کُرنتھیوں دے ناں پہلا خط
12 بھراوو، مَیں چاہنا واں کہ تُسی پاک روح دے ذریعے مِلن والیاں نعمتاں بارے صحی سمجھ رکھو۔ 2 تُسی جیہڑے غیریہودی او، ایمان لیان توں پہلاں تُسی گمراہ ہو کے بےزبان بُتاں دی پوجا تے غلامی کردے سو تے اوہناں دے پچھے لگے ہوئے سو۔ 3 تُسی ایہہ گل سمجھ لوو کہ جے کوئی بندہ کہندا اے کہ ”یسوع لعنتی اے،“ تے اوہ خدا دی پاک روح دی رہنمائی چ نئیں چلدا سگوں جیہڑا بندہ کہندا اے کہ ”یسوع مالک اے،“ اوہی پاک روح دی رہنمائی چ چلدا اے۔
4 خدا نے فرق فرق نعمتاں دِتیاں نیں۔ پر اوہ ساریاں نعمتاں پاک روح دے ذریعے ای دیندا اے۔ 5 خدمت کرن دے وی فرق فرق طریقے نیں۔ پر اَسی سارے اِکو مالک دی خدمت کر رہے آں۔ 6 پاک روح دی رہنمائی چ لوک فرق فرق کم کردے نیں۔ پر اِکو ای خدا اے جیہڑا ہر اِک نُوں ایہہ کم کرن دی طاقت دیندا اے۔ 7 پاک روح دے ذریعے ہر اِک نُوں جیہڑی وی نعمت مِلدی اے، اوہ دُوجیاں دے فائدے لئی ہوندی اے۔ 8 ایسے روح دے ذریعے اِک بندے نُوں حکمت بھریاں گلاں کرن دی نعمت مِلدی اے تے ایسے روح دے ذریعے دُوجا بندہ علم والیاں گلاں کرن دے قابل ہوندا اے۔ 9 ایسے روح دے ذریعے اِک بندے نُوں ایمان مِلدا اے تے ایسے روح دے ذریعے ای دُوجے نُوں شفا دین دی نعمت مِلدی اے۔ 10 ایسے روح دے ذریعے کسے نُوں معجزے کرن دی، کسے نُوں پیشینگوئیاں کرن دی،* کسے نُوں خدا وَلّوں مِلن والے پیغام سمجھن دی، کسے نُوں فرق فرق زباناں بولن دی تے کسے نُوں اوہناں زباناں دا ترجمہ کرن دی نعمت مِلدی اے۔ 11 ایہہ سارے کم خدا دی پاک روح دے ذریعے ای ہوندے نیں تے خدا ہر اِک نُوں اپنی مرضی مطابق نعمتاں دیندا اے۔
12 جسم دے بوہت سارے حصے ہوندے نیں پر جسم اِک ای ہوندا اے۔ بھانویں کہ حصے بوہت سارے ہوندے نیں پر ایہہ اِک ای جسم نال جُڑے ہوندے نیں۔ مسیح دا جسم وی ایسے طرحاں ای اے۔ 13 اَسی سارے اِکو ای روح دے ذریعے بپتسمہ لے کے اِک جسم بن گئے فیر بھانویں اَسی یہودی آں یاں یونانی، غلام آں یاں آزاد۔ سانوں ساریاں نُوں اِک ای روح ملی اے۔
14 انسان دا جسم صرف اِک حصے نال نئیں بنیا ہوندا سگوں ایہدے بوہت سارے حصے ہوندے نیں۔ 15 جے پیر کہوے کہ ”مَیں ہتھ نئیں آں، ایس لئی مَیں جسم دا حصہ نئیں آں،“ تے ایہدا مطلب ایہہ نئیں کہ اوہ واقعی جسم دا حصہ نئیں ہوندا۔ 16 جے کن کہوے کہ ”مَیں اَکھ نئیں آں، ایس لئی مَیں جسم دا حصہ نئیں آں،“ تے ایہدا مطلب ایہہ نئیں کہ اوہ واقعی جسم دا حصہ نئیں ہوندا۔ 17 جے پورا جسم اَکھ ای ہوندا تے فیر اَسی سُن دے کیویں؟ تے جے پورا جسم کن ای ہوندا تے فیر اَسی سُنگھدے کیویں؟ 18 پر خدا نے اپنی مرضی نال جسم دے ہر حصے نُوں اوہدی جگہ تے رکھیا اے۔
19 جے سارے جسم چ اِک ای حصہ ہوندا تے فیر ایہہ جسم نہ ہوندا۔ 20 اصل چ حصے تے بوہت سارے نیں پر جسم اِک ای اے۔ 21 اَکھ ہتھ نُوں نئیں کہہ سکدی کہ ”مینوں تیری ضرورت نئیں اے،“ تے نہ ای سِر پیر نُوں کہہ سکدا اے کہ ”مینوں تیری ضرورت نئیں اے۔“ 22 جسم دے جیہڑے حصیاں نُوں کمزور سمجھیا جاندا اے، اوہ وی ضروری ہوندے نیں 23 تے جیہڑے حصے سانوں سوہنے نئیں لگدے، اوہناں تے اَسی زیادہ توجہ دینے آں۔* نالے جسم دے جیہڑے حصے اَسی دُوجیاں نُوں نئیں وکھانا چاہندے، اوہناں نُوں اَسی ڈھک کے رکھنے آں۔ 24 پر جیہڑے حصے سوہنے ہوندے نیں، اوہناں نُوں زیادہ توجہ دی ضرورت نئیں ہوندی۔ خدا نے جسم نُوں اِنج بنایا اے کہ اوہناں حصیاں نُوں زیادہ توجہ دِتی جائے جنہاں چ کوئی کمی اے 25 تاکہ سارے حصے مِل کے کم کرن* تے اِک دُوجے دا خیال رکھن۔ 26 جے اِک حصے نُوں تکلیف ہوندی اے تے جسم دے باقی حصیاں نُوں وی تکلیف ہوندی اے۔ جے جسم دے اِک حصے دی تعریف ہوندی اے تے باقی حصے اوہدے نال خوش ہوندے نیں۔
27 تُسی مسیح دا جسم او تے تواڈے وچوں ہر اِک اوہدے جسم دا حصہ اے۔ 28 خدا نے کلیسیا چ ہر کسے نُوں فرق فرق ذمےداریاں دِتیاں نیں: پہلے رسول، دُوجے نبی تے تیجے اُستاد۔ فیر اوہنے کجھ نُوں معجزے کرن دی، کجھ نُوں شفا دین دی، کجھ نُوں مدد کرن دی، کجھ نُوں رہنمائی کرن دی تے کجھ نُوں فرق فرق زباناں بولن دی نعمت دِتی۔ 29 پر کیہہ سارے رسول یاں نبی یاں اُستاد نیں؟ کیہہ معجزے کرن دی نعمت ساریاں نُوں ملی اے؟ 30 کیہہ شفا دین، فرق فرق زباناں بولن تے اوہناں زباناں دا ترجمہ کرن دی نعمت ساریاں نُوں ملی اے؟ نئیں۔ 31 ایس لئی اوہ نعمتاں حاصل کرن دی پوری کوشش کرو جیہڑیاں زیادہ اہم نیں۔ پر ہُن مَیں توانوں دَسنا چاہنا واں کہ ایہناں نعمتاں توں وی زیادہ اہم کیہہ اے۔