تھسلُنیکیوں دے ناں پہلا خط
4 بھراوو، اَسی توانوں سمجھایا سی کہ خدا نُوں خوش کرن لئی تواڈا چالچلن کیہو جیہا ہونا چاہی دا اے تے تُسی ایس ہدیت تے عمل کر وی رہے او۔ ہُن آخر چ اَسی توانوں مالک یسوع دے ناں تے درخاست کرنے آں سگوں مِنت کرنے آں کہ تُسی خدا نُوں خوش کرن دی ہور وی زیادہ کوشش کرو 2 کیونکہ تُسی اوہناں ہدیتاں* نُوں جان دے او جیہڑیاں اَسی توانوں مالک یسوع وَلّوں دِتیاں سن۔
3 خدا دی مرضی ایہہ وے کہ تُسی پاک ہووو تے جنسی بدکاری* توں دُور رہوو۔ 4 تواڈے چوں ہر اِک نُوں پتہ ہونا چاہی دا اے کہ اوہنے اپنے جسم نُوں قابو چ کیویں رکھنا اے تاکہ تُسی پاک تے عزتدار ہووو۔ 5 تُسی دُنیا دے لوکاں وانگوں لالچی نہ بنو جنہاں اُتے اپنیاں بےقابو جنسی خواہشاں نُوں پورا کرن دا جنون سوار اے تے جیہڑے خدا نُوں نئیں جان دے۔ 6 ایس معاملے چ کسے نُوں وی خدا دے اصولاں دی حد پار کر کے اپنے بھرا دا ناجائز فائدہ نئیں چُکنا چاہی دا کیونکہ یہوواہ ایہو جہے گُناہواں دی سزا ضرور دَوے گا۔ ایہدے بارے اَسی توانوں پہلاں وی دَسیا سی تے صاف صاف لفظاں چ توانوں خبردار کیتا سی 7 کیونکہ خدا نے سانوں ناپاک زندگی نئیں سگوں پاک زندگی گزارن لئی بلایا اے۔ 8 جیہڑا بندہ ایس ہدیت دے خلاف جاندا اے، اوہ کسے انسان دے نئیں سگوں خدا دے خلاف جاندا اے جیہڑا توانوں اپنی پاک روح دیندا اے۔
9 پر جتھوں تک بھین بھراواں نُوں پیار کرن دی گل اے، سانوں ایہدے بارے توانوں لکھن دی لوڑ نئیں کیونکہ خدا نے آپ توانوں سکھایا اے کہ اِک دُوجے نال پیار کرو۔ 10 اصل چ تُسی اپنے کماں توں وکھا رہے او کہ تُسی مقدونیہ دے سارے بھین بھراواں نال پیار کردے او۔ پر بھراوو، اَسی تواڈے اَگے مِنت کرنے آں کہ اِک دُوجے نُوں ہور وی زیادہ پیار کرو۔ 11 جیویں کہ اَسی توانوں سمجھایا سی اپنا دِلی سکون قائم رکھو، اپنے کم نال کم رکھو تے دُوجیاں دے معاملے چ لت نہ اَڑاؤ۔ نالے اپنے ہتھاں نال محنت کرو 12 تاکہ تواڈے چالچلن دی وجہ توں دُنیا دے لوک تواڈی عزت کرن تے توانوں کسے چیز دی کمی نہ ہوئے۔
13 بھراوو، اَسی چاہنے آں کہ تُسی ایہہ گل کدی نہ بُھلو کہ موت دی نیندر سُتے ہوئے لوکاں لئی کیہہ امید اے تاکہ تُسی اوہناں لوکاں وانگوں سوگ نہ مناؤ جنہاں کول کوئی امید نئیں اے۔ 14 جے اَسی ایہہ ایمان رکھنے آں کہ یسوع مر گیا سی تے فیر زندہ ہو گیا تے فیر ساڈا ایس گل تے وی ایمان اے کہ خدا، یسوع دے وفادار شاگرداں نُوں وی موت دی نیندر توں جگائے گا تاکہ اوہ یسوع دے نال ہون۔ 15 اَسی توانوں یہوواہ دے کلام دے مطابق دَس رہے آں کہ ساڈے* چوں جیہڑے مالک دی موجودگی دے دوران جی رہے ہون گے، اوہ اسمان تے جان گے۔ پر ساڈے توں پہلاں اوہ لوک اسمان تے جان گے جیہڑے موت دی نیندر سوں گئے نیں 16 کیونکہ مالک آپ فرشتیاں دے سردار دے طور تے اپنے ہتھ چ خدا دا نرسنگا* لے کے اسمانوں آئے گا تے اُچی آواز چ حکم دَوے گا تے سب توں پہلاں اوہ لوک زندہ ہون گے جیہڑے آخری ساہ تک مسیح دے وفادار رہے۔ 17 ایہدے بعد باقی یعنی اَسی* جیہڑے جیوندے ہونواں گے، بدّلاں چ چُکے جاواں گے تاکہ اَسی اوہناں* نال ہوئیے تے اسمان تے اپنے مالک نُوں ملئے۔ فیر اَسی ہمیشاں مالک نال رہواں گے۔ 18 ایس لئی ایہناں گلاں نال اِک دُوجے نُوں تسلی دیندے رہوو۔