رسولاں دے اعمال
11 رسولاں تے یہودیہ چ رہن والے ہور بھراواں نے سُنیا کہ غیریہودیاں نے وی خدا دے کلام نُوں قبول کر لیا اے۔ 2 ایس لئی جدوں پطرس یروشلم آیا تے اوہ بھرا اوہدے نال بحث کرن لگ پئے جیہڑے چاہندے سن کہ غیریہودی وی ختنہ کران۔ 3 اوہناں نے کہیا: ”تُوں اوہناں بندیاں دے گھر کیوں گیا تے اوہناں نال کیوں کھادا پیتا جنہاں دا ختنہ نئیں ہویا؟“ 4 ایہہ سُن کے پطرس نے اوہناں نُوں ساری گل کُھل کے سمجھائی تے کہیا:
5 ”جدوں مَیں شہر یافا چ دُعا کر رہیا ساں تے مَیں اِک رُویا ویکھی۔ مَیں ویکھیا کہ لیلن دی وڈی چادر ورگی اِک شے تھلے زمین وَل آ رہی اے* تے اوہ بالکل میرے سامنے آ گئی۔ 6 جدوں مَیں غور نال ویکھیا تے اوس چادر چ چار پیراں والے جانور، جنگلی جانور، زمین تے پھرن والے جانور تے اسمان دے پرندے سن۔ 7 فیر مینوں اِک آواز آئی: ”پطرس، اُٹھ تے ایہناں نُوں ذِبح کر کے کھا۔“ 8 پر مَیں کہیا: ”نئیں مالک، مَیں کدی وی کوئی ناپاک تے حرام چیز نئیں کھادی۔“ 9 فیر اسمان توں دُوجی واری آواز آئی: ”تُوں اوہناں چیزاں نُوں ناپاک نہ کہہ جنہاں نُوں خدا نے پاک کیتا اے۔“ 10 تیجی واری وی ایسے طرحاں ہویا تے فیر سب کجھ واپس اسمان تے چُک لیا گیا۔ 11 نالے اوسے ویلے تِن بندے اوس گھر آئے جِتھے اَسی ٹھہرے ہوئے ساں۔ اوہناں نُوں قیصریہ توں اِک بندے نے میرے کول گھلیا سی۔ 12 فیر خدا نے پاک روح دے ذریعے مینوں کہیا کہ مَیں بےفکر ہو کے اوہناں نال چلا جاواں۔ میرے نال ایہہ 6 بھرا وی اوس بندے دے گھر گئے سن۔
13 اوس بندے نے سانوں دَسیا کہ اوہنوں اپنے گھر اِک فرشتہ نظر آیا جنہے کہیا: ”کجھ بندیاں نُوں یافا گھل تے اوتھوں شمعون نُوں بلا جنہوں پطرس وی کہیا جاندا اے۔ 14 پطرس تینوں اوہ گلاں دَسے گا جنہاں دے ذریعے تینوں تے تیرے گھر والیاں نُوں نجات مِل سکدی اے۔“ 15 پر جدوں مَیں اوہناں نال گل شروع کیتی تے اوہناں تے پاک روح اُنج ای نازل ہوئی جیویں شروع چ ساڈے تے ہوئی سی۔ 16 اوس ویلے مینوں مالک یسوع دی ایہہ گل یاد آئی: ”یوحنا نے پانی نال بپتسمہ دِتا، پر توانوں پاک روح نال بپتسمہ دِتا جائے گا۔“ 17 مالک یسوع مسیح تے ایمان لیان دی وجہ توں خدا نے سانوں جیہڑی نعمت دِتی، اوہی اوہنے اوہناں لوکاں نُوں وی دِتی۔ ایس لئی مَیں خدا نُوں کیویں روک سکنا ساں؟“*
18 جدوں اوہناں نے ایہہ گلاں سُنیاں تے اوہناں نے اِعتراض کرنا چھڈ دِتا* تے خدا دی وڈیائی کردے ہوئیاں کہیا: ”ہُن ایہہ گل صاف اے کہ خدا غیریہودیاں نُوں وی توبہ کرن دا موقع دے رہیا اے تاکہ اوہناں نُوں زندگی ملے۔“
19 ستفنُس دی موت دے بعد کلیسیا تے ہون والے ظلم دی وجہ توں شاگرداں نُوں فینیکے، قُبرص تے انطاکیہ دے علاقیاں چ جانا پیا۔ پر اوہناں نے صرف یہودیاں نُوں ای خدا دا کلام سُنایا۔ 20 فیر اوہناں چوں کجھ بھرا جیہڑے قُبرص تے کُرینے دے سن، انطاکیہ آ کے یونانی بولن والے لوکاں نُوں مالک یسوع بارے خوشخبری سُنان لگ پئے۔ 21 اوہناں تے یہوواہ دا ہتھ سی، ایس لئی بوہت سارے لوک مالک تے ایمان لیائے تے اوہدے شاگرد بن گئے۔
22 جدوں یروشلم دی کلیسیا دے بھراواں نُوں ایہہ خبر ملی تے اوہناں نے برنباس نُوں انطاکیہ گھلیا۔ 23 اوتھے پونچ کے جدوں اوہنے ویکھیا کہ اوہناں لوکاں نُوں خدا دی عظیم رحمت ملی اے تے اوہ بوہت خوش ہویا۔ اوہ اوہناں ساریاں نُوں حوصلہ دین لگ پیا کہ اوہ پورے دل نال مالک دی خدمت کردے رہن۔ 24 برنباس اِک چنگا انسان سی، اوہدا ایمان بوہت مضبوط سی تے اوہ پاک روح نال بھریا ہویا سی۔ اوس ویلے بوہت سارے لوک مالک تے ایمان لیائے۔ 25 ایس لئی برنباس ساؤل نُوں لبھن لئی ترسُس گیا۔ 26 جدوں اوہنے ساؤل نُوں لبھ لیا تے اوہ اوہنوں اپنے نال انطاکیہ لے آیا۔ اوہ دونویں اِک سال تک کلیسیا نال جمع ہوندے رہے تے اوہناں نے بوہت سارے لوکاں نُوں تلیم دِتی۔ انطاکیہ ای اوہ جگہ سی جِتھے پہلی وار شاگرداں نُوں خدا دی مرضی نال مسیحی کہیا گیا۔
27 اوہناں دِناں چ کجھ نبی یروشلم توں انطاکیہ آئے۔ 28 اوہناں وچوں اِک دا ناں اگبُس سی جنہے پاک روح دی رہنمائی چ پیشینگوئی کیتی کہ پورے ملک چ بوہت وڈا کال پین والا اے۔ ایہہ کال کلودِیُس دی حکومت دے دوران پیا۔ 29 ایس لئی اوتھوں دے شاگرداں نے فیصلہ کیتا کہ ہر کوئی اپنی حیثیت دے مطابق یہودیہ چ رہن والے ضرورتمند بھین بھراواں لئی چیزاں* گھلے گا۔ 30 ایس لئی اوہناں نے چیزاں جمع کر کے برنباس تے ساؤل دے ہتھ بزرگاں نُوں گھلیاں۔