رومیوں دے ناں خط
1 مسیح یسوع دے غلام پولُس وَلّوں خط۔ مینوں رسول دے طور تے چُنیا* گیا تے خدا دی خوشخبری سُنان دی ذمےداری دِتی گئی۔ 2 خدا نے ایس خوشخبری دا اعلان* پہلاں ای اپنے نبیاں دے ذریعے پاک کلام چ کر دِتا سی۔ 3 ایہہ خوشخبری اوہدے پُتر بارے وے جیہڑا داؤد دی نسل چوں پیدا ہویا۔ 4 اَسی جاننے آں کہ ساڈا مالک یسوع مسیح واقعی خدا دا پُتر اے کیونکہ خدا نے اوہنوں اپنی پاک روح دی طاقت نال مُردیاں چوں زندہ کیتا۔ 5 یسوع دے ذریعے خدا نے ساڈے تے عظیم رحمت کیتی۔ یسوع نے مینوں* رسول بنایا تاکہ مَیں ساریاں قوماں دی مدد کراں کہ اوہ ایمان لیا کے اوہدی فرمانبرداری کرن تے اوہدے ناں دی عزت کرن۔ 6 اوہناں قوماں وچوں ای توانوں وی یسوع مسیح دے شاگرد بنن لئی بلایا گیا اے۔ 7 ایہہ خط روم چ رہن والے خدا دے سارے پیارے بندیاں لئی اے جنہاں نُوں اوہنے اپنے پاک خادم بنن لئی بلایا اے:
دُعا اے کہ ساڈا باپ خدا تے مالک یسوع مسیح توانوں عظیم رحمت تے سلامتی بخشن۔
8 سب توں پہلاں مَیں یسوع مسیح دے ذریعے تواڈے ساریاں لئی اپنے خدا دا شکر کرنا واں کیونکہ تواڈے ایمان دا چرچا پوری دُنیا چ ہو رہیا اے۔ 9 مَیں خدا دے پُتر بارے خوشخبری سُنا کے پورے دل نال خدا دی خدمت کرنا واں۔ خدا جان دا اے کہ مَیں اپنیاں دُعاواں چ ہمیشاں تواڈا ذکر کرنا واں 10 تے مِنت کرنا واں کہ جے خدا دی مرضی ہوئے تے مینوں ایس وار تواڈے کول آن دا موقع ضرور ملے۔ 11 مَیں توانوں مِلن لئی بےتاب آں کیونکہ مَیں توانوں خدا وَلّوں کوئی نعمت دینا چاہنا واں تاکہ تواڈا ایمان مضبوط ہوئے۔ 12 میرے کہن دا مطلب اے کہ اَسی اپنے اپنے ایمان توں اِک دُوجے دا حوصلہ ودھائیے۔
13 بھراوو، مَیں توانوں دَسنا چاہنا واں کہ مَیں تواڈے کول آن دی کئی وار کوشش کیتی پر کسے نہ کسے رُکاوٹ دی وجہ توں نئیں آ سکیا۔ اصل چ مَیں چاہنا ساں کہ اوتھے وی مُنادی کرن دے چنگے نتیجے نِکلن* جیویں کہ دُوجیاں قوماں چ چنگے نتیجے نکلے نیں۔ 14 میرا فرض بن دا اے* کہ مَیں سارے لوکاں دی مدد کراں فیر بھانویں اوہ یونانی ہون یاں کسے ہور قوم دے، سمجھدار ہون یاں ناسمجھ۔ 15 ایس لئی میری بڑی خواہش اے کہ مَیں تواڈے کول آ کے روم چ وی خوشخبری سُناواں۔ 16 مینوں خوشخبری سُنان چ کوئی شرمندگی نئیں ہوندی۔ اصل چ تے خوشخبری خدا دا اوہ زبردست بندوبست اے جدے ذریعے ایمان رکھن والے سارے لوکاں نُوں نجات مِلدی اے، پہلاں یہودیاں نُوں تے فیر یونانیاں نُوں۔ 17 ایمان رکھن والے لوک خوشخبری دے ذریعے ویکھ سکدے نیں کہ خدا نیک اے جدی وجہ توں اوہناں دا ایمان مضبوط ہوندا اے جیویں کہ پاک کلام چ لکھیا اے: ”نیک بندہ اپنے ایمان دی وجہ توں زندہ رہوے گا۔“
18 خدا اسمان توں اوہناں سارے لوکاں تے اپنا غصہ ظاہر کر رہیا اے جیہڑے نافرمان نیں، بھیڑے کم کردے نیں تے بُرائی نال سچائی نُوں دَباندے نیں۔ 19 خدا نے اپنے بارے بوہت ساریاں گلاں ظاہر کیتیاں نیں تاکہ اوہ اوہنوں جان سکن۔ 20 اَسی خدا* نُوں ویکھ نئیں سکدے پر جدوں اَسی اوہدیاں بنائیاں ہوئیاں چیزاں تے غور کرنے آں تے اَسی اوہدیاں خوبیاں بارے جان سکنے آں۔ جدوں توں دُنیا بنی اے، اوہدوں توں ظاہر ہو گیا اے کہ خدا ابدی طاقت رکھدا اے تے اوہنے ای سب کجھ بنایا اے۔ ایس لئی اوہناں کول خدا تے ایمان نہ رکھن دا کوئی بہانہ نئیں اے۔ 21 بھانویں کہ اوہ خدا نُوں جان دے نیں پر فیر وی اوہ اوہنوں اپنا خدا من کے اوہدی وڈیائی تے شکرگزاری نئیں کردے سگوں اوہ فضول گلاں سوچدے نیں تے اوہناں دے ناسمجھ دِلاں تے نھیرا چھایا ہویا اے۔ 22 اوہ سمجھدار ہون دا دعویٰ کردے نیں پر اصل چ اوہ بےوقوف نیں۔ 23 اوہ ہمیشاں تک زندہ رہن والے خدا دی وڈیائی کرن دی بجائے بےجان بُتاں دی وڈیائی کردے نیں جنہاں نُوں اوہناں نے انساناں، پرندیاں، چار پیراں والے جانوراں تے زمین تے پھرن والے جانوراں دی صورت تے بنایا اے جیہڑے مر جاندے نیں۔
24 ایس لئی خدا نے ایہو جہے لوکاں* نُوں اوہناں دے حال تے چھڈ دِتا اے کیونکہ اوہناں تے اپنے دل دِیاں بھیڑیاں خواہشاں نُوں پورا کرن دا جنون سوار اے جدی وجہ توں اوہ اپنے جسماں نُوں ناپاک کماں لئی استمال کردے نیں۔ 25 اوہ خدا دی سچائی دی بجائے جھوٹھ تے یقین کردے نیں تے خالق دی بجائے اوہدیاں بنائیاں ہوئیاں چیزاں دی عبادت تے خدمت کردے نیں۔ پر وڈیائی ہمیشاں صرف خدا دی ہونی چاہی دی اے۔ آمین۔ 26 ایس لئی خدا نے اوہناں لوکاں نُوں اوہناں دِیاں بےقابو جنسی خواہشاں دے حوالے کر دِتا اے۔ اوہناں دِیاں عورتاں قدرتی نظام دے خلاف جا کے اِک دُوجے نال جنسی بدکاری کردیاں نیں۔ 27 ایسے طرحاں مرداں دے دِلاں چ وی دُوجے مرداں لئی گندیاں خواہشاں بھڑک اُٹھیاں نیں تے اوہ قدرتی نظام مطابق عورتاں نال جنسی تعلق رکھن دی بجائے مرداں نال بےہودہ کم کردے نیں۔ ایہو جہے لوکاں نُوں اپنیاں کرتوتاں دا نتیجہ بھگتنا پووے گا۔
28 اوہناں نُوں خدا دی مرضی دی کوئی پرواہ نئیں اے۔* ایس لئی خدا نے اوہناں نُوں اوہناں دی گھٹیا سوچ دے حوالے کر دِتا جدی وجہ توں اوہ بھیڑے کماں چ پئے ہوئے نیں۔ 29 اوہ لوک ہر طرحاں دی بُرائی، گُناہ، لالچ، بھیڑی سوچ، حسد، قتل، ویر، دھوکھےبازی تے دُوجیاں نُوں نقصان پونچان والے خیالاں نال بھرے ہوئے نیں۔ اوہ چغلخور، 30 دُوجیاں دی بدنامی کرن والے، خدا توں نفرت کرن والے، بدتمیز، گھمنڈی، شیخیباز، بھیڑے منصوبے بنان والے، ماں پیو دے نافرمان، 31 بےعقل، جھوٹھے وعدے کرن والے، سچی محبت توں خالی* تے بےرحم نیں۔ 32 اوہ چنگی طرحاں جان دے نیں کہ اِنصاف نال عدالت کرن والے خدا نے کہیا اے کہ اوہ ایہو جہے کم کرن والے لوکاں نُوں موت دی سزا دَوے گا۔ پر اوہ فیر وی ایہناں کماں توں باز نئیں آندے سگوں ایہو جہے کم کرن والے دُوجے لوکاں توں وی خوش ہوندے نیں۔