مرقس دی اِنجیل
4 یسوع فیر جھیل دے کنارے بہہ کے تلیم دین لگ پیا تے لوکاں دی اِک وڈی بِھیڑ اوہدے آلے دَوالے جمع ہو گئی۔ ایس لئی یسوع اِک کشتی چ بہہ کے کنارے توں تھوڑا دُور چلا گیا۔ پر لوک کنارے تے کھلوتے رہے۔ 2 یسوع اوہناں نُوں مثالاں دے کے بوہت ساریاں گلاں سکھان لگ پیا تے تلیم دیندے ہوئیاں اوہنے اوہناں نُوں کہیا: 3 ”سُنو، اِک کسان بیہہ بون گیا۔ 4 جدوں اوہ بیہہ بو رہیا سی تے کجھ بیہہ راہ دے کنارے ڈِگ پئے تے پرندیاں نے آ کے اوہناں نُوں چُگ لیا۔ 5 کجھ بیہہ پتھریلی زمین تے ڈِگے جِتھے مٹی بوہتی ڈُونگی نئیں سی ایس لئی اوہ چھیتی اُگ پئے۔ 6 پر جدوں سورج نکلیا تے اوہ تیز دُھپ دی وجہ توں سُک گئے کیونکہ اوہناں نے جڑ نئیں پھڑی سی۔ 7 کجھ بیہہ کنڈیاں والیاں جھاڑیاں چ ڈِگے تے جھاڑیاں نے ودھ کے اوہناں نُوں دبا دِتا۔ ایس لئی اوہ کوئی پھل نہ لیائے۔ 8 پر کجھ بیہہ ودھیا زمین تے ڈِگے تے ودھے پُھلے تے پھل دین لگ پئے۔ کسے نے 30 گُنا، کسے نے 60 گُنا تے کسے نے 100 گُنا پھل دِتا۔“ 9 فیر اوہنے کہیا: ”کن لا کے سُنو کہ مَیں کیہہ کہہ رہیا واں۔“
10 جدوں اوہ کلّا سی تے 12 رسول تے کجھ ہور شاگرد اوہدے کولوں مثالاں دا مطلب پچھن لگ پئے۔ 11 اوہنے اوہناں نُوں کہیا: ”اسمان دی بادشاہی دے مُقدس راز دی سمجھ توانوں دِتی گئی اے۔ پر باقی لوکاں لئی ایہہ گلاں بس مثالاں ای نیں 12 کیونکہ اوہ ویکھدے ہوئے وی نئیں ویکھدے تے سُندے ہوئے وی نئیں سُندے تے نہ ای میریاں گلاں دا مطلب سمجھدے نیں۔ اوہ نہ تے کدی بدلن گے تے نہ ای معافی پان گے۔“ 13 فیر اوہنے اوہناں نُوں کہیا: ”جے تُسی ایس مثال دا مطلب نئیں سمجھے تے باقی ساریاں مثالاں دا مطلب کیویں سمجھو گے؟
14 کسان خدا دا کلام بوندا اے۔ 15 راہ دے کنارے ڈِگن والے بیہہ اوہناں لوکاں وَل اشارہ کردے نیں جیہڑے کلام نُوں سُندے نیں۔ پر شیطان فوراً آ کے اوس کلام نُوں کڈھ لیندا اے جیہڑا اوہناں دے دل چ بویا گیا سی۔ 16 پتھریلی زمین تے ڈِگن والے بیہہ اوہناں وَل اشارہ کردے نیں جیہڑے کلام نُوں سُن کے ایہنوں چھیتی نال خوشی خوشی قبول کر لیندے نیں۔ 17 پر کلام نے اوہناں دے دل چ جڑ نئیں پھڑی ہوندی۔ فیر وی اوہ تھوڑے چِر لئی اوہدے تے ایمان رکھدے نیں۔ پر جدوں کلام دی وجہ توں اوہناں نُوں مصیبتاں یاں ظلم دا سامنا ہوندا اے تے اوہ اوہدے تے ایمان رکھنا چھڈ دیندے نیں۔ 18 جیہڑے بیہہ کنڈیاں والیاں جھاڑیاں چ ڈِگے، اوہ اوہناں لوکاں وَل اشارہ کردے نیں جیہڑے کلام سُندے تے ہے نیں 19 پر ایس دُنیا دِیاں فکراں تے دولت دی دھوکھا دین والی طاقت تے باقی ساریاں چیزاں دی خواہش اوہناں دے دل تے قبضہ کر کے کلام نُوں دبا دیندی اے۔ ایس لئی اوہ کوئی پھل نئیں لیاندے۔ 20 پر جیہڑے بیہہ ودھیا زمین تے بوئے گئے، اوہ اوہناں لوکاں وَل اشارہ کردے نیں جیہڑے کلام نُوں سُن کے اوہنوں قبول کردے نیں تے پھل وی لیاندے نیں۔ کوئی 30 گُنا، کوئی 60 گُنا تے کوئی 100 گُنا۔“
21 یسوع نے اوہناں نُوں ایہہ وی کہیا: ”بھلا کیہہ کوئی دِیوا بال کے اوہنوں ٹوکری یاں منجی تھلے رکھدا اے؟ کیہہ دِیوا بال کے اُچی تھاں تے نئیں رکھیا جاندا؟ 22 جیہڑی وی چیز تے پردہ پیا ہویا اے اوہنوں بےپردہ کیتا جائے گا تے جیہڑی وی گل راز چ وے اوہنوں ظاہر کیتا جائے گا۔ 23 کن لا کے سُنو کہ مَیں کیہہ کہہ رہیا واں۔“
24 اوہنے اوہناں نُوں ایہہ وی کہیا: ”تُسی جو وی سُن رہے او، اوہنوں دھیان نال سُنو۔ جیس حساب نال تُسی دُوجیاں نُوں ناپ کے دیندے او، اوہ وی توانوں اوسے حساب نال ناپ کے دین گے سگوں توانوں ہور وی زیادہ دِتا جائے گا۔ 25 کیونکہ جدے کول ہے وے اوہنوں ہور وی دِتا جائے گا۔ پر جدے کول نئیں اے، اوہدے کولوں اوہ وی لے لیا جائے گا جو اوہدے کول ہے وے۔“
26 یسوع نے اوہناں نُوں ایہہ وی کہیا: ”خدا دی بادشاہی اوس بندے ورگی اے جنہے کھیت چ بیہہ بویا۔ 27 اوہ ہر رات سوندا تے ہر دن اُٹھدا اے۔ وقت دے نال نال بیہہ ودھدے نیں تے بُوٹے نکلدے نیں۔ پر اوہنوں پتہ نئیں چلدا کہ ایہہ سب کجھ کیویں ہو رہیا اے۔ 28 ہولی ہولی زمین اپنے آپ پھل دیندی اے۔ پہلاں بیہہ چوں بُوٹا نکلدا اے۔ فیر اوہنوں سِٹا لگدا اے تے فیر سِٹا دانیاں نال بھر جاندا اے۔ 29 فیر جیویں ای فصل پک جاندی اے تے واڈھی دا ویلا آ جاندا اے تے اوہ ایہنوں داتری نال وڈھ لیندا اے۔“
30 فیر یسوع نے کہیا: ”اَسی خدا دی بادشاہی نُوں کِدے ورگا کہہ سکنے آں؟ یاں ایہنوں سمجھان لئی کیہڑی مثال استمال کر سکنے آں؟ 31 ایہہ رائی دے دانے ورگی اے جیہڑا زمین چ بوئے جان والے سارے بیہیاں نالوں چھوٹا ہوندا اے۔ 32 پر جدوں ایہہ بویا جاندا ا ے تے فیر ایہہ ودھدے ودھدے سارے پودیاں نالوں وڈا ہو جاندا اے تے ایہدیاں ٹاہنیاں اینیاں وڈیاں ہو جاندیاں نیں کہ اسمان چ اُڈن والے پرندے ایہدی چھاں چ آ کے اپنے آلنے بناندے نیں۔“
33 خدا دا کلام سمجھان لئی یسوع ایہو جہیاں کئی مثالاں دیندا سی۔ پر اوہ لوکاں نُوں اوناں سکھاندا سی جِنّاں اوہ سمجھ سکدے سن۔ 34 اصل چ اوہ لوکاں نال گل کردے ویلے ہمیشاں مثالاں استمال کردا سی۔ پر جدوں اوہ اپنے شاگرداں نال کلّا ہوندا سی تے اوہ اوہناں نُوں ساریاں گلاں دا مطلب سمجھا دیندا سی۔
35 اوسے دن شام نُوں یسوع نے شاگرداں نُوں کہیا: ”آؤ، جھیل دے دُوجے پاسے چلئے۔“ 36 ایس لئی لوکاں نُوں گھلن دے بعد شاگرد یسوع نال کشتی چ بہہ کے اوتھوں چلے گئے۔ اوہناں دی کشتی دے نال ہور وی کشتیاں سن۔ 37 جھیل چ اچانک بوہت وڈا طوفان آ گیا تے چھلاں زور زور دی کشتی نال ٹکران لگ پئیاں جدی وجہ توں کشتی پانی نال بھرن لگ پئی۔ 38 پر یسوع کشتی دے پچھلے حصے چ اِک سرھانے اُتے سِر رکھ کے سُتا ہویا سی۔ شاگرداں نے اوہنوں جگا کے کہیا: ”اُستاد! اَسی ڈُبن والے آں۔ کیہہ تینوں ساڈی کوئی فکر نئیں؟“ 39 فیر اوہنے اُٹھ کے نھیری نُوں جِھڑکیا تے کہیا: ”شش، چپ!“ تے ہوا رُک گئی تے ہر پاسے سکون ہو گیا۔ 40 فیر اوہنے شاگرداں نُوں کہیا: ”تُسی اینے ڈرے ہوئے کیوں او؟ کیہہ تُسی حالے وی ایمان نئیں رکھدے؟“ 41 پر اوہ بوہت ای ڈرے ہوئے سن۔ اوہ اِک دُوجے نُوں کہن لگ پئے: ”ایہہ کون اے؟ ایہدا کہنا تے ہوا تے پانی وی من دے نیں۔“