عبرانیوں دے ناں خط
8 اَسی توانوں جو کجھ وی دَسیا اے، اوہدے چوں سب توں اہم گل ایہہ وے کہ ساڈا اعلیٰ کاہن واقعی بےمثال* اے۔ اوہ اسمان تے عظیم خدا دے تخت دے سجے پاسے بہہ گیا اے۔ 2 اوہ اصلی خیمے دے پاکترین کمرے* چ خدمت کردا اے جنہوں کسے انسان نے نئیں سگوں یہوواہ نے کھڑا کیتا اے۔ 3 ہر اعلیٰ کاہن دی ذمےداری ہوندی اے کہ اوہ نذرانے تے قربانیاں چڑھائے۔ ایس لئی ساڈے اعلیٰ کاہن لئی وی ضروری سی کہ اوہ قربانی چڑھائے۔ 4 جے اوہ زمین تے ہوندا تے اوہ کاہن نہ ہوندا کیونکہ شریعت دے مطابق نذرانے پیش کرن لئی پہلاں ای کاہن ہے سن۔ 5 اوہناں کاہناں دی خدمت اسمانی چیزاں دی نقل تے پرچھاواں اے* کیونکہ جدوں موسیٰ خیمہ بنان والا سی تے خدا نے اوہنوں ایہہ حکم دِتا: ”تُوں دھیان نال ساریاں چیزاں اوس نمونے مطابق بنائیں جیہڑا تینوں پہاڑ تے وکھایا گیا سی۔“ 6 پر یسوع نُوں جیہڑی خدمت کرن دی ذمےداری دِتی گئی اے، اوہ ایہناں کاہناں دی خدمت نالوں کِتے ودھیا اے کیونکہ اوہ پرانے عہد* نالوں وی ودھیا عہد* دا وِچولا* اے۔ ایس عہد دی بنیاد زیادہ شاندار* وعدے نیں تے ایہنوں قانونی حیثیت دِتی گئی اے۔
7 جے پہلے عہد چ کوئی کمی نہ ہوندی* تے دُوجے عہد دی ضرورت ای نہ پیندی۔ 8 خدا نے ویکھیا کہ لوک پہلے عہد مطابق صحی طرحاں نئیں چل رہے۔ ایس لئی پاک کلام چ لکھیا اے: ”یہوواہ کہندا اے: ”ویکھو! اوہ دن آ رہیا اے جدوں مَیں اِسرائیل دے گھرانے تے یہوداہ دے گھرانے نال اِک نواں عہد بنھاں گا۔““ 9 یہوواہ نے ایہہ وی کہیا: ”ایہہ عہد اوس عہد ورگا نئیں ہوئے گا جیہڑا مَیں اوہناں دے پیو دادیاں نال اوس دن بنھیا جدوں مَیں اوہناں دا ہتھ پھڑ کے اوہناں نُوں مصر چوں کڈھیا سی۔ اوہ اوس عہد تے قائم نئیں رہے جیہڑا مَیں اوہناں نال کیتا سی۔ ایس لئی مَیں اوہناں دا ساتھ چھڈ دِتا۔“
10 نالے یہوواہ نے کہیا: ”اوہناں دِناں دے بعد مَیں اِسرائیل دے گھرانے نال ایہہ عہد بنھاں گا: مَیں اپنے حکم اوہناں دے ذہن چ پاواں گا تے اوہناں دے دِلاں تے لکھاں گا۔ مَیں اوہناں دا خدا ہوواں گا تے اوہ میرے بندے ہون گے۔
11 فیر اوہناں وچوں کسے نُوں وی اپنے گوانڈھی یاں اپنے بھرا نُوں ایہہ سکھان دی ضرورت نئیں ہوئے گی کہ ”یہوواہ نُوں جان“ کیونکہ اوہ سارے، چھوٹے توں لے کے وڈے تک مینوں جان دے ہون گے۔ 12 مَیں اوہناں دے بھیڑے کماں نُوں معاف کراں گا تے اوہناں دے گُناہواں نُوں دُبارہ یاد نئیں کراں گا۔“
13 خدا نے ”نویں عہد“ دا ذکر ایس لئی کیتا کیونکہ اوہنے پہلے عہد نُوں ختم کرنا سی۔ ہُن اوہ وقت دُور نئیں جدوں پہلے عہد نُوں ختم کر دِتا جائے گا کیونکہ اوہ پرانا ہو گیا اے۔