کُرنتھیوں دے ناں دُوجا خط
6 اَسی خدا نال مِل کے کم کرنے آں۔ ایس لئی اَسی توانوں تاکید کرنے آں کہ خدا نے تواڈے تے جیہڑی عظیم رحمت کیتی اے، اوہنوں کدی نہ بُھلو سگوں اوہدے مطابق کم کرو 2 کیونکہ خدا نے کہیا اے: ”مَیں صحی وقت تے تیری سُنی تے تیرے تے مہربانی کیتی تے نجات دے دن تیری مدد کیتی۔“ ویکھو! مہربانی حاصل کرن دا وقت آ گیا اے۔ ویکھو! نجات دا دن آ گیا اے۔
3 اَسی نئیں چاہندے کہ کوئی ساڈی خدمت چوں نُقص کڈھے۔ ایس لئی اَسی کوئی وی ایہو جیہا کم نئیں کردے جیہڑا دُوجیاں نُوں بُرا لگے 4 سگوں اَسی ہر معاملے چ ثابت کرنے آں کہ اَسی خدا دی خدمت کرن دے لائق آں یعنی بوہت کجھ سہہ کے، مصیبتاں، تنگیاں تے مشکلاں برداشت کر کے، 5 مار کھا کے، قید کٹ کے، فسادی لوکاں دا سامنا کر کے، سخت محنت کر کے، راتاں نُوں بےآرام رہ کے، بُھکھے رہ کے، 6 پاک صاف زندگی گزار کے، علم مطابق چل کے، صبر توں کم لے کے، مہربانی وکھا کے، پاک روح دی رہنمائی چ چل کے، سچی محبت وکھا کے،* 7 سچ بول کے، خدا دی طاقت تے بھروسا کر کے تے سجے* تے کھبے* ہتھ چ نیکی دے ہتھیار پھڑ کے۔ 8 بھانویں ساڈی عزت کیتی جائے یاں بےعزتی تے بھانویں سانوں بدنام کیتا جائے یاں ساڈی تعریف کیتی جائے، اَسی سب کجھ سہہ لینے آں۔ سانوں دھوکھےباز سمجھیا جاندا اے پر اَسی سچ بولنے آں۔ 9 سانوں اجنبی سمجھیا جاندا اے پر خدا سانوں جان دا اے۔ سانوں موت دے لائق سمجھیا جاندا اے پر ویکھو! اَسی فیر وی جی رہے آں۔ سانوں سزا دِتی جاندی اے پر موت دے حوالے نئیں کیتا جاندا۔ 10 لوکاں نُوں لگدا اے کہ اَسی بوہت دُکھی آں پر اَسی ہمیشاں خوش رہنے آں۔ سانوں غریب سمجھیا جاندا اے پر اَسی تے بوہت سارے لوکاں نُوں امیر بنانے آں۔ دُوجیاں نُوں لگدا اے کہ ساڈے کول کجھ وی نئیں اے پر ساڈے کول تے سب کجھ اے۔
11 کُرنتھس دے بھراوو، اَسی تواڈے نال کُھل کے گل کیتی اے تے اپنے دِلاں دے دروازے تواڈے لئی کھولے نیں۔ 12 اَسی توانوں اپنے دِلاں چ بوہت جگہ دِتی اے پر تُسی سانوں اپنے دِلاں چ گھٹ جگہ دِتی اے۔ 13 ایس لئی مَیں توانوں اپنے بچے سمجھ کے کہہ رہیا واں کہ تُسی وی اپنے دل دے دروازے کھولو تے ساڈے لئی اپنے دل چ زیادہ جگہ بناؤ۔
14 غیرایمان لوکاں نال میل جول نہ رکھو۔* بھلا نیکی دا بُرائی نال کیہہ میل؟ تے روشنی دا نھیرے نال کیہہ تعلق؟ 15 یاں مسیح تے شیطان* دا کیہہ جوڑ؟ یاں ایمان والیاں دا غیرایمان والیاں نال کیہہ واسطہ؟* 16 یاں خدا دی ہیکل دا بُتاں نال کیہہ تعلق؟ یاد رکھو، اَسی زندہ خدا دی ہیکل آں جیویں کہ خدا نے کہیا اے: ”مَیں اوہناں دے نال وَساں گا تے اوہناں دے وچکار چلاں پھراں گا۔ مَیں اوہناں دا خدا ہوواں گا تے اوہ میری قوم ہون گے۔“ 17 نالے ”یہوواہ کہندا اے: ”ایس لئی اوہناں وچوں نکل آؤ تے اوہناں توں الگ ہو جاؤ تے کسے ناپاک چیز نُوں ہتھ نہ لاؤ تے فیر مَیں توانوں قبول کراں گا۔““ 18 ”نالے بےحد طاقت والا خدا یہوواہ کہندا اے: ”مَیں تواڈا باپ بناں گا تے تُسی میرے دِھیاں پُتر بنو گے۔““