متی دی اِنجیل
28 سبت دے بعد ہفتے دے پہلے دن* سرگی ویلے مریم مگدلینی تے دُوجی مریم قبر تے آئیاں۔
2 تے ویکھو! اوہناں دے اوتھے پونچن توں پہلاں ای اِک بوہت وڈا زلزلہ آیا سی کیونکہ یہوواہ* دا فرشتہ اسمان توں اُتریا سی تے قبر دے سامنیوں پتھر ہٹا کے اوہدے اُتے بیٹھا ہویا سی۔ 3 اوہ بجلی وانگوں لِشک رہیا سی تے اوہدے کپڑے برف وانگوں چِٹے سن۔ 4 اوہنوں ویکھ کے پہرےدار ڈر گئے تے تھرتھر کمبن لگ پئے تے اِنج ہو گئے جیویں مر ای گئے نیں۔
5 پر فرشتے نے عورتاں نُوں کہیا: ”ڈرو نہ کیونکہ مینوں پتہ اے کہ تُسی یسوع نُوں لبھ رہیاں او جنہوں سُولی تے چڑھایا گیا سی۔ 6 اوہ ہُن ایتھے نئیں اے کیونکہ جیویں اوہنے کہیا سی، اوہنوں زندہ کر دِتا گیا اے۔ آؤ، اوہ جگہ ویکھو جِتھے اوہنوں رکھیا گیا سی۔ 7 ہُن تُسی فٹافٹ جاکے اوہدے شاگرداں نُوں دَسو کہ اوہ مُردیاں چوں زندہ ہو گیا اے تے اوہ تواڈے توں پہلاں گلیل پونچے گا۔ تُسی اوہنوں اوتھے ملنا۔ مَیں توانوں ایہی گل دَسن آیا ساں۔“
8 اوہ عورتاں بوہت ڈر گئیاں پر خوش وی بڑیاں ہوئیاں۔ ایس لئی اوہ اوتھوں چھیتی نکلیاں تے بھج کے شاگرداں نُوں ایہہ خبر دین گئیاں۔ 9 تے ویکھو! راہ چ اوہناں نُوں یسوع ملیا تے اوہنے اوہناں نُوں کہیا: ”خوش رہوو۔“ اوہناں نے اوہدے اَگے جُھک کے اوہنوں سلام کیتا تے اوہدے پیر پھڑ لئے۔ 10 یسوع نے اوہناں نُوں کہیا: ”ڈرو نہ، جاکے میرے بھراواں نُوں دَسو تاکہ اوہ گلیل جان۔ مَیں اوہناں نُوں اوتھے ملاں گا۔“
11 جدوں اوہ جا رہیاں سن تے کجھ پہرےداراں نے شہر وچ جاکے اوہ ساریاں گلاں جیہڑیاں قبر تے ہوئیاں سن وڈے کاہناں نُوں دَسیاں۔ 12 فیر وڈے کاہن تے بزرگ جمع ہوئے تے اوہناں نے آپس چ مشورہ کر کے پہرےداراں نُوں بوہت سارے چاندی دے سِکّے دِتے 13 تے اوہناں نُوں کہیا: ”تُسی لوکاں نُوں ایہہ دَسنا کہ ”رات نُوں جدوں اَسی سوں رہے ساں تے اوہدے شاگرد آئے تے اوہدی لاش چوری کر کے لے گئے۔“ 14 تے جے ایہہ گل حاکم دے کناں تک پونچی تے اَسی اوہنوں سمجھا دَواں گے۔ تُسی ایہدی فکر بالکل نہ کرنا۔“ 15 ایس لئی پہرےداراں نے چاندی دے سِکّے لئے تے اُنج ای کیتا جیویں اوہناں نُوں کہیا گیا سی تے اوہناں دی ایہہ کہانی اَج تک یہودیاں چ پھیلی ہوئی اے۔
16 فیر 11 شاگرد گلیل چ اوسے پہاڑ تے گئے جِتھے یسوع نے اوہناں نُوں آن لئی کہیا سی۔ 17 جدوں اوہناں نے اوہنوں ویکھیا تے اوہدے اَگے جُھک کے سلام کیتا۔ پر کجھ شاگرداں نُوں شک سی کہ اوہ یسوع اے۔ 18 یسوع نے اوہناں کول آ کے کہیا: ”اسمان تے زمین دا سارا اِختیار مینوں دِتا گیا اے۔ 19 ایس لئی جاؤ، ساریاں قوماں دے لوکاں نُوں شاگرد بناؤ تے اوہناں نُوں باپ تے بیٹے تے پاک روح دے ناں تے بپتسمہ دَوو 20 تے اوہناں نُوں اوہناں ساریاں گلاں تے عمل کرنا سکھاؤ جنہاں دا مَیں توانوں حکم دِتا اے۔ تے ویکھو! مَیں دُنیا دے آخری زمانے تک ہر ویلے تواڈے نال رہواں گا۔“