کُرنتھیوں دے ناں پہلا خط
10 بھراوو، مَیں توانوں یاد کرانا چاہنا واں کہ ساڈے پیو دادے بدّل دے تھلے سن تے سمندر* وچوں لنگھے سن۔ 2 جدوں اوہ سارے بدّل دے تھلے سن تے سمندر چوں لنگھدے ہوئے اوہناں نے موسیٰ دی رہنمائی چ چل کے بپتسمہ لیا۔* 3 اوہناں ساریاں نے خدا وَلّوں ملیا کھانا کھادا 4 تے خدا وَلّوں ملیا پانی پیتا۔ اوہ اوس چٹان چوں پیندے سن جدا خدا نے بندوبست کیتا سی تے جیہڑی اوہناں دے نال نال جاندی سی۔ اوہ چٹان مسیح وَل اشارہ کردی سی۔* 5 پر خدا اوہناں وچوں زیادہتر لوکاں توں خوش نئیں سی۔ ایس لئی اوہناں نُوں ویرانے چ موت دی سزا ملی۔
6 اوہناں نال جو کجھ ہویا، اوہدے توں اَسی ایہہ سبق سکھنے آں کہ سانوں بُریاں چیزاں دی خواہش نئیں کرنی چاہی دی جیویں اوہناں نے کیتی۔ 7 نالے سانوں بُتپرستی وی نئیں کرنی چاہی دی جیویں اوہناں وچوں کجھ لوکاں نے کیتی۔ اوہناں بارے پاک کلام چ لکھیا اے: ”لوکاں نے بہہ کے کھادا پیتا تے فیر بعد چوں اُٹھ کے موج مستی کرن لگ پئے۔“ 8 ایہدے علاوہ سانوں جنسیبدکاری* وی نئیں کرنی چاہی دی جیویں اوہناں وچوں کجھ لوکاں نے کیتی تے اِک ای دن چ 23 ہزار لوک مارے گئے۔ 9 سانوں یہوواہ نُوں اَزمانا وی نئیں چاہی دا جیویں اوہناں وچوں کجھ نے کیتا۔ ایس لئی اوہ سَپاں دے ڈنگ نال مارے گئے۔ 10 سانوں شکایتی وی نئیں ہونا چاہی دا جیویں اوہناں وچوں کجھ سن تے جدی وجہ توں تباہ کرن والے فرشتے نے اوہناں نُوں مار دِتا۔ 11 اوہناں نال جو کجھ وی ہویا، اوہدے توں اَسی سبق سکھ سکنے آں۔ ایہہ گلاں سانوں خبردار کرن لئی لکھیاں گئیاں کیونکہ اَسی آخری زمانے چ رہ رہے آں۔
12 ایس لئی جیس بندے نُوں لگدا اے کہ اوہ مضبوطی نال کھڑا اے، اوہ خبردار رہوے کہ کِتے ڈِگ نہ پووے۔ 13 تواڈے تے ایہو جہی کوئی اَزمیش نئیں آئی جیہڑی دُوجے لوکاں تے نہ آئی ہووے۔ پر خدا وفادار* اے تے اوہ تواڈے تے کوئی وی ایہو جہی اَزمیش نئیں آن دَوے گا جنہوں تُسی برداشت نہ کر سکو سگوں اوہ تواڈے لئی نِکلن دی راہ کڈھے گا تے اَزمیش نُوں برداشت کرن چ تواڈی مدد کرے گا۔
14 ایس لئی میرے پیارے بھراوو، بُتپرستی توں دُور بھجو۔ 15 تُسی سمجھدار او، ایس لئی آپ فیصلہ کرو کہ مَیں جو گلاں کہہ رہیا واں، اوہ صحی نیں یاں نئیں۔ 16 جدوں اَسی برکت دے پیالے تے دُعا کر کے ایہدے چوں پینے آں تے کیہہ اَسی مسیح دے خون چ حصےدار نئیں بن جاندے؟* تے جدوں اَسی روٹی توڑ کے ایہدے چوں کھانے آں تے کیہہ اَسی مسیح دے جسم چ حصےدار نئیں بن جاندے؟ 17 روٹی اِک ای اے پر اَسی بوہت سارے آں۔ فیر وی اَسی اِک جسم آں کیونکہ اَسی سارے اِکو ای روٹی چوں کھانے آں۔
18 ذرا اِسرائیلیاں دی مثال تے غور کرو۔ جدوں اوہ قربانگاہ تے چڑھائیاں جان والیاں قربانیاں چوں کھاندے نیں تے کیہہ اوہ خدا دی عبادت چ اِک مُٹھ نئیں ہو جاندے؟ 19 کیہہ میرے کہن دا ایہہ مطلب اے کہ بُتاں لئی چڑھائیاں جان والیاں قربانیاں یاں بُتاں دی کوئی اہمیت اے؟ 20 نئیں سگوں مَیں ایہہ کہہ رہیا واں کہ بُتپرست لوک باغی فرشتیاں لئی قربانیاں چڑھاندے نیں نہ کہ خدا لئی۔ مَیں نئیں چاہندا کہ تُسی کوئی ایہو جیہا کم کرو جدا تعلق باغی فرشتیاں نال ہوئے۔ 21 تُسی یہوواہ دے پیالے چوں پین دے نال نال باغی فرشتیاں دے پیالے چوں نئیں پی سکدے۔ تُسی یہوواہ دی میز توں کھان دے نال نال باغی فرشتیاں دی میز توں نئیں کھا سکدے۔ 22 جے اَسی اِنج کراں گے تے اَسی یہوواہ نُوں غصہ دَوا رہے ہوواں گے۔ پر ساڈے چ اینی طاقت نئیں کہ اَسی اوہدے غصے دا سامنا کر سکئے۔
23 ساریاں چیزاں جائز نیں پر ساریاں چیزاں توں فائدہ نئیں ہوندا۔ ساریاں چیزاں جائز نیں پر ساریاں چیزاں توں حوصلہ نئیں مِلدا۔ 24 صرف اپنے فائدے بارے نہ سوچو سگوں اوہ کم کرو جدے توں دُوجیاں دا بھلا ہوئے۔
25 بازار چ جیہڑا گوشت وِکدا اے، توانوں اوہدے بارے سوال پچھن دی لوڑ نئیں۔ تُسی اوہنوں صاف ضمیر نال کھا سکدے او 26 کیونکہ پاک کلام چ لکھیا اے: ”زمین تے ایہدیاں ساریاں چیزاں یہوواہ دِیاں نیں۔“ 27 جے تُسی اِک غیرایمان بندے دے گھر دعوت تے جاندے او تے اوہ کھان لئی تواڈے سامنے جو وی رکھے، تُسی اوہنوں صاف ضمیر نال کھا سکدے او۔ توانوں کوئی سوال پچھن دی لوڑ نئیں۔ 28 پر جے کوئی توانوں کہوے کہ ”ایہہ قربانی دا گوشت اے،“ تے اوس بندے دی خاطر ایہنوں نہ کھاؤ تاکہ کسے دے وی ضمیر نُوں ٹھیس نہ پونچے۔ 29 مَیں تواڈے نئیں سگوں دُوجے بندے دے ضمیر دی گل کر رہیا واں۔ بھانویں کہ میرے کول اپنے فیصلے کرن دی آزادی اے پر مَیں کوئی ایہو جیہا کم نئیں کرنا چاہندا جدی وجہ توں کوئی ہور بندہ اپنے ضمیر مطابق میرے فیصلے چوں نُقص کڈھے۔ 30 بھانویں کہ مَیں خدا دا شکر کر کے اوہ چیز کھانا واں جنہوں کھانا جائز اے پر جے ایہدی وجہ توں دُوجے میرے چوں نُقص کڈھن گے تے فیر مَیں ایہنوں کیوں کھاواں؟
31 ایس لئی تُسی بھانویں کھاؤ یاں پیو یاں جو کجھ وی کرو، سب کجھ خدا دی وڈیائی لئی کرو۔ 32 کوئی وی ایہو جیہا کم نہ کرو جدی وجہ توں دُوجیاں دا ایمان کمزور ہوئے فیر بھانویں اوہ یہودی ہون یاں یونانی یاں خدا دی کلیسیا دے لوک۔ 33 مَیں وی ہمیشاں اوہ کم کرن دی کوشش کرنا واں جدے توں سارے خوش ہون۔ مَیں اپنے فائدے بارے نئیں سوچدا سگوں اوہ کم کرنا واں جدے توں بوہتے لوکاں نُوں فائدے ہوئے تاکہ اوہ نجات پان۔