کُرنتھیوں دے ناں پہلا خط
4 اَسی چاہنے آں کہ لوک سمجھ جان کہ اَسی مسیح دے خادم تے خدا دے مُقدس رازاں دے مختار* آں۔ 2 ہر مختار کولوں ایہہ توقع کیتی جاندی اے کہ اوہ بھروسے دے لائق* ہوئے۔ 3 میرے لئی ایہہ گل کوئی اہمیت نئیں رکھدی کہ تُسی یاں انساناں دی کوئی عدالت مینوں جانچے۔ مَیں تے آپ وی اپنے آپ نُوں نئیں جانچ دا 4 کیونکہ میرا ضمیر صاف اے۔ پر ایس وجہ توں مَیں نیک ثابت نئیں ہوندا کیونکہ مینوں جانچن والا* یہوواہ اے۔ 5 ایس لئی طے کیتے ہوئے وقت توں پہلاں یعنی مالک دے آن تک کسے دی عدالت نہ کرو۔ اوہ آپ آ کے نھیرے وچ لُکیاں ہوئیاں گلاں نُوں روشنی چ لیائے گا تے ظاہر کرے گا کہ ہر انسان دے دل چ کیہہ اے۔ اوس ویلے ہر اِک نُوں اپنے کماں مطابق خدا کولوں شاباش ملے گی۔
6 بھراوو، مَیں تواڈے فائدے لئی اپنی تے اپلّوس دی مثال دِتی تاکہ تُسی ایس اصول نُوں سمجھ جاؤ: ”لکھیاں ہوئیاں گلاں توں ودھ کے کجھ نہ کرو۔“* جے تُسی ایس اصول تے عمل کرو گے تے تُسی مغرور نئیں بنو گے تے کسے دی طرفداری وی نئیں کرو گے۔ 7 تُسی اپنے آپ نُوں دُوجیاں توں وڈا کیوں سمجھدے او؟ تواڈے کول جیہڑیاں وی چیزاں نیں، کیہہ اوہ توانوں خدا وَلّوں نئیں ملیاں؟بھلا فیر تُسی اِنج شیخی کیوں ماردے او جیویں تُسی ایہناں نُوں اپنی طاقت نال حاصل کیتا ہوئے؟
8 کیہہ توانوں ضرورت دی ہر چیز مِل گئی اے؟ کیہہ تُسی امیر بن گئے او؟ کیہہ تُسی ساڈے بغیر ای بادشاہواں دے طور تے حکمرانی شروع کر لئی اے؟ کاش کہ تُسی سچ مچ بادشاہ بن گئے ہوندے تاکہ اَسی وی تواڈے نال مِل کے حکمرانی کردے۔ 9 مینوں لگدا اے کہ اَسی ساری دُنیا، انساناں تے فرشتیاں لئی تماشا بن گئے آں کیونکہ خدا مینوں تے باقی رسولاں نُوں اوہناں مُجرماں وانگوں سب توں آخر چ تماشاگاہ* چ لیایا اے جنہاں نُوں موت دی سزا سُنائی جاندی اے۔ 10 مسیح دی وجہ توں سانوں بےوقوف سمجھیا جاندا اے۔ پر توانوں لگدا اے کہ مسیح دے شاگرد ہون دی وجہ توں تُسی بڑے سمجھدار او۔ سانوں کمزور سمجھیا جاندا اے جد کہ تُسی طاقتور لگدے او۔ تواڈی عزت کیتی جاندی اے جد کہ ساڈی بےعزتی کیتی جاندی اے۔ 11 اَسی ہُن تک بُھکھے تے پیاسے آں تے ساڈے کول پان لئی کپڑے وی نئیں۔ سانوں ماریا کُٹیا جاندا اے تے ساڈا کوئی ٹھکانہ نئیں۔ 12 اَسی اپنے ہتھاں نال سخت محنت کرنے آں۔ جدوں ساڈی بےعزتی کیتی جاندی اے تے اَسی دُعا دینے آں۔ جدوں ساڈے تے ظلم ہوندا اے تے اَسی صبر نال برداشت کرنے آں۔ 13 جدوں ساڈی بدنامی کیتی جاندی اے تے اَسی نرمی نال جواب دینے آں۔ سانوں اَج تک گھٹیا تے دُنیا دا کُوڑا سمجھیا جاندا اے۔
14 مَیں توانوں ایہہ گلاں شرمندہ کرن لئی نئیں لکھ رہیا سگوں مَیں توانوں اپنے بچے سمجھ کے نصیحت کر رہیا واں۔ 15 بھانویں کہ توانوں مسیح بارے سکھان والے 10 ہزار اُستاد* کیوں نہ ہون پر تواڈے باپ بوہتے نئیں نیں کیونکہ توانوں خوشخبری سُنا کے تے مسیح یسوع دی راہ تے چلنا سکھا کے مَیں تواڈا باپ بنیا۔ 16 ایس لئی مَیں توانوں تاکید کرنا واں کہ تُسی میری مثال تے چلو۔ 17 ایسے وجہ توں مَیں تیمُتھیُس نُوں تواڈے کول گھل رہیا واں۔ مالک دی خدمت چ اوہ میرا پیارا تے وفادار پُتر اے۔ اوہ توانوں میرے اوہ اصول* یاد دَوائے گا جنہاں دے مطابق مَیں مسیح یسوع دی خدمت کر رہیا واں۔ اوہ توانوں اوہ گلاں وی یاد دَوائے گا جیہڑیاں مَیں ہر جگہ تے ہر کلیسیا چ سکھا رہیا واں۔
18 تواڈے وچوں کجھ لوک غرور نال بھرے ہوئے نیں تے سوچدے نیں کہ مَیں تواڈے کول نئیں آواں گا۔ 19 پر جے یہوواہ نے چاہیا تے مَیں چھیتی تواڈے کول آواں گا۔ مَیں آ کے غرور نال بھرے ہوئے لوکاں دِیاں گلاں تے دھیان نئیں دَواں گا سگوں ایہہ ویکھاں گا کہ اوہ خدا دی مرضی مطابق چل رہے نیں یاں نئیں۔ 20 انسان دِیاں گلاں توں نئیں سگوں اوہدے کماں توں پتہ چلدا اے کہ اوہ خدا دی بادشاہی دی حمایت کردا اے یاں نئیں۔ 21 تُسی کیہہ چاہندے او کہ جدوں مَیں آواں تے مَیں سختی* نال تواڈی درستی کراں یاں محبت تے نرمی نال؟