کہ ایہہ میرے آن تک رہوے تے تینوں ایہدے نال کیہہ؟ تُوں میرے پچھے پچھے چلدا رہ۔“‏ 23 ایس لئی بھراواں وچ ایہہ گل پھیل گئی کہ ایہہ شاگرد مرے گا نئیں۔ پر یسوع نے ایہہ نئیں سی کہیا کہ اوہ مرے گا نئیں سگوں اوہنے کہیا سی:‏ ”‏جے مَیں چاہواں کہ ایہہ میرے آن تک رہوے تے تینوں ایہدے نال کیہہ؟“‏

24 ایہہ اوہی شاگرد اے جنہے ایہناں گلاں بارے گواہی دِتی اے تے ایہہ گلاں لکھیاں نیں تے سانوں پتہ اے کہ اوہدی گواہی سچی اے۔‏

25 اصل چ یسوع نے ہور وی بوہت سارے کم کیتے سن۔ جے ایہناں کماں بارے اِک اِک گل تفصیل نال لکھی جاندی تے اینیاں کتاباں بھر جاندیاں کہ میرے خیال چ دُنیا چ اوہناں نُوں رکھن دی جگہ نہ ہوندی۔‏