متی دی اِنجیل

12 اِک وار سبت دے دن جدوں یسوع کنک دے کھیتاں چوں لنگھ رہیا سی تے اوہدے شاگرداں نُوں بُھکھ لگی تے اوہ کنک دے دانے پُٹ کے کھان لگ پئے۔ 2 ایہہ ویکھ کے فریسیاں نے اوہنوں کہیا:‏ ”‏ویکھ!‏ تیرے شاگرد اوہ کم کر رہے نیں جیہڑا سبت دے دن کرنا جائز نئیں اے۔“‏ 3 یسوع نے اوہناں نُوں کہیا:‏ ”‏کیہہ تُسی نئیں پڑھیا کہ جدوں داؤد تے اوہدے ساتھیاں نُوں بُھکھ لگی ہوئی سی تے اوہنے کیہہ کیتا؟ 4 اوہ خدا دے گھر چ گیا تے اوہنے تے اوہدے ساتھیاں نے نذرانے دِیاں روٹیاں کھادیاں جنہاں نُوں کھانا اوہناں لئی جائز نئیں سی کیونکہ اوہ روٹیاں صرف کاہن کھا سکدے سن۔ 5 یاں کیہہ تُسی شریعت چ نئیں پڑھیا کہ کاہن سبت دے دن وی ہیکل چ کم کردے نیں پر فیر وی اوہناں نُوں قصوروار نئیں سمجھیا جاندا؟ 6 پر مَیں توانوں کہنا واں کہ ایتھے اِک ایہو جیہا بندہ موجود اے جیہڑا ہیکل توں وی وڈا اے۔ 7 پر جے تُسی ایس گل دا مطلب سمجھدے کہ ”‏مینوں قربانیاں دی بجائے رحم پسند اے“‏ تے تُسی بے‌قصوراں تے اِلزام نہ لاندے 8 کیونکہ انسان دا بیٹا* سبت دا مالک اے۔“‏

9 اوتھوں یسوع اِک عبادت‌گاہ چ گیا 10 تے ویکھو!‏ اوتھے اِک آدمی سی جدا ہتھ سُکیا* ہویا سی۔ کجھ لوکاں نے یسوع تے اِلزام لان لئی اوہنوں پچھیا:‏ ”‏کیہہ سبت دے دن کسے نُوں شفا دینا جائز اے؟“‏ 11 یسوع نے اوہناں نُوں کہیا:‏ ”‏جے تواڈے کول اِکو ای بھیڈ اے تے اوہ سبت والے دن ٹوئے چ ڈِگ پیندی اے تے تواڈے وچوں کیہڑا اے جیہڑا اوہنوں کھچ کے ٹوئے چوں باہر نئیں کڈھے گا؟ 12 اِک انسان تے بھیڈ نالوں بوہتا اہم ہوندا اے ایس لئی سبت دے دن چنگا کم کرنا جائز اے۔“‏ 13 فیر اوہنے اوس بندے نُوں کہیا:‏ ”‏اپنا ہتھ اَگے کر۔“‏ جدوں اوہنے اپنا ہتھ اَگے کیتا تے اوہ اوہدے دُوجے ہتھ وانگوں بالکل صحی ہو گیا۔ 14 پر فریسی اوتھوں چلے گئے تے یسوع نُوں قتل کرن دی سازش گھڑن لگ پئے۔ 15 جدوں یسوع نُوں ایہدے بارے پتہ چلیا تے اوہ اوتھوں چلا گیا۔ اوہدے پچھے بوہت سارے لوک وی گئے تے جیہڑے بیمار سن یسوع نے اوہناں ساریاں نُوں ٹھیک کر دِتا۔ 16 پر اوہنے لوکاں نُوں سختی نال ایہہ وی کہیا کہ ”‏کسے نُوں نہ دَسنا کہ مَیں کون آں۔“‏ 17 اِنج یسعیاہ نبی دی کہی ایہہ گل پوری ہوئی:‏

18 ‏”‏ویکھو!‏ میرا پیارا خادم جنہوں مَیں چُنیا اے تے جدے توں مَیں خوش آں۔ مَیں اپنی روح اوہدے تے نازل کراں گا تے اوہ قوماں نُوں وکھائے گا کہ سچا اِنصاف کیہہ ہوندا اے۔ 19 اوہ نہ تے کسے نال جھگڑا کرے گا تے نہ ای رولا پائے گا تے نہ ای اوہدی آواز سڑکاں تے کسے نُوں سُنائی دَوے گی۔ 20 اوہ کسے جُھکے ہوئے کانے نُوں نئیں مِدے گا تے اوس بتی نُوں نئیں بجھائے گا جدی روشنی ختم ہون والی اے* جدوں تک کہ اوہ اِنصاف قائم کرن چ کامیاب نہ ہو جائے۔ 21 بے‌شک قوماں اوہدے ناں تے امید رکھن گیاں۔“‏

22 فیر لوک اِک آدمی نُوں یسوع کول لے کے آئے جنہوں اِک باغی فرشتہ چِمبڑیا ہویا سی تے جیہڑا اَنھا تے گُونگا وی سی۔ یسوع نے اوہنوں ٹھیک کر دِتا تے اوہ گُونگا آدمی بولن تے ویکھن لگ پیا۔ 23 ایہہ ویکھ کے لوک بڑے حیران ہوئے تے کہن لگ پئے:‏ ”‏ایہہ کِتے داؤد دا پُتر تے نئیں؟“‏ 24 ایہہ سُن کے فریسیاں نے کہیا:‏ ”‏ایہہ بندہ تے باغی فرشتیاں دے سردار بعلزبُول* دی مدد نا ل ای باغی فرشتیاں نُوں کڈھدا اے۔“‏ 25 یسوع نے اوہناں دے دل دی گل پڑھ لئی* ایس لئی اوہنے اوہناں نُوں کہیا:‏ ”‏جیس بادشاہی چ پُھٹ پے جائے، اوہ تباہ ہو جاندی اے تے جیہڑے شہر یاں گھر چ پُھٹ پے جائے، اوہ وی قائم نئیں رہندا۔ 26 ایسے طرحاں جے شیطان ای شیطان نُوں کڈھدا اے تے ایہدا مطلب اے کہ اوہنے آپ اپنی بادشاہی چ پُھٹ پا دِتی اے۔ اِنج اوہدی بادشاہی بھلا کیویں قائم رہوے گی؟ 27 نالے جے مَیں بعلزبُول دی مدد نال باغی فرشتے کڈھنا واں تے فیر تواڈے چیلے* کدی مدد نال کڈھدے نیں؟ اِنج تواڈے چیلے ای ثابت کردے نیں کہ تواڈی گل غلط اے۔ 28 پر جے مَیں خدا دی روح دی مدد نال باغی فرشتے کڈھنا واں تے سمجھ لوَو کہ خدا دی بادشاہی تواڈے سِر تے پونچ گئی اے۔ 29 یاں جے اِک بندہ کسے طاقتور آدمی دے گھر وڑھ کے اوہدا مال لُٹنا چاہندا اے تے کیہہ پہلے اوہ اوہنوں بنھے گا نئیں؟ ہاں، فیر ای تے اوہ اوہدا مال لُٹ سکے گا۔ 30 جیہڑا میرے نال نئیں، اوہ میرے خلاف اے تے جیہڑا میرے نال جمع نئیں کردا،‏* اوہ کھلاردا اے۔‏

31 ایس لئی مَیں توانوں کہنا واں کہ ہر طرحاں دا گُناہ تے کفرُ معاف کیتا جائے گا پر جیہڑا بندہ پاک روح دے خلاف کفرُ بکے گا اوہنوں معاف نئیں کیتا جائے گا۔ 32 مثال لئی، جیہڑا بندہ انسان دے بیٹے دے خلاف بولدا اے اوہنوں معاف کیتا جائے گا۔ پر جیہڑا بندہ پاک روح دے خلاف بولدا اے اوہنوں معاف نئیں کیتا جائے گا، نہ تے ایس زمانے چ، تے نہ ای آن والے زمانے چ۔‏

33 جے تواڈا درخت چنگا اے تے پھل وی چنگا ہوئے گا۔ پر جے تواڈا درخت خراب اے تے پھل وی خراب ہوئے گا کیونکہ درخت دی پچھان اوہدے پھل توں ہوندی اے۔ 34 اَے سَپ دے بچیو، تُسی بھیڑے ہوندیاں ہوئیاں چنگیاں گلاں بھلا کیویں کر سکدے او؟ کیونکہ جیہڑیاں گلاں دل چ ہوندیاں نیں اوہی مُونہہ چوں نکلدیاں نیں۔ 35 اِک چنگا انسان اپنے دل دے چنگے خزانے چوں چنگیاں چیزاں کڈھدا اے جد کہ اِک بھیڑا انسان اپنے دل دے بھیڑے خزانے چوں بھیڑیاں ای چیزاں کڈھدا اے۔ 36 مَیں توانوں کہنا واں کہ عدالت دے دن انساناں نُوں ہر اوس بھیڑی گل دا حساب دینا پووے گا جیہڑی اوہ اپنے مُونہہ چوں کڈھدے نیں 37 کیونکہ جیہڑیاں گلاں تُسی کردے او اوہناں دی بِنا تے یاں تے توانوں نیک ٹھہرایا جائے گا یاں فیر قصوروار۔“‏

38 ایہہ سُن کے کجھ فریسیاں تے شریعت دے عالماں نے کہیا:‏ ”‏اُستاد، ذرا سانوں کوئی نشانی تے وکھا۔“‏ 39 یسوع نے اوہناں نُوں کہیا:‏ ”‏ایہہ بھیڑی تے بے‌وفا* پُشت وار وار نشانی منگدی اے۔ پر ایہنوں یُوناہ نبی دی نشانی توں علاوہ ہور کوئی نشانی نئیں وکھائی جائے گی۔ 40 جیویں یُوناہ تِن دن تے تِن راتاں اِک وڈی ساری مچھی دے ٹیڈھ چ رہیا سی اونویں ای انسان دا بیٹا* تِن دن تے تِن راتاں زمین دی تہہ چ رہوے گا۔ 41 عدالت دے دن نینوہ دے لوک ایس پُشت نال زندہ کیتے جان گے تے اوہ ایہنوں قصوروار ٹھہران گے کیونکہ اوہناں نے یُوناہ دا پیغام سُن کے توبہ کیتی سی۔ پر ویکھو، ایتھے اِک ایہو جیہا بندہ موجود اے جیہڑا یُوناہ توں وی وڈا اے۔ 42 عدالت دے دن سبا دی ملکہ* نُوں وی ایس پُشت نال زندہ کیتا جائے گا تے اوہ ایہنوں قصوروار ٹھہرائے گی کیونکہ اوہ بڑی دُوروں سلیمان دِیاں حکمت بھریاں گلاں سُنن آئی سی۔ پر ویکھو، ایتھے اِک ایہو جیہا بندہ موجود اے جیہڑا سلیمان توں وی وڈا اے۔‏

43 جدوں اِک باغی فرشتہ کسے بندے چوں نکلدا اے تے اوہ رہن دی تھاں لبھن لئی ریگستاناں چ بھٹک دا پھردا اے۔ پر اوہنوں کوئی تھاں نئیں مِلدی۔ 44 فیر اوہ سوچدا اے کہ ”‏مَیں اوسے گھر چ واپس جانواں گا جتھوں مَیں نکلیا ساں“‏ تے واپس آ کے اوہ ویکھدا اے کہ گھر خالی اے پر صاف‌ستھرا تے سجیا ہویا اے۔ 45 فیر اوہ جا کے اپنے نال سَت ہور باغی فرشتے لے آندا اے جیہڑے اوہدے نالوں وی بھیڑے ہوندے نیں تے اوہ سارے اوس بندے چ وڑھ کے رہن لگ پیندے نیں تے اوس بندے دا حال پہلے نالوں وی بھیڑا ہو جاندا اے۔ ایس بھیڑی پُشت دا وی ایہی حال ہوئے گا۔“‏

46 حالے اوہ لوکاں نال گل کر ای رہیا سی کہ اوہدی ماں تے بھرا آ کے باہر کھلو گئے کیونکہ اوہ اوہدے نال گل کرنا چاہندے سن۔ 47 ایس لئی کسے نے یسوع نُوں کہیا:‏ ”‏ویکھ، تیری ماں تے تیرے بھرا باہر کھلوتے ہوئے نیں تے تیرے نال گل کرنا چاہندے نیں۔“‏ 48 یسوع نے اوہنوں کہیا:‏ ”‏کون اے میری ماں، تے کون نیں میرے بھرا؟“‏ 49 فیر اوہنے اپنے شاگرداں وَل اشارہ کر کے کہیا:‏ ”‏میری ماں تے میرے بھرا ایہہ نیں 50 کیونکہ جیہڑا میرے اسمانی باپ دی مرضی تے چلدا اے اوہی اے میرا بھرا، میری بھین تے میری ماں۔“‏