عبرانیوں دے ناں خط
5 انساناں وچوں جیہڑا وی اعلیٰ کاہن چُنیا جاندا اے، اوہ خدا دی خدمت کرن چ لوکاں دی مدد کردا اے کیونکہ اوہ لوکاں لئی اوہناں دے گُناہواں دی خاطر نذرانے تے قربانیاں چڑھاندا اے۔ 2 اوہ انجانے چ غلطیاں کرن والے لوکاں لئی ہمدردی وکھا سکدا اے کیونکہ اوہنوں پتہ اے کہ اوہدے اپنے کولوں وی غلطیاں ہو جاندیاں نیں۔ 3 ایس لئی اوہنوں نہ صرف لوکاں دے گُناہواں لئی سگوں اپنے گُناہواں لئی وی قربانیاں چڑھانیاں پیندیاں نیں۔
4 کوئی وی آدمی اپنی مرضی نال اعلیٰ کاہن نئیں بن دا سگوں اوہنوں ایہہ عہدہ صرف خدا ای دے سکدا اے جیویں کہ اوہنے ہارون نُوں دِتا۔ 5 ایسے طرحاں مسیح وی اپنی مرضی نال اعلیٰ کاہن نئیں بنیا سگوں خدا نے اوہنوں ایہہ عہدہ اوہدوں دِتا جدوں اوہنے کہیا: ”تُوں میرا پُتر ایں۔ اَج توں مَیں تیرا باپ آں۔“ 6 اوہنے پاک کلام چ ایہہ وی کہیا: ”تُوں مَلکیصدق وانگوں کاہن ایں تے ہمیشاں تک کاہن رہویں گا۔“*
7 جدوں مسیح زمین تے سی تے اوہنے رو رو کے تے دُہائیاں دے دے کے خدا اَگے اِلتجاواں تے مِنتاں کیتیاں جیہڑا اوہنوں موت توں بچا سکدا سی تے اوہدی سُنی گئی کیونکہ اوہ خدا دا خوف رکھدا سی۔ 8 بھانویں کہ اوہ خدا دا پُتر سی پر فیر وی اوہنے تکلیفاں سہہ کے فرمانبرداری سکھی۔ 9 فیر جدوں اوہ ہر لحاظ نال قابل* بن گیا تے اوہنوں ایہہ ذمےداری دِتی گئی کہ اوہ اوہناں سارے لوکاں نُوں نجات تے ہمیشاں دی زندگی دَوے جیہڑے اوہدے فرمانبردار نیں 10 کیونکہ خدا نے اوہنوں مَلکیصدق ورگا اعلیٰ کاہن بنایا اے۔
11 اَسی توانوں مسیح بارے ہور وی گلاں دَسنا چاہنے آں پر توانوں سمجھانا مشکل اے کیونکہ تُسی سمجھن دی کوشش ای نئیں کردے۔* 12 ہُن تک تے توانوں دُوجیاں نُوں سکھان دے قابل ہو جانا چاہی دا سی۔ پر اصل چ توانوں اِک ایہو جہے اُستاد دی ضرورت اے جیہڑا توانوں خدا دے کلام دِیاں بنیادی گلاں فیر توں سکھائے۔ توانوں روٹی دی بجائے فیر توں دودھ دی ضرورت اے۔ 13 جیہڑا بندہ صرف دودھ* پیندا اے، اوہ اِک بچے وانگوں ہوندا اے کیونکہ اوہ خدا دے کلام نُوں نئیں جان دا جیہڑا اِک بندے نُوں نیکی کرنا سکھاندا اے۔ 14 پر روٹی* پُختہ* لوکاں لئی ہوندی اے جیہڑے اپنی سوچن سمجھن دی صلاحیت نُوں وار وار استمال کر کے صحی تے غلط چ فرق کرن دے قابل ہو جاندے نیں۔