رومیوں دے ناں خط
8 ایس لئی جیہڑے لوک مسیح یسوع نال اِک مُٹھ نیں، اوہناں نُوں قصوروار نئیں ٹھہرایا جاندا۔ 2 تُسی مسیح یسوع دے شاگرد او تے پاک روح دی شریعت نے توانوں گُناہ تے موت دی شریعت توں آزاد کر کے توانوں زندگی دِتی اے۔ 3 موسیٰ دی شریعت توانوں آزاد نئیں کرا سکدی سی کیونکہ گُناہگار انسان اوہدے حکماں تے پوری طرحاں عمل نئیں کر سکدے سن۔ پر خدا نے توانوں آزادی دَوان لئی اپنے پُتر نُوں انسان دے طور تے* گھلیا تاکہ اوہ گُناہ نُوں مٹائے۔ اِنج خدا نے انساناں دے اندر وَسن والے گُناہ نُوں قصوروار ٹھہرایا 4 تاکہ اَسی جسم دِیاں خواہشاں دے مطابق نئیں سگوں پاک روح دے مطابق چلئے تے شریعت دے حکماں نُوں پورا کریئے۔ 5 جیہڑے جسم دِیاں خواہشاں مطابق چلدے نیں، اوہناں دا دھیان جسمانی چیزاں تے ہوندا اے۔ پر جیہڑے پاک روح دے مطابق چلدے نیں، اوہناں دا دھیان پاک روح دی رہنمائی تے ہوندا اے۔ 6 جسمانی چیزاں تے دھیان دین دا انجام موت اے۔ پر پاک روح دی رہنمائی تے دھیان دین دا انعام زندگی تے خدا نال صلح* اے۔ 7 جسمانی چیزاں تے دھیان دین دا مطلب اے خدا نال دُشمنی کرنا کیونکہ گُناہگار جسم خدا دے قانون دے تابع نئیں اے تے نہ ای ہو سکدا اے۔ 8 ایس لئی جیہڑے لوک جسم دِیاں خواہشاں دے مطابق چلدے نیں، اوہ خدا نُوں خوش نئیں کر سکدے۔
9 پر بھراوو، تُسی گُناہگار جسم دِیاں خواہشاں مطابق نئیں چلدے۔ جے خدا دی روح واقعی تواڈے چ وَسدی اے تے تُسی ایہدی رہنمائی مطابق چلو گے۔ جے کوئی مسیح ورگی سوچ نئیں رکھدا تے اوہدا مسیح نال کوئی تعلق نئیں اے۔ 10 پر جے تُسی مسیح نال اِک مُٹھ او تے پاک روح توانوں زندگی دیندی اے کیونکہ توانوں نیک ٹھہرایا گیا اے فیر بھانویں تواڈا جسم گُناہ دی وجہ توں مُردہ اے۔ 11 خدا نے پاک روح دے ذریعے یسوع نُوں مُردیاں چوں زندہ کیتا۔ جے اوہ پاک روح تواڈے چ وَسدی اے تے خدا جنہے مسیح یسوع نُوں مُردیاں چوں زندہ کیتا، اوسے پاک روح دے ذریعے تواڈے جسماں* نُوں زندہ کرے گا۔
12 ایس لئی بھراوو، گُناہگار جسم دِیاں خواہشاں مطابق زندگی نہ گزارو۔ 13 جے تُسی جسم دِیاں خواہشاں مطابق زندگی گزارو گے تے تُسی مر جاؤ گے۔ پر جے تُسی پاک روح دی مدد نال جسم دے کماں نُوں مار دَوو گے* تے تُسی زندہ رہوو گے۔ 14 جیہڑے خدا دی پاک روح دی رہنمائی چ چلدے نیں، اوہ واقعی خدا دے پُتر نیں۔ 15 توانوں خدا دی پاک روح ملی اے جیہڑی توانوں فیر توں غلام یاں ڈرپوک نئیں بنن دیندی سگوں خدا نے پاک روح دے ذریعے توانوں اپنے بچیاں دے طور تے اپنا لیا* اے تے ایسے روح دے ذریعے اَسی اوہنوں ”ابا“ کہنے آں۔ 16 خدا دی روح سانوں یقین دَواندی اے* کہ اَسی خدا دے بچے آں۔ 17 جے اَسی خدا دے بچے آں تے ایہدا مطلب اے کہ اَسی اوہدے وارث وی آں تے مسیح نال سانوں وی وراثت ملے گی۔ پر ضروری اے کہ مسیح وانگوں اَسی سارے وی پہلاں دُکھ سہئے تاکہ سانوں اوہدے وانگوں شان وی ملے۔
18 ایس لئی میرے خیال چ اَسی ہُن جیہڑے دُکھ سہہ رہے آں، اوہ اوس شان دے مقابلے چ کجھ وی نئیں جیہڑی ساڈے ذریعے ظاہر ہوئے گی 19 کیونکہ پوری دُنیا بڑی بےتابی نال اوس وقت دا اِنتظار کر رہی اے جدوں خدا دے پُتر ظاہر ہون گے۔ 20 دُنیا نئیں چاہندی سی کہ اوہنوں بےسہارا چھڈیا جائے پر خدا نے اِنج ہون دِتا۔ پر ایہدے نال نال اوہنے ایہہ امید وی دِتی 21 کہ دُنیا تباہی دی غلامی توں آزاد ہو جائے گی تے خدا دے بچیاں دے طور تے شاندار آزادی دا مزہ لوے گی۔ 22 اَسی جاننے آں کہ ساری دُنیا اَج تک ہوکے بھر رہی اے تے تکلیف سہہ رہی اے۔ 23 اَسی وی ہوکے بھر رہے آں بھانویں کہ سانوں پہلا پھل یعنی پاک روح ملی اے۔ اَسی بےتابی نال اوس وقت دا اِنتظار کر رہے آں جدوں سانوں پُتراں دے طور تے اپنایا جائے گا یعنی جدوں سانوں فدیے دے ذریعے اپنے جسماں توں چھٹکارا ملے گا۔ 24 سانوں ایہہ امید اوہدوں ملی سی جدوں سانوں گُناہ توں چھڈایا گیا سی۔ پر جیہڑی چیز مِل جاندی اے، کیہہ اوہدی امید کرن دی لوڑ ہوندی اے؟ نئیں کیونکہ جدوں اوہ چیز مِل جاندی اے تے امید پوری ہو جاندی اے۔ 25 پر جے سانوں اوہ چیز نئیں ملی جدی اَسی امید کرنے آں تے اَسی ہمت نئیں ہاردے سگوں بےتابی نال اوہدا اِنتظار کرنے آں۔
26 نالے جدوں اَسی کمزور محسوس کرنے آں تے پاک روح ساڈی مدد کردی اے کیونکہ اوہدوں اَسی دُعا تے کرنا چاہنے آں پر سانوں سمجھ نئیں آندی کہ اَسی دُعا چ کیہہ کہیے۔ ایس لئی جدوں اَسی اپنے دل دا حال لفظاں چ بیان نئیں کر پاندے سگوں بس ہوکے بھرنے آں* تے اوہدوں پاک روح ساڈے لئی اِلتجا کردی اے۔ 27 فیر خدا ویکھدا اے کہ ساڈے دل چ کیہہ اے تے سمجھ جاندا اے کہ پاک روح کیہہ کہہ رہی اے کیونکہ اوہ خدا دی مرضی دے مطابق مُقدس لوکاں لئی اِلتجا کردی اے۔
28 سانوں پتہ اے کہ خدا جیہڑے وی کم کردا اے اوہناں دا آپس چ کوئی نہ کوئی تعلق ہوندا اے تاکہ اوہناں لوکاں نُوں فائدہ ہوئے جیہڑے اوہدے نال محبت کردے نیں تے جنہاں نُوں اوہنے اپنی مرضی دے مطابق بلایا اے۔ 29 خدا نے سب توں پہلاں ایہناں لوکاں تے دھیان دِتا کیونکہ اوہنے صدیاں پہلاں ای فیصلہ کر لیا سی کہ اوہ ایہناں نُوں اپنے پُتر ورگا بنائے گا تاکہ اوہدا پُتر بوہت سارے بھراواں چوں پہلوٹھا ہوئے۔ 30 خدا نے جنہاں بارے پہلاں توں ایہہ فیصلہ کیتا سی، اوہناں نُوں بلایا وی۔ نالے جنہاں نُوں اوہنے بلایا، اوہناں نُوں نیک وی ٹھہرایا تے جنہاں نُوں اوہنے نیک ٹھہرایا، اوہناں نُوں شان وی بخشی۔
31 فیر ایہناں ساریاں گلاں توں کیہہ پتہ چلدا اے؟ جے خدا ساڈے نال اے تے فیر بھلا کون ساڈے خلاف ہو سکدا اے؟ 32 خدا اپنے پُتر نُوں وی قربان کرن توں پچھے نئیں ہٹیا سگوں اوہنوں ساڈے ساریاں لئی وار دِتا۔ جے اوہنے ساڈے لئی اپنا پُتر دے دِتا تے کیہہ اوہ دل کھول کے سانوں باقی ساریاں چیزاں وی نئیں دَوے گا؟ 33 کون خدا دے چُنے ہوئے لوکاں تے اِلزام لا سکدا اے؟ خدا نے آپ اوہناں نُوں نیک ٹھہرایا اے۔ 34 کون اوہناں نُوں قصوروار ٹھہرا سکدا اے؟ کوئی وی نئیں کیونکہ مسیح یسوع اوہناں دی خاطر مریا تے اوہنوں مُردیاں چوں زندہ کیتا گیا۔ ہُن اوہ خدا دے سجے ہتھ بیٹھا اے تے ساڈے لئی اِلتجا کردا اے۔
35 کیہہ کوئی وی چیز مسیح نُوں ساڈے نال محبت کرن توں روک سکدی اے؟ کیہہ مصیبت یاں پریشانی یاں ظلم یاں بُھکھ یاں ننگاپن یاں خطرہ یاں تلوار سانوں مسیح دی محبت توں الگ کر سکدی اے؟ 36 پاک کلام چ لکھیا اے: ”تیری خاطر سانوں ہر ویلے موت دا سامنا کرنا پیندا اے۔ سانوں ایہو جہیاں بھیڈاں سمجھیا جاندا اے جنہاں نُوں ذِبح کیتا جائے گا۔“ 37 پر جیہڑا ساڈے نال محبت کردا اے، اوہدے ذریعے اَسی ایہناں ساریاں مصیبتاں چ پوری طرحاں کامیاب* ہو جانے آں۔ 38 مینوں پورا یقین اے کہ نہ موت، نہ زندگی، نہ فرشتے، نہ حکومتاں، نہ ایس زمانے دِیاں چیزاں، نہ آن والے زمانے دِیاں چیزاں، نہ طاقتاں، 39 نہ اُنچائی، نہ گہرائی تے نہ ای کوئی ہور شے* خدا نُوں ساڈے نال محبت کرن توں روک سکدی اے۔ ہاں، اوہ محبت جیہڑی اوہ ساڈے مالک مسیح یسوع دے ذریعے ظاہر کردا اے۔