تھسلُنیکیوں دے ناں پہلا خط

3 اَسی کافی دیر توں تواڈی خیریت جاننا چاہ رہے ساں۔ پر جدوں ساڈے کولوں ہور اِنتظار نہ ہویا تے اَسی سوچیا کہ بہتر ہوئے گا کہ اَسی ایتھنز چ رہیے 2 تے تواڈے کول اپنے بھرا تے خدا دے خادم*‏ تیمُتھیُس نُوں گھلئے جیہڑا مسیح بارے خوش‌خبری سُناندا اے۔ اَسی چاہنے ساں کہ اوہ تواڈے ایمان نُوں مضبوط کرے تے تواڈا حوصلہ ودھائے 3 تاکہ تواڈے وچوں کوئی وی ایہناں مصیبتاں دی وجہ توں ڈانوانڈول نہ ہو جائے۔ تُسی چنگی طرحاں جان دے او کہ سانوں ایہناں مصیبتاں چوں لنگھنا ای پئے گا۔ 4 جدوں اَسی تواڈے نال ساں تے اَسی توانوں دَسنے ہُنے ساں کہ سانوں ساریاں نُوں مصیبتاں سہنیاں پین گیاں تے اِنج ہویا وی اے جیویں کہ تُسی جان دے او۔ 5 مَیں تواڈی خیریت جانن لئی بڑا بے‌تاب ساں۔ ایس لئی مَیں تیمُتھیُس نُوں ایہہ پتہ کرن لئی گھلیا کہ تُسی کِنّی وفاداری نال خدا دی خدمت کر رہے او کیونکہ مینوں ڈر سی کہ کِتے شیطان نے توانوں گمراہ کر کے ساڈی محنت ضائع نہ کر دِتی ہوئے۔‏

6 پر تیمُتھیُس ہُنے ہُنے تواڈے کولوں واپس آیا اے تے اوہنے سانوں تواڈی وفاداری تے محبت بارے چنگی خبر سُنائی اے۔ اوہنے سانوں ایہہ وی دَسیا اے کہ تُسی سانوں بڑا یاد کردے او تے سانوں مِلن لئی اوناں ای ترس رہے او جِنّاں اَسی توانوں مِلن لئی ترس رہے آں۔ 7 بھراوو، بھانویں کہ سانوں بڑیاں پریشانیاں تے مصیبتاں چوں لنگھنا پے رہیا اے، پر جدوں سانوں خبر ملی کہ تُسی وفاداری نال خدمت کر رہے او تے سانوں بڑی تسلی ملی۔ 8 ایہہ سُن کے ساڈی جان چ جان آ گئی اے کہ تُسی مالک تے مضبوط ایمان رکھدے او۔ 9 سانوں تواڈی وجہ توں خدا دے حضور اینی خوشی ملی اے کہ اَسی اوہدا جِنّاں وی شکر کریئے، اوہ گھٹ اے۔ 10 اَسی دن رات ایہہ اِلتجا کرنے آں کہ اَسی توانوں مِل سکئے تے تواڈی مدد کرسکئے تاکہ تواڈے ایمان چ کوئی کمی نہ رہوے۔‏

11 دُعا اے کہ ساڈا باپ خدا تے ساڈا مالک یسوع کوئی نہ کوئی راہ کڈھن تاکہ اَسی تواڈے کول آ سکئے۔ 12 نالے ایہہ وی دُعا اے کہ مالک دی مدد نال تواڈی اِک دُوجے لئی سگوں سارے لوکاں لئی محبت ودھدی جائے۔ ہاں، تواڈے دل محبت نال بھر جان جیویں ساڈے دل تواڈے لئی محبت نال بھرے ہوئے نیں 13 تاکہ اوس ویلے ساڈے خدا تے باپ دے حضور تواڈے دل مضبوط، بے اِلزام تے پاک ہون*‏ جدوں ساڈے مالک یسوع دی موجودگی ہوئے گی تے اوہدے سارے مُقدس لوک اوہدے نال ہون گے۔‏