یوحنا نُوں مِلن والا مُکاشفہ
4 ایہدے بعد مَیں ویکھیا کہ اسمان چ اِک دروازہ کُھلیا ہویا اے تے جنہے سب توں پہلاں میرے نال گل کیتی، اوہدی آواز اِک نرسنگے ورگی سی۔ اوہنے کہیا: ”اُتے آ تاکہ مَیں تینوں اوہ سب وکھاواں جو ہون والا اے۔“ 2 ایہدے فوراً بعد مَیں پاک روح نال بھر گیا تے ویکھو، اسمان تے اِک تخت سی جدے تے کوئی بیٹھا ہویا سی۔ 3 جیہڑا تخت اُتے بیٹھا ہویا سی، اوہ یشب تے لال عقیق وانگوں چمک رہیا سی تے تخت دے آلے دَوالے اِک دھنک سی جیہڑی زُمُرد* ورگی سی۔
4 اوس تخت دے آلے دَوالے 24 ہور تخت سن تے مَیں ویکھیا کہ اوہناں اُتے 24 بزرگ بیٹھے ہوئے سن جنہاں نے چِٹے کپڑے تے سونے دے تاج پائے ہوئے سن۔ 5 اوس تخت چوں بجلی نکل رہی سی تے زوردار آوازاں تے گرجاں سُنائی دے رہیاں سن۔ اوہدے سامنے سَت وڈے دِیوے بل رہے سن جنہاں دا اشارہ خدا دِیاں سَت طاقتاں* وَل اے۔ 6 تخت دے سامنے شیشے ورگا صاف شفاف* پانی سی۔
نالے وچکار* تخت دے آلے دَوالے چار کروبی* سن جنہاں دے اَگے پچھے اَکھاں ای اَکھاں سن۔ 7 پہلے کروبی دی شکل شیر ورگی، دُوجے دی بیل ورگی، تیجے دی انسان ورگی تے چوتھے دی اُڈدے ہوئے عقاب ورگی سی۔ 8 اوہناں چار کروبیاں دے چھ چھ پَر سن جنہاں دے دونویں پاسے اَکھاں ای اَکھاں سن۔ اوہ دن رات لگاتار کہندے نیں: ”مُقدس، مُقدس، مُقدس اے یہوواہ خدا جیہڑا بےحد طاقت والا اے تے جیہڑا ہمیشاں توں سی، ہمیشاں توں اے تے چھیتی آ رہیا اے۔“
9 ہمیشاں ہمیشاں تک زندہ رہن والا خدا تخت تے بیٹھا ہویا اے۔ جدوں کروبی اوہدی وڈیائی، عزت تے شکرگزاری کردے نیں 10 تے 24 بزرگ وی تخت تے بیٹھے خدا اَگے گوڈے ٹیک دے نیں تے سجدہ کر کے اوہدی عبادت کردے نیں جیہڑا ہمیشاں ہمیشاں تک زندہ رہوے گا۔ نالے اوہ اپنے تاج تخت دے سامنے رکھ دیندے نیں تے کہندے نیں: 11 ”اَے ساڈے خدا یہوواہ، تُوں ای وڈیائی، عزت تے طاقت دا حقدار ایں کیونکہ تُوں ای سب کجھ بنایا اے تے تیری مرضی نال ای ساریاں چیزاں وجود چ آئیاں تے بنائیاں گئیاں نیں۔“