یوحنا نُوں مِلن والا مُکاشفہ
2 اِفسس دی کلیسیا دے فرشتے نُوں لکھ: جدے ہتھ چ سَت تارے نیں تے جیہڑا سونے دے سَت شمعداناں دے وچکار ٹُردا اے، اوہ کہندا اے: 2 ”مَیں تیرے کماں، محنت تے صبر بارے جاننا واں۔ نالے مینوں ایہہ وی پتہ اے کہ تُوں بھیڑے آدمیاں نُوں برداشت نئیں کردا تے تُوں اوہناں لوکاں نُوں پَرکھ کے جھوٹھا ثابت کیتا اے جیہڑے رسول ہون دا دعویٰ کردے نیں پر اصل چ ہے نئیں۔ 3 تُوں صبر نال کم لے رہیا ایں تے تُوں میرے ناں دی خاطر مصیبتاں نُوں برداشت کیتا اے تے ہمت نئیں ہاری۔ 4 پر فیر وی مینوں تیرے نال ایہہ گلہِ اے کہ تیری محبت پہلے ورگی نئیں رہی۔
5 ایس لئی یاد کر کہ تُوں پہلاں کیہو جیہا سیں۔* توبہ کر تے اوہ کم کر جیہڑے تُوں پہلاں کرنا سیں۔ جے تُوں توبہ کر کے پہلے ورگے کم نئیں کریں گا تے مَیں تیرے کول آ کے تیرے شمعدان نُوں اوہدی جگہ توں ہٹا دَواں گا۔ 6 پر تیرے ایس کم لئی مَیں تینوں شاباش دینا چاہنا واں کہ تُوں میرے وانگوں اوہناں کماں توں نفرت کرنا ایں جیہڑے نیکلاؤس دے فرقے دے لوک کردے نیں۔ 7 ہر کوئی خدا دی گل دھیان نال سُنے جیہڑا پاک روح دے ذریعے کلیسیاواں نُوں کہہ رہیا اے: جیہڑا دُنیا تے فتح پائے گا، اوہنوں مَیں زندگی دے اوس درخت دا پھل کھان لئی دَواں گا جیہڑا خدا دے فردوس چ لگیا ہویا اے۔“
8 سمِرنہ دی کلیسیا دے فرشتے نُوں لکھ:”جیہڑا پہلا تے آخری اے“ تے مُردیاں چوں زندہ ہو گیا اے، اوہ کہندا اے: 9 ”مَیں تواڈیاں مصیبتاں تے غریبی بارے جاننا واں۔ پر میریاں نظراں چ تُسی امیر او۔ مَیں ایہہ وی جاننا واں کہ جیہڑے لوک یہودی ہون دا دعویٰ کردے نیں پر ہے نئیں، اوہ اصل چ شیطان دے چیلے نیں تے کُفر بک دے نیں۔ 10 اوہناں مصیبتاں توں نہ ڈرِیں جیہڑیاں تیرے تے آن والیاں نیں۔ ویکھ، اِبلیس تواڈے چوں کجھ لوکاں نُوں وار وار قید چ پوائے گا تاکہ توانوں پوری طرحاں اَزمایا جائے۔ تینوں دس دِناں تک مصیبتاں سہنیاں پین گیاں۔ پر تُوں مردے دم تک وفادار رہوِیں تے فیر مَیں تینوں زندگی دا تاج دَواں گا۔ 11 ہر کوئی خدا دی گل دھیان نال سُنے جیہڑا پاک روح دے ذریعے کلیسیاواں نُوں کہہ رہیا اے: جیہڑا دُنیا تے فتح پائے گا، اوہ دُوجی موت* نئیں مرے گا۔“
12 پرگمن دی کلیسیا دے فرشتے نُوں لکھ: جدے کول لمی، تیز تے دو دھاری تلوار اے، اوہ کہندا اے: 13 ”مَیں جاننا واں کہ جِتھے تُوں رہنا ایں، اوتھے شیطان دا تخت اے۔ پر فیر وی تُوں میرا وفادار ایں۔* تُوں اوہدوں وی میرے تے ایمان رکھنا نئیں چھڈیا جدوں میرے وفادار گواہ انتپاس نُوں تواڈے شہر چ جانوں مار دِتا گیا جِتھے شیطان نے ڈیرہ لایا ہویا اے۔*
14 پر کجھ گلاں دی وجہ توں مینوں تیرے نال گلہِ اے۔ تواڈے چوں کجھ لوک بلعام دی تلیم تے چلدے نیں۔ بلعام نے بلق نُوں صلاح دِتی سی کہ اوہ اِسرائیلیاں نُوں جنسیبدکاری کرن تے بُتاں اَگے چڑھائیاں جان والیاں چیزاں کھان دی ہلاشیری دَوے۔ 15 نالے تواڈے چوں کجھ لوک نیکلاؤس دے فرقے دی تلیم تے چلدے نیں۔ 16 ایس لئی توبہ کر۔ جے تُوں توبہ نئیں کریں گا تے مَیں چھیتی آ کے اوہناں دے خلاف اوس لمی تلوار نال جنگ کراں گا جیہڑی میرے مُونہہ چوں نکلی ہوئی اے۔
17 ہر کوئی خدا دی گل دھیان نال سُنے جیہڑا پاک روح دے ذریعے کلیسیاواں نُوں کہہ رہیا اے: جیہڑا دُنیا تے فتح پائے گا، اوہنوں مَیں اوس من چوں تھوڑا جیہا کھان لئی دَواں گا جیہڑا چھپا کے رکھیا گیا اے۔ مَیں اوہنوں اِک چِٹا پتھر وی دَواں گا جدے تے اِک نواں ناں لکھیا ہویا اے۔ اوس ناں بارے صرف اوہنوں ای پتہ ہوئے گا جنہوں اوہ پتھر دِتا جائے گا۔“
18 تھواتیرہ دی کلیسیا دے فرشتے نُوں لکھ: خدا دا پُتر جدیاں اَکھاں بھڑکدے ہوئے شعلیاں ورگیاں تے پیر خالص تانبے وانگوں نیں، اوہ کہندا اے: 19 ”مَیں تیرے کماں، محبت، ایمان، خدمت تے صبر بارے جاننا واں تے ایہہ وی کہ تُوں ہُن پہلے نالوں زیادہ کم کر رہیا ایں۔
20 پر فیر وی مینوں تیرے نال ایہہ گلہِ اے کہ تُوں اوس عورت، اِیزِبل نُوں برداشت کرنا ایں جیہڑی نبِیّہ ہون دا دعویٰ کردی اے۔ اوہ میرے غلاماں نُوں اپنی تلیم نال گمراہ کردی اے کہ اوہ جنسیبدکاری کرن تے بُتاں اَگے چڑھائیاں جان والیاں چیزاں کھان۔ 21 مَیں اوہنوں توبہ کرن لئی وقت دِتا۔ پر اوہ جنسیبدکاری توں توبہ نئیں کرنا چاہندی۔ 22 ایس لئی ویکھ، مَیں اوہنوں سزا دین لئی سخت بیمار کر دَواں گا۔ جے اوہدے نال جنسیبدکاری کرن والے اوہدے ورگے کم کرن توں توبہ نئیں کرن گے تے مَیں اوہناں تے وڈیاں وڈیاں مصیبتاں لیاواں گا۔ 23 نالے مَیں اوہدے بچیاں نُوں جانلیوا بیماری* نال مار دَواں گا تاکہ ساریاں کلیسیاواں نُوں پتہ چل جائے کہ مَیں انساناں دی سوچ تے دل دی گہرائی چ چھپے خیالاں* نُوں پَرکھنا واں تے مَیں تواڈے چوں ہر اِک نُوں اوہدے کماں دا پھل دَواں گا۔
24 پر تھواتیرہ چ جیہڑے لوک اِیزِبل دی تلیم تے نئیں چل رہے تے جیہڑے شیطان دی جھوٹھی تلیم توں دُور رہندے نیں، اوہناں نُوں مَیں کہنا واں: ”مَیں تواڈے تے کوئی ہور بوجھ نئیں پا رہیا۔ 25 تُسی بس میرے آن تک اوہناں چیزاں نُوں گُھٹ کے پھڑی رکھو جیہڑیاں تواڈے کول نیں۔* 26 جیہڑا دُنیا تے فتح پائے گا تے آخر تک میرے حکماں تے عمل کرے گا، مَیں اوہنوں قوماں اُتے اِختیار دَواں گا 27 جیویں میرے باپ نے مینوں اِختیار دِتا اے تاکہ اوہ بندہ لوھے دے ڈنڈے نال قوماں تے حکمرانی کرے تے اوہناں نُوں مٹی دے بھانڈیاں وانگوں ٹوٹے ٹوٹے کر دَوے۔ 28 ایہدے علاوہ مَیں اوہنوں صبح دا تارا وی دَواں گا۔ 29 ایس لئی ہر کوئی خدا دی گل دھیان نال سُنے جیہڑی اوہ پاک روح دے ذریعے کلیسیاواں نُوں کہہ رہیا اے۔““