یوحنا نُوں مِلن والا مُکاشفہ
12 فیر اسمان تے ایہہ وڈی نشانی نظر آئی: اِک عورت جدے کپڑے سورج وانگوں چمک رہے سن تے جدے پیراں تھلے چن سی، اوہدے سِر اُتے 12 تاریاں والا اِک تاج سی 2 تے اوہ حاملہ سی۔ اوہ درد تے تکلیف دی وجہ توں چیکاں مار رہی سی کیونکہ اوہدا بچہ پیدا ہون والا سی۔
3 فیر مینوں اسمان تے اِک ہور نشانی نظر آئی: اِک لال رنگ دا وڈا اژدہا جدے سَت سِر تے دس سنگِ سن۔ اوہدے ہر سِر تے اِک تاج سی۔ 4 اوہنے اپنی پُوشل نال اسمان دے تاریاں دے تیجے حصے نُوں گھسیٹ کے تھلے زمین تے سُٹ دِتا۔ اوہ اژدہا اوس عورت دے سامنے کھلوتا رہیا جدا بچہ پیدا ہون والا سی تاکہ جیویں ای بچہ پیدا ہوئے، اوہ اوہنوں کھا جائے۔
5 عورت دا اِک پُتر، ہاں، اِک مُنڈا پیدا ہویا جیہڑا لوھے دے ڈنڈے نال ساریاں قوماں تے حکمرانی کرے گا۔ اوس مُنڈے نُوں فوراً خدا تے اوہدے تخت کول لجایا گیا۔ 6 اوہ عورت بھج کے ویرانے چ چلی گئی جِتھے خدا نے اوہدے لئی اِک جگہ تیار کیتی سی تاکہ اوتھے اوہنوں 1260 دِناں تک کھوایا پیایا جائے۔
7 فیر اسمان تے جنگ چھڑ گئی۔ میکائیل* تے اوہدے فرشتیاں نے اژدہے نال جنگ کیتی تے اژدہے تے اوہدے فرشتیاں نے اوہناں نال جنگ کیتی۔ 8 پر اوہ* ہار گئے تے اسمان دے دروازے اوہناں واسطے ہمیشاں لئی بند کر دِتے گئے۔ 9 اوس وڈے اژدہے نُوں زور نال زمین تے سُٹ دِتا گیا۔ ہاں، اوس پرانے سَپ نُوں جنہوں اِبلیس تے شیطان کہیا جاندا اے تے جیہڑا ساری دُنیا نُوں گمراہ کر رہیا اے۔ اوہنوں اوہدے فرشتیاں سمیت زور نال تھلے زمین تے سُٹ دِتا گیا۔ 10 فیر مَیں سُنیا کہ اسمان تے کسے نے اُچی آواز چ کہیا:
”ساڈے خدا نے انساناں نُوں نجات دِتی اے! اوہدی بادشاہی قائم ہو گئی اے تے اوہی سارے اِختیار دا مالک اے! اوہدے مسیح نے اِختیار سنبھال لیا اے کیونکہ اوہنے شیطان نُوں تھلے سُٹ دِتا اے جیہڑا دن رات خدا دے سامنے ساڈے بھراواں تے اِلزام لاندا اے۔ 11 ساڈے بھراواں نے میمنے دے خون تے اوس پیغام دے ذریعے جیہڑا اوہناں نے سُنایا سی، اوہدے تے جِت حاصل کیتی اے۔ اوہناں نے موت دا سامنا کردے ویلے وی اپنی جان دی پرواہ نئیں کیتی۔ 12 ایس لئی اسمان تے رہن والیو، خوشی مناؤ!پر اَے زمین تے سمندر، تواڈے تے مصیبت آن والی اے کیونکہ اِبلیس تواڈے کول آ گیا اے۔ اوہ بڑے غصے چ وے کیونکہ اوہنوں پتہ اے کہ اوہدے کول تھوڑا ای وقت رہ گیا اے۔“
13 جدوں اژدہے نے ویکھیا* کہ اوہنوں زور نال زمین تے سُٹ دِتا گیا اے تے اوہنے اوس عورت تے ظلم کیتا جدا مُنڈا پیدا ہویا سی۔ 14 پر عورت نُوں وڈے عقاب دے دو پَر دِتے گئے تاکہ اوہ اُڈ کے سَپ دِیاں نظراں توں دُور ویرانے چ اوس جگہ تے چلی جائے جیہڑی اوہدے لئی تیار کیتی گئی سی۔ اوتھے اوہنوں اِک زمانے، دو زمانے تے اَدھے زمانے* لئی کھوایا پیایا جائے گا۔
15 سَپ نے عورت دے پچھے اپنے مُونہہ چوں پانی دا دریا کڈھیا تاکہ اوہ اوس دریا چ ڈُب کے مر جائے۔ 16 پر زمین نے عورت دی مدد کیتی تے اپنا مُونہہ کھول کے اوس دریا نُوں پی لیا جیہڑا اژدہے نے اپنے مُونہہ چوں کڈھیا سی۔ 17 ایس لئی اژدہے نُوں عورت تے غصہ آیا تے اوہ اوہدی باقی اولاد* نال جنگ کرن لئی نکلیا جیہڑی خدا دے حکماں تے عمل کردی اے تے جنہوں یسوع بارے گواہی دین دا کم دِتا گیا اے۔