اِفسیوں دے ناں خط
6 بچیو، خدا چاہندا اے کہ تُسی اپنے ماں پیو دا کہنا منو کیونکہ اوہدی نظر چ اِنج کرنا صحی اے۔ 2 اوہنے حکم دِتا اے کہ ”تُوں اپنے ماں پیو دی عزت کرِیں۔“ ایہہ اوہ پہلا حکم اے جدے نال ایہہ وعدہ وی کیتا گیا اے: 3 ”فیر تُوں سلامت رہویں گا* تے زمین تے تیری عمر لمی ہووے گی۔“ 4 تُسی جیہڑے باپ او، اپنے بچیاں نُوں غصہ نہ دَواؤ سگوں اوہناں نُوں یہوواہ دے اصولاں تے ہدیتاں* مطابق پالو۔
5 غلامو، اپنے مالکاں دا کہنا منو، اوہناں دا ڈر رکھو تے بالکل اُنج ای اوہناں دی تابعداری کرو جیویں تُسی مسیح دی کردے او۔ 6 نالے انساناں نُوں خوش کرن لئی صرف اوہدوں ای اِنج نہ کرو جدوں کوئی توانوں ویکھ رہیا ہوئے سگوں مسیح دے غلام ہون دی وجہ توں جیجان نال خدا دی مرضی پوری کرو۔ 7 پورے دل نال اپنے مالکاں دی خدمت کرو، ایہہ سمجھ کے کہ تُسی انساناں دی نئیں سگوں یہوواہ دی خدمت کر رہے او 8 کیونکہ توانوں پتہ اے کہ جیہڑا بندہ بھلائی کردا اے، اوہدا اَجر اوہنوں یہوواہ وَلّوں مِلدا اے فیر بھانویں اوہ غلام ہووے یاں آزاد۔ 9 مالکو، تُسی وی ایہہ گلاں یاد رکھو تے اپنے غلاماں نال چنگا سلوک کرو تے اوہناں نُوں ڈراؤ دھمکاؤ نہ کیونکہ توانوں پتہ اے کہ تواڈا تے اوہناں دا مالک اسمان تے وے تے اوہ کسے دی طرفداری نئیں کردا۔
10 آخر چ مَیں توانوں تاکید کرنا واں کہ تُسی مالک توں طاقت حاصل کردے جاؤ تے اوہدی عظیم قوت دے ذریعے تگڑے ہوندے جاؤ۔ 11 تُسی اوہ ساریاں چیزاں پا لوو تے اوہ ہتھیار بنھ لوو* جیہڑے خدا نے توانوں دِتے نیں تاکہ تُسی اِبلیس دِیاں چالاں دا ڈٹ کے مقابلہ کر سکو 12 کیونکہ ساڈی جنگ* انساناں نال نئیں سگوں حکومتاں، اِختیار والیاں تے ایس ہنیری دُنیا دے حاکماں یعنی باغی فرشتیاں دی اسمانی فوجاں نال اے۔ 13 ایس لئی تُسی اوہ ساریاں چیزاں پا لوو تے اوہ ہتھیار بنھ لوو جیہڑے خدا نے توانوں دِتے نیں تاکہ تُسی بھیڑے وقت دا سامنا کر سکو۔ ایس تیاری دے بعد ای تُسی ڈٹے رہوو گے۔
14 ایس لئی ڈٹ کے کھڑے رہوو تے اپنے لک دَوالے سچائی دی پیٹی* بنھ لوو، نیکی دا سینہبند پاؤ 15 تے پیراں چ جُتی پا کے امن دی خوشخبری سُنان لئی تیار رہوو۔ 16 ایہدے نال نال ایمان دی وڈی ڈھال وی پھڑی رکھو جدے نال تُسی شیطان دے سارے بلدے ہوئے تیراں نُوں بجھا سکو گے۔ 17 نالے سِر تے نجات دا ہیلمٹ پا لوو تے پاک روح دی تلوار یعنی خدا دا کلام پھڑی رکھو۔ 18 ایہدے علاوہ ہر موقعے تے پاک روح دی رہنمائی چ ہر طرحاں دی دُعا تے اِلتجا کردے رہوو، ہاں جاگدے رہوو تاکہ تُسی مُقدس لوکاں لئی ہر ویلے اِلتجا کر سکو۔ 19 میرے لئی وی دُعا کرو کہ جدوں مَیں گل کراں تے میری زبان تے صحی لفظ آن تے مَیں دلیری نال مُقدس راز دی خوشخبری سُنا سکاں۔ 20 خدا نے ای مینوں خوشخبری سُنان لئی گھلیا اے،* ایسے لئی مینوں زنجیراں چ بنھیا گیا اے۔ میرے لئی دُعا کرو کہ مَیں دلیری نال خوشخبری سُنا سکاں جیویں مینوں سُنانی چاہی دی اے۔
21 میرا پیارا بھرا تے ساڈے مالک دا وفادار خادم تخِکُس توانوں میرے بارے سارا کجھ دَسے گا تاکہ توانوں پتہ چل جائے کہ میرا کیہہ حال اے تے مَیں کیہہ کر رہیا واں۔ 22 مَیں اوہنوں تواڈے کول ایسے لئی گھل رہیا واں تاکہ اوہ توانوں ساڈا حال چال دَسے تے تواڈے دِلاں نُوں تسلی دَوے۔
23 میری دُعا اے کہ ساڈے باپ خدا تے ساڈے مالک یسوع مسیح وَلّوں بھراواں نُوں سلامتی، پیار تے ایمان ملے 24 تے اوہناں ساریاں تے خدا دی عظیم رحمت ہووے جیہڑے مالک یسوع مسیح نال سچا پیار کردے نیں۔