تیمُتھیُس دے ناں پہلا خط
6 غلام اپنے مالکاں دی دِلوں عزت کرن تاکہ خدا دے ناں تے اوہدی تلیم دی کدی بدنامی نہ ہوئے۔ 2 ایہدے علاوہ جے اِک غلام دا مالک اوہدے وانگوں مسیحی اے تے اوہ ایہہ سوچ کے اوہدی گھٹ عزت نہ کرے کہ اوہ اوہدا بھرا اے۔ ایہدی بجائے اوہ دل لا کے اوہدی خدمت کرے کیونکہ ایہدے توں اوہدے پیارے ہمایمان نُوں فائدہ ہوندا اے۔
تُوں ایہہ گلاں سکھاندا رہ تے نصیحت کردا رہ۔ 3 جے کوئی بندہ ساڈے مالک یسوع مسیح دی صحی* تلیم تے ایمان نئیں رکھدا تے نہ ای اوس تلیم نُوں من دا اے جدے ذریعے اَسی خدا دی بندگی کرنا سکھیا سگوں کوئی ہور تلیم دیندا اے 4 تے اصل چ اوہ غرور نال پُھل گیا اے تے اوہنوں کسے وی گل دی سمجھ نئیں اے۔ اوہنوں بس لفظاں تے بحث کرن دا جنون اے۔ پر ایہناں گلاں دی وجہ توں حسد، لڑائی جھگڑے، بدنامی،* تے شک پیدا ہوندا اے۔ 5 نالے چھوٹیاں چھوٹیاں گلاں تے بحث چھڑدی اے۔ ایہو جہے کم اوہ لوک کردے نیں جنہاں دی سوچ وِگڑی ہوئی اے تے جنہاں نے سچائی نُوں چھڈ دِتا اے۔ اوہ صرف اپنے فائدے لئی خدا دی بندگی کردے نیں۔ 6 پر جے کوئی دِلوں خدا دی بندگی کردا اے تے اوہناں چیزاں تے راضی رہندا اے جیہڑیاں اوہدے کول ہے نیں تے اوہنوں واقعی بڑا فائدہ ہوندا اے 7 کیونکہ دُنیا چ اَسی خالی ہتھ آئے آں تے خالی ہتھ ای چلے جاواں گے۔ 8 ایس لئی جے ساڈے کول روٹی تے کپڑے ہے نیں* تے سانوں ایہناں چیزاں تے راضی رہنا چاہی دا اے۔
9 پر جیہڑے لوکاں تے امیر بنن دا جنون سوار اے، اوہ اَزمیشاں تے پھندیاں چ پھس جاندے نیں۔ نالے اوہ بوہت ساریاں فضول تے نقصان پونچان والیاں خواہشاں دے دھوکھے چ آ جاندے نیں جیہڑیاں اوہناں نُوں تباہی تے بربادی دے دریا چ ڈبو دیندیاں نیں 10 کیونکہ پیسے نال پیار ہر طرحاں دی بُرائی دی جڑ اے۔ ایس پیار دی وجہ توں کئی لوک گمراہ ہو کے ایمان توں پھر گئے نیں تے بڑی تکلیف چ نیں کیونکہ اوہناں نے اپنے آپ نُوں دُکھاں دے تیراں نال زخمی کر لیا اے۔
11 پر تُوں خدا دا بندہ ایں۔ ایس لئی ایہناں چیزاں توں دُور بھج۔ پر اپنے اندر نیکی، خدا دی بندگی، ایمان، محبت، صبر *تے نرممزاجی نُوں ودھان دی جیتوڑ کوشش کر۔ 12 مسیح دی تلیم دے دُشمناں دے خلاف چنگی لڑائی لڑ تے ہمیشاں دی زندگی پان دی ہر ممکن کوشش کر۔* خدا نے تینوں ایہی زندگی دین لئی بلایا اے جدا تُوں بوہت سارے گواہواں دے سامنے اِقرار کیتا اے۔
13 مَیں خدا دے حضور، جیہڑا ساریاں نُوں زندگی دیندا اے تے مسیح یسوع دے حضور جنہے پُنطیُس پیلاطُس دے سامنے چنگی طرحاں گواہی دِتی، تینوں حکم دینا واں 14 کہ ساڈے مالک یسوع مسیح دے ظاہر ہون تک میریاں ہدیتاں تے عمل کر تاکہ تُوں بےداغ تے بےاِلزام رہویں۔ 15 اوہ خوشدل تے واحد حکمران اپنے طے کیتے ہوئے ویلے تے ظاہر ہوئے گا۔ اوہ بادشاہواں دا بادشاہ تے مالکاں دا مالک اے۔ 16 صرف اوہنوں ای کدی نہ ختم ہون والی* زندگی دِتی گئی اے۔ اوہ جیس روشنی چ وَسدا اے، اوہدے نیڑے کوئی نئیں جا سکدا۔ اوہنوں کسے انسان نے نئیں ویکھیا تے نہ ای ویکھ سکدا اے۔ عزت تے ابدی طاقت اوہدی رہوے۔ آمین۔
17 ایس دُنیا دے امیر لوکاں نُوں ہدیت* دے کہ اوہ اپنے آپ نُوں وڈا نہ سمجھن* تے اپنی دولت تے بھروسا نہ کرن جیہڑی اَج ہے وے تے کل نئیں رہوے گی سگوں خدا تے بھروسا* رکھن جیہڑا سانوں ساریاں چیزاں دل کھول کے دیندا اے تاکہ اَسی اوہناں دا مزہ لئیے۔ 18 نالے اوہناں نُوں کہہ کہ اوہ بھلائی کرن، نیکی کر کے خدا دِیاں نظراں چ امیر بنن، کُھلے دل والے ہون تے اپنیاں چیزاں دُوجیاں نال وَنڈن لئی تیار رہن 19 کیونکہ اِنج اوہ اپنے لئی اسمان تے خزانہ جمع کرن گے یعنی اِک چنگے مستقبل دی نِیہہ رکھن گے تے اصلی زندگی پان دی ہر ممکن کوشش کر رہے ہون گے۔*
20 پیارے تیمُتھیُس، اوس خزانے* دی حفاظت کر جیہڑا تینوں دِتا گیا اے۔ اوہناں فضول گلاں تے دھیان نہ دے جنہاں توں خدا دی بدنامی ہوندی اے تے نہ ای اوہناں لوکاں دی سُن جیہڑے علم دے ناں تے جھوٹھ پھیلا رہے نیں۔ 21 کجھ لوک ایہو جہے علم دا دِکھاوا کرن دے چکر چ ایمان توں پھر گئے نیں۔
دُعا اے کہ خدا توانوں ساریاں نُوں عظیم رحمت بخشے۔