کُرنتھیوں دے ناں دُوجا خط

5 اَسی جاننے آں کہ زمین تے ساڈا گھر*‏ اِک خیمے وانگوں اے جیہڑا ڈھا دِتا جائے گا۔ فیر خدا سانوں اسمان تے اِک گھر دَوے گا یعنی ایہو جہی عمارت جیہڑی ہتھاں نال نئیں بنی ہوئی سگوں ہمیشاں قائم رہوے گی۔ 2 زمین تے ایس گھر چ اَسی ہوکے بھرنے آں۔ ایس لئی اَسی اوس گھر چ رہن لئی بے‌تاب آں جیہڑا سانوں اسمان تے ملے گا۔‏*‏ 3 جدوں سانوں اوہ گھر مِل جائے گا تے اَسی بے‌گھر*‏ نئیں ہوواں گے۔ 4 اصل چ اَسی ایس خیمے وچ پریشانیاں دے بوجھ تھلے دبے ہوئے آں تے ہوکے بھرنے آں۔ ایہہ گل نئیں اے کہ اَسی ایس خیمے نُوں چھڈنا چاہنے آں پر ساڈی خواہش اے کہ سانوں اسمان تے اپنا گھر ملے تاکہ زمین تے تھوڑی دیر دی زندگی*‏ دے بدلے سانوں اسمان تے ہمیشاں دی زندگی مِل جائے۔ 5 خدا نے سانوں اوہی زندگی دین لئی تیار کیتا اے۔ نالے سانوں پاک روح دِتی اے جیہڑی مستقبل چ مِلن والی وراثت*‏ دا بیعانہ اے۔‏

6 ایس لئی سانوں ایس گل تے پورا بھروسا اے۔ نالے سانوں پتہ اے کہ جدوں تک ساڈے کول زمین تے گھر یعنی ایہہ جسم اے، اوہدوں تک اَسی مالک کول نئیں جا سکدے۔ 7 ایس لئی اَسی نظر آن والیاں چیزاں تے بھروسا کرن دی بجائے ایمان دے مطابق چلنے آں۔ 8 سانوں پورا بھروسا اے کہ ساڈی امید ضرور پوری ہوئے گی تے اَسی چاہنے آں کہ اَسی ایس جسم نال زندگی گزارن دی بجائے مالک دے نال*‏ زندگی گزاریئے۔ 9 ایس لئی اَسی پکا ارادہ کیتا اے کہ اَسی ہمیشاں اوہ کم کراں گے جدے توں مالک خوش ہوئے فیر بھانویں اَسی اوہدے نال*‏ ہوئیے یاں نئیں 10 کیونکہ سانوں ساریاں نُوں مسیح دی عدالت دے تخت سامنے پیش کیتا جائے گا تاکہ ہر اِک نُوں اوہناں چنگے یاں بھیڑے کماں دا پھل ملے جیہڑے اوہنے زمین تے*‏ کیتے سن۔‏

11 ایہہ جان دے ہوئے اَسی مالک دا خوف رکھنے آں تے پوری کوشش کرنے آں کہ لوک وی اوہدی تلیم تے ایمان لیان۔ خدا چنگی طرحاں جان دا اے کہ اَسی کیہو جہے انسان آں تے امید اے کہ تُسی*‏ وی چنگی طرحاں جان گئے او کہ اَسی کیہو جہے*‏ آں۔ 12 اَسی تواڈے تے اپنی نیک نامی نئیں جتا رہے سگوں اَسی توانوں حوصلہ دینا چاہنے آں کہ تُسی ساڈے اُتے مان کرو۔ فیر تُسی اوہناں لوکاں نُوں جواب دے سکو گے جیہڑے خوبیاں*‏ دی بجائے اوہناں چیزاں تے شیخی ماردے نیں جیہڑیاں نظر آندیاں نیں۔‏*‏ 13 جے کسے نُوں لگدا اے کہ اَسی پاگل آں تے اَسی خدا دی خاطر پاگل آں۔ جے اَسی سمجھدار آں تے اَسی تواڈی خاطر سمجھدار آں۔ 14 مسیح نے جیہڑی محبت ظاہر کیتی، اوہ سانوں مجبور کردی اے*‏ کیونکہ اَسی سمجھ گئے آں کہ اِک آدمی ساریاں دی خاطر مریا۔ ایہہ ایس لئی ضروری سی کیونکہ سارے انسان مرے ہوئے سن۔‏*‏ 15 پر اوہ ساریاں لئی مریا تاکہ انسان اَگے توں اپنے لئی نئیں سگوں اوہدے لئی جین جنہے اوہناں دی خاطر اپنی جان دے دِتی تے جنہوں بعد چوں زندہ کیتا گیا۔‏

16 ہُن اَسی کسے نُوں وی انسانی نظریے نال نئیں ویکھدے۔‏*‏ جے اَسی پہلاں مسیح نُوں انسانی نظر نال ویکھنے وی ساں تے ہُن اَسی اِنج نئیں کردے۔ 17 ایس لئی جدوں کوئی مسیح نال اِک مُٹھ ہو جاندا اے تے خدا اوہنوں نواں*‏ بنا دیندا اے۔ پرانیاں چیزاں ختم ہو گئیاں نیں تے ویکھو!‏ نوِیاں چیزاں بن گئیاں نیں۔ 18 ایہہ سب کجھ خدا وَلّوں ہویا اے جنہے مسیح دے ذریعے ساڈے نال صلح کیتی اے تے سانوں صلح کران دی خدمت دِتی اے 19 یعنی مسیح دے ذریعے خدا لوکاں نُوں اپنے نال صلح کرن دا موقع دے رہیا اے تے اوہ اوہناں دے گُناہواں دا حساب نئیں رکھدا۔ ایس لئی اوہنے سانوں صلح دا پیغام سُنان دی ذمے‌داری دِتی اے۔‏

20 ایسے وجہ توں اَسی خدا دے نمائندے آں جیویں مسیح اوہدا نمائندہ سی۔ خدا ساڈے ذریعے لوکاں کولوں اِلتجا کر رہیا اے۔ مسیح دی جگہ اَسی لوکاں اَگے ایہہ مِنت کرنے آں:‏ ”‏خدا نال صلح کر لوو۔“‏ 21 خدا نے ساڈے گُناہواں دی خاطر مسیح نُوں قربان کیتا جنہے کدی کوئی گُناہ نئیں کیتا سی تاکہ اوہدے ذریعے اَسی خدا دِیاں نظراں چ نیک ٹھہریئے۔‏