کُرنتھیوں دے ناں دُوجا خط

7 پیارے بھراوو، ایہہ وعدے خدا نے ساڈے نال کیتے نیں۔‏*‏ ایس لئی آؤ، اپنے جسم تے اپنی سوچ*‏ نُوں ہر طرحاں دی گندگی توں پاک کریئے تے خدا دا خوف رکھدے ہوئے اوہدی نظر چ پوری طرحاں پاک ہوندے جائیے۔‏

2 تُسی اپنے دِلاں چ سانوں جگہ دَوو۔ اَسی کسے نال نااِنصافی نئیں کیتی، کسے نُوں گمراہ نئیں کیتا تے کسے دا ناجائز فائدہ نئیں چُکیا۔ 3 مَیں تواڈے تے کوئی اِلزام نئیں لا رہیا۔ جیویں مَیں پہلے وی کہیا سی کہ تُسی ساڈے دِلاں چ وَسدے او تے مردے دم تک وَسدے رہوو گے۔ 4 مَیں تواڈے نال کُھل کے گل کر سکنا واں۔ مینوں تواڈے تے بڑا مان اے۔ مینوں بڑی تسلی ملی اے تے میرا دل خوشی نال بھریا ہویا اے، بھانویں کہ سانوں بڑیاں مصیبتاں دا سامنا کرنا پے رہیا اے۔‏

5 جدوں اَسی مقدونیہ پونچے تے سانوں سکون نئیں ملیا سگوں اَسی طرحاں طرحاں دِیاں مشکلاں دا سامنا کردے رہے۔ اصل چ باہر مخالفت سی تے ساڈے دل چ پریشانیاں۔‏*‏ 6 پر بے‌حوصلہ لوکاں نُوں تسلی دین والے خدا نے اوہدوں سانوں تسلی دِتی جدوں طِطُس سانوں ملیا۔ 7 ایہدے علاوہ سانوں ایس گلوں وی تسلی ملی کہ تواڈی وجہ توں طِطُس نُوں حوصلہ ملیا۔ اوہنے سانوں دَسیا کہ تُسی مینوں مِلن لئی بے‌تاب او۔ نالے تُسی دُکھی او تے توانوں میری بڑی فکر اے۔ ایہہ سُن کے میری خوشی ہور وی ودھ گئی۔‏

8 ایس لئی مینوں ایس گل دا افسوس نئیں اے کہ میرے خط دی وجہ توں توانوں دُکھ ہویا۔ بھانویں کہ پہلاں مینوں افسوس ہویا سی کہ میرے خط دی وجہ توں تُسی دُکھی ہو گئے (‏پر صرف تھوڑی دیر لئی)‏۔ 9 ہُن مَیں خوش آں پر ایس لئی نئیں کہ میرے خط دی وجہ توں توانوں دُکھ ہویا سگوں ایس لئی کہ ایس دُکھ دی وجہ توں تُسی توبہ کیتی۔ تُسی اوہ دُکھ محسوس کیتا جیہڑا اِک بندے نُوں خدا دے نیڑے لجاندا اے۔‏*‏ ایس لئی ساڈیاں گلاں توں توانوں نقصان نئیں ہویا۔ 10 جدوں اِک بندہ اپنے گُناہ دی وجہ توں دُکھی ہوندا اے تے توبہ کردا اے تے ایہہ دُکھ اوہنوں خدا دے نیڑے لجاندا اے تے اوہ بندہ نجات دی راہ تے چلن لگ پیندا اے۔ ایس لئی بعد چوں اوہنوں کوئی پچھتاوا نئیں ہوندا۔ پر جیہڑا بندہ دُنیا دے لوکاں وانگوں دُکھی ہوندا اے،‏*‏ اوہدا انجام موت ہوندا اے۔ 11 ویکھو، تُسی اوہ دُکھ محسوس کیتا جیہڑا اِک بندے نُوں خدا دے نیڑے لجاندا اے۔ ایس لئی تُسی بڑے جوش نال صحی کم کیتا، تُسی اپنی بدنامی دُور کیتی، توانوں اپنی غلطی تے پچھتاوا ہویا، تُسی خدا دا خوف منیا، دِلوں توبہ کیتی تے پوری لگن نال اپنی غلطی نُوں سدُھاریا۔ تُسی ایس معاملے نُوں سدُھارن لئی صاف‌دلی نال ہر ضروری کم کیتا۔ 12 مَیں توانوں جیہڑا خط بھیجیا، اوہ اوس بندے لئی نئیں سی جنہے گُناہ کیتا سی تے نہ ای اوہدے لئی جدے خلاف گُناہ ہویا سی سگوں اوہ خط تواڈے لئی سی تاکہ خدا دے حضور ظاہر ہو جائے کہ تُسی ساڈیاں ہدیتاں منن لئی تیار او۔ 13 تواڈی فرمانبرداری دی وجہ توں سانوں تسلی ملی اے۔‏

پر ایہدے نال نال طِطُس نُوں خوش ویکھ کے سانوں ہور وی زیادہ خوشی ہوئی کیونکہ تواڈی وجہ توں اوہنوں حوصلہ*‏ ملیا اے۔ 14 مَیں طِطُس نُوں دَسیا سی کہ مینوں تواڈے تے بڑا مان اے تے تُسی مینوں مایوس نئیں کیتا۔ جیویں اوہ ساریاں گلاں سچیاں سن جیہڑیاں اَسی توانوں دَسیاں سن، اوسے طرحاں اوہ گلاں وی سچیاں ثابت ہوئیاں جیہڑیاں اَسی تواڈے بارے طِطُس نُوں دَسیاں سن۔ 15 نالے جدوں اوہ یاد کردا اے کہ تُسی سارے کِنّے فرمانبردار او تے تُسی اوہدے نال کِنّی عزت نال پیش آئے سو تے اوہدے دل چ تواڈے لئی پیار ہور وی ودھ جاندا اے۔ 16 مینوں خوشی اے کہ مَیں ہر معاملے چ تواڈے تے بھروسا کر سکنا واں۔‏*‏