کُرنتھیوں دے ناں پہلا خط

15 بھراوو، مَیں توانوں یاد دَوانا چاہنا واں کہ جدوں مَیں توانوں خوش‌خبری سُنائی سی تے تُسی اوہنوں قبول کیتا تے اوہدے مطابق چلن دا پکا ارادہ کیتا سی۔ 2 جے اوس خوش‌خبری تے تواڈا ایمان قائم رہوے گا جیہڑی مَیں توانوں سُنائی سی تے فیر توانوں نجات ملے گی۔ پر جے تُسی اِنج نئیں کرو گے تے فیر تواڈا ایمان لیان دا کوئی فائدہ نئیں۔‏

3 سب توں پہلاں مَیں توانوں اوہ اہم گل دَسی سی جیہڑی مینوں وی سکھائی گئی سی یعنی ایہہ کہ مسیح نے پاک کلام دے مطابق ساڈے گُناہواں لئی جان دِتی، 4 اوہنوں دفنایا گیا تے تیجے دن زندہ کیتا گیا جیویں کہ پاک کلام چ لکھیا اے۔ 5 فیر اوہ پطرس*‏ نُوں نظر آیا تے بعد چ 12 رسولاں تے ظاہر ہویا۔ 6 ایہدے بعد اوہ اِک موقعے تے 500 توں زیادہ بھراواں نُوں نظر آیا جنہاں چوں زیادہ‌تر حالے وی زندہ نیں۔ پر کجھ موت دی نیندر سوں گئے نیں۔ 7 بعد چوں اوہ یعقوب نُوں تے فیر باقی سارے رسولاں نُوں نظر آیا 8 تے آخر چ مینوں نظر آیا۔ اِنج مَیں اِک ایہو جہے بچے وانگوں بن گیا جیہڑا وقت توں پہلاں پیدا ہویا ہوئے۔‏

9 رسولاں وچوں مَیں سب توں معمولی آں سگوں مَیں تے ایس لائق وی نئیں کہ مینوں رسول کہیا جائے کیونکہ مَیں خدا دی کلیسیا تے ظلم کرنا ساں۔ 10 پر اَج مَیں جو وی آں، خدا دی عظیم رحمت دی وجہ توں آں تے مَیں ایس عظیم رحمت نُوں ضائع نئیں ہون دِتا کیونکہ مَیں اوہناں*‏ ساریاں نالوں زیادہ محنت کیتی۔ پر ایہہ مَیں اپنی طاقت نال نئیں کیتا سگوں خدا دی عظیم رحمت دی وجہ توں کیتا۔ 11 ایہہ ضروری نئیں کہ توانوں خوش‌خبری مَیں سُنائی یاں دُوجے رسولاں نے کیونکہ اَسی سارے اِکو ای پیغام دی مُنادی کرنے آں جنہوں تُسی قبول کیتا اے۔‏

12 اَسی ایس خوش‌خبری دی مُنادی کرنے آں کہ مسیح نُوں مُردیاں چوں زندہ کر دِتا گیا اے تے فیر تواڈے چوں کجھ ایہہ کیوں کہہ رہے نیں کہ مُردے زندہ نئیں ہون گے؟ 13 جے مُردے زندہ نئیں ہون گے تے فیر ایہدا مطلب اے کہ مسیح نُوں وی زندہ نئیں کیتا گیا 14 تے جے مسیح نُوں زندہ نئیں کیتا گیا تے فیر ساڈا خوش‌خبری سُنانا فضول اے تے تواڈے ایمان رکھن دا وی کوئی فائدہ نئیں۔ 15 نالے خدا بارے ساڈی گواہی وی جھوٹھی ہوئی کیونکہ اَسی ایہہ مُنادی کرنے آں کہ اوہنے مسیح نُوں مُردیاں چوں زندہ کیتا اے۔ جے مُردے زندہ ای نئیں ہون گے تے ایہدا مطلب اے کہ اَسی جھوٹھا پیغام پھیلا رہے آں۔ 16 جے مُردیاں نُوں زندہ نئیں کیتا جائے گا تے فیر مسیح وی زندہ نئیں کیتا گیا۔ 17 جے مسیح نُوں زندہ نئیں کیتا گیا تے فیر تواڈا ایمان وی بے‌کار اے۔ نالے تواڈے گُناہ وی معاف نئیں ہوئے۔ 18 جے ایہہ گل اے تے فیر اوہ سارے مسیحی ہمیشاں لئی ختم ہو گئے نیں جیہڑے موت دی نیندر سوں گئے نیں۔ 19 جے اَسی صرف ایسے زندگی لئی مسیح تے امید لائی اے تے فیر ساڈی حالت دُوجے لوکاں نالوں بدتر اے۔‏

20 پر سچ تے ایہہ وے کہ مسیح نُوں مُردیاں چوں زندہ کیتا گیا اے۔ اصل چ مُردیاں چوں سب توں پہلاں اوہنوں ای زندہ کیتا گیا اے۔‏*‏ 21 جیویں موت اِک آدمی دے ذریعے آئی، اوسے طرحاں اِک ای آدمی دے ذریعے مُردیاں نُوں زندہ کیتا جائے گا۔ 22 جیویں آدم دی وجہ توں سارے انسان مردے نیں اونویں مسیح دی وجہ توں سارے مُردے زندہ ہون گے۔ 23 پر ہر اِک نُوں اپنی اپنی واری مطابق زندہ کیتا جائے گا۔ سب توں پہلاں مسیح زندہ ہویا۔‏*‏ فیر مسیح دی موجودگی دے دوران اوہناں نُوں زندہ کیتا جائے گا جیہڑے اوہدے نیں۔ 24 آخر چ جدوں مسیح ہر حکومت، اِختیار تے طاقت نُوں ختم کر دَوے گا*‏ تے اوہ بادشاہی اپنے خدا تے باپ دے حوالے کر دَوے گا۔ 25 اوہ بادشاہ دے طور تے اوہدوں تک حکمرانی کرے گا جدوں تک خدا سارے دُشمناں نُوں اوہدے تابع*‏ نئیں کر دیندا۔ 26 نالے آخری دُشمن یعنی موت نُوں وی ختم کر دِتا جائے گا۔ 27 پاک کلام چ لکھیا اے:‏ خدا نے ”‏ساریاں چیزاں اوہدے تابع کر دِتیاں نیں۔“‏ پر جدوں خدا کہندا اے کہ ”‏ساریاں چیزاں مسیح دے تابع*‏ کر دِتیاں گئیاں نیں،“‏ تے ایہدا ایہہ مطلب نئیں اے کہ خدا وی مسیح دے تابع ہو گیا اے کیونکہ اوہنے ای ساریاں چیزاں مسیح دے تابع کیتیاں نیں۔ 28 جدوں خدا ساریاں چیزاں پُتر دے تابع کر دَوے گا تے فیر پُتر وکھائے گا کہ اوہ آپ وی خدا دے تابع وے جنہے ساریاں چیزاں اوہدے تابع کیتیاں نیں تاکہ خدا ای ساریاں دا حاکم ہوئے۔‏*‏

29 جے مُردیاں نُوں زندہ نئیں کیتا جائے گا تے فیر بپتسمہ لین دا کیہہ فائدہ؟ لوک ایہو جیہا بپتسمہ کیوں لیندے نیں جدا انجام موت اے؟ 30 نالے اَسی وی اپنی زندگی ہر ویلے خطرے چ کیوں پانے آں؟ 31 بھراوو، مَیں توانوں سچ دَسنا واں کہ مَیں ہر روز موت دا سامنا کرنا واں۔ ایہہ گل اونی ای سچ اے جِنّی ایہہ کہ مینوں تواڈے تے بڑا مان اے کیونکہ تُسی ساڈے مالک مسیح یسوع دے شاگرد او۔ 32 جے مَیں دُوجے آدمیاں وانگوں اِفسس چ جنگلی جانوراں نال لڑیا واں تے مینوں ایہدا کیہہ فائدہ ہویا؟ جے مُردیاں نُوں زندہ ای نئیں کیتا جائے گا تے ”‏آؤ اَسی کھائیے پیئے کیونکہ کل تے اَسی مرنا ای اے۔“‏ 33 دھوکھا نہ کھاؤ۔ بُرے دوست چنگیاں عادتاں*‏ نُوں وگاڑ دیندے نیں۔ 34 تواڈے وچوں کجھ لوکاں کول خدا بارے صحی علم نئیں اے۔ ایس لئی ہوش چ آؤ،صحی کم کرو تے گُناہ توں باز آؤ۔ مَیں ایہہ گلاں ایس لئی کہہ رہیا واں تاکہ تُسی اپنی سوچ درست کرو۔‏*‏

35 پر شاید کوئی پچھے:‏ ”‏مُردیاں نُوں زندہ کیویں کیتا جائے گا؟ تے اوہناں دا جسم کیہو جیہا ہوئے گا؟“‏ 36 کیہہ تُوں ایناں ناسمجھ ایں کہ تینوں نئیں پتہ کہ جدوں بیہہ بویا جاندا اے تے اوہنوں پہلے مرنا پیندا اے تاکہ اوہ اُگ سکے۔‏*‏ 37 نالے جدوں تُوں بونا ایں تے تُوں پودے نُوں نئیں سگوں صرف بیہہ*‏ نُوں بونا ایں فیر بھانویں اوہ کنک دا ہوئے یاں کسے ہور چیز دا۔ 38 خدا اوہنوں اپنی مرضی مطابق اُگاندا اے تے ہر طرحاں دے بیہہ چوں فرق قسم دا پودا نکلدا اے۔ 39 ایسے طرحاں جسم وی فرق فرق ہوندے نیں۔ مثال لئی، انساناں، جانوراں، پرندیاں تے مچھیاں دے جسم فرق فرق نیں۔ 40 نالے اسمان تے رہن والیاں دے جسم، زمین تے رہن والیاں دے جسم توں فرق ہوندے نیں کیونکہ اسمانی جسم دی شان فرق ہوندی اے جد کہ زمینی جسم دی شان فرق ہوندی اے۔ 41 سورج، چن تے تاریاں دی شان چ فرق ہوندا اے۔ ایتھوں تک کہ اِک تارے دی شان وی دُوجے تارے نالوں فرق ہوندی اے۔‏

42 جیہڑے لوک مر گئے نیں، اوہناں نال وی اِنج ای ہوئے گا۔ اوہناں نُوں جیس جسم نال دفنایا*‏ گیا، اوہ ختم ہو جاندا اے۔ پر اوہناں نُوں جیس جسم نال زندہ کیتا جاندا اے، اوہ کدی ختم نئیں ہوئے گا۔ 43 اوہناں نُوں حقیر جسم نال دفنایا جاندا اے پر شان‌دار جسم نال زندہ کیتا جاندا اے۔ اوہناں نُوں کمزور جسم نال دفنایا جاندا اے پر طاقتور جسم نال زندہ کیتا جاندا اے۔ 44 انسانی جسم نُوں دفنایا جاندا اے پر اسمانی جسم نال زندہ کیتا جاندا اے۔ جے انسانی جسم ہوندا اے تے فیر اسمانی جسم وی ہوندا اے۔ 45 پاک کلام چ لکھیا اے:‏ ”‏پہلا آدمی یعنی آدم جیوندا انسان بنیا“‏ جد کہ آخری آدم زندگی دین والی اسمانی ہستی*‏ بن گیا۔ 46 پر پہلاں اسمانی جسم نئیں مِلدا سگوں پہلاں تے انسانی جسم ہوندا اے فیر بعد چوں اسمانی جسم مِلدا اے۔ 47 پہلا آدمی زمین توں سی تے اوہنوں مٹی نال بنایا گیا سی جد کہ دُوجا آدمی اسمان توں آیا سی۔ 48 زمین تے رہن والے اوہدے ورگے نیں جنہوں خدا نے مٹی توں بنایا سی۔ پر جیہڑے اسمانی نیں، اوہ اوہدے ورگے نیں جیہڑا اسمان توں آیا سی۔ 49 جیویں اَسی حالے اوہدے ورگے آں جنہوں مٹی توں بنایا گیا سی اونویں ای اَسی اوہدے ورگے بن جاواں گے جیہڑا اسمان توں آیا سی۔‏

50 بھراوو، مَیں توانوں سچ دَسنا واں:‏ انسانی جسم*‏ خدا دی بادشاہی چ نئیں جا سکدا تے ختم ہون والے جسم نُوں اوہ زندگی نئیں مِل سکدی جیہڑی کدی ختم نئیں ہوئے گی۔ 51 سُنو، مَیں توانوں اِک مُقدس راز دَسنا واں۔ اَسی سارے نئیں مراں گے پر اَسی سارے بدل جاواں گے۔ 52 جدوں آخری نرسنگا*‏ وجے گا تے اَسی سارے اِک پل چ یعنی اِکو دم*‏ بدل جاواں گے کیونکہ جدوں آخری نرسنگا وجے گا، اوہدوں مُردے کدی نہ ختم ہون والے جسم نال زندہ ہون گے تے اَسی بدل جاواں گے۔ 53 ختم ہون والا جسم اوس جسم چ بدل جائے گا جیہڑا کدی ختم نئیں ہو سکدا تے جیہڑا جسم مر سکدا اے، اوہ اوس جسم چ بدل جائے گا جیہڑا کدی نئیں مر سکدا۔ 54 جدوں سانوں اوہ جسم ملے گا جیہڑا نہ تے کدی ختم ہو سکدا اے تے نہ ای کدی مر سکدا اے*‏ تے فیر پاک کلام دی ایہہ گل پوری ہوئے گی:‏ ”‏موت ہمیشاں لئی ختم ہو گئی اے۔“‏*‏ 55 ‏”‏موت، تیری طاقت*‏ کتھے گئی؟ موت، تیرا ڈنگ کتھے گیا؟“‏ 56 اصل چ گُناہ اوہ ڈنگ اے جدی وجہ توں موت آندی اے تے گُناہ نُوں شریعت دی وجہ توں طاقت مِلدی اے۔‏*‏ 57 پر خدا دا شکر اے کہ مالک یسوع مسیح دے ذریعے اَسی موت نُوں ہرا سکنے آں۔‏

58 ایس لئی میرے پیارے بھراوو، تگڑے ہووو تے ڈٹے رہوو تے مالک دی خدمت کرن چ ہمیشاں لگے رہوو۔ یاد رکھو کہ مالک دی خدمت چ تواڈی محنت کدی ضائع نئیں ہوئے گی۔‏