متی دی اِنجیل
25 ”اسمان دی بادشاہی دس کنواریاں ورگی اے جیہڑیاں اپنے دِیوے لے کے لاڑے دا استقبال کرن لئی نکلیاں۔ 2 اوہناں وچوں پنج بےوقوف تے پنج سمجھدار سن۔ 3 بےوقوف کنواریاں اپنے دِیوے تے لے گئیاں پر تیل نئیں لے کے گئیاں۔ 4 پر سمجھدار کنواریاں اپنے دِیویاں دے نال نال اپنیاں کُپیاں چ وادھو تیل وی لے کے گئیاں۔ 5 پر لاڑے دے آن چ دیر ہو گئی۔ ایس لئی اوہناں ساریاں نُوں نیندر آن لگ پئی تے اوہ سوں گئیاں۔ 6 اَدھی رات نُوں ایہہ رولا پے گیا: ”لاڑا بس آن ای والا اے! اوہدے استقبال لئی نکلو۔“ 7 اوہ ساریاں کنواریاں اُٹھ پئیاں تے اپنے اپنے دِیوے تیار کرن لگ پئیاں۔ 8 بےوقوف کنواریاں نے سمجھدار کنواریاں نُوں کہیا: ”سانوں تھوڑا جیہا تیل دے دیو کیونکہ ساڈے دِیوے بُھجن والے نیں۔“ 9 پر سمجھدار کنواریاں نے اوہناں نُوں جواب دِتا: ”جے اَسی توانوں تیل دے دِتا تے ایہہ نہ تواڈے لئی کافی ہونا اے تے نہ ساڈے لئی۔ ایس لئی تُسی جا کے تیل ویچن والیاں کولوں اپنے لئی تیل خرید لوَو۔“ 10 جدوں بےوقوف کنواریاں تیل خریدن چلیاں گئیاں تے لاڑا آگیا۔ جیہڑیاں کنواریاں تیار سن، اوہ ویاہ دی دعوت لئی اوہدے نال اندر چلیاں گئیاں تے دروازہ بند کر دِتا گیا۔ 11 بعد چ جدوں باقی پنج کنواریاں واپس آئیاں تے اوہناں نے کہیا: ”حضور، حضور، ساڈے لئی دروازہ کھولو!“ 12 پر لاڑے نے اوہناں نُوں کہیا: ”مَیں توانوں سچ کہنا واں کہ مَیں توانوں نئیں جان دا۔“
13 ایس لئی چوکس رہوو کیونکہ تُسی نہ اوس دن* نُوں تے نہ اوس گھڑی نُوں جان دے او۔
14 اسمان دی بادشاہی اوس آدمی ورگی اے جنہے پردیس جان توں پہلاں اپنے غلاماں نُوں بلا کے اوہناں نُوں اپنی جائیداد دی دیکھبھال کرن دی ذمےداری دِتی۔ 15 اوہنے غلاماں نُوں اوہناں دی صلاحیت دے مطابق چاندی دِتی؛ اِک نُوں پنج من،* دُوجے نُوں دو من تے تیجے نُوں اِک من تے فیر اوہ پردیس چلا گیا۔ 16 جیس غلام نُوں پنج من چاندی ملی سی اوہنے فوراً جا کے ایہدے نال کاروبار کیتا تے پنج من چاندی ہور کما لئی۔ 17 ایسے طرحاں جیس غلام نُوں دو من چاندی ملی سی اوہنے وی کاروبار کر کے دو من چاندی ہور کما لئی۔ 18 پر جیس غلام نُوں اِک من چاندی ملی سی اوہنے ٹویا پُٹ کے اپنے مالک دی چاندی اوہدے چ دَب دِتی۔
19 فیر اِک لمے چِر بعد مالک واپس آیا تے اوہنے اپنے غلاماں کولوں حساب منگیا۔ 20 جیس غلام نُوں پنج من چاندی ملی سی اوہ اپنے نال پنج من ہور لے کے آیا تے اوہنے کہیا: ”مالک، تُسی مینوں پنج من چاندی دِتی سی، ویکھو، مَیں ایہدے نال پنج من ہور کما لئی اے۔“ 21 ایہہ سُن کے مالک نے اوہنوں کہیا: ”شاباش چنگے تے وفادار غلام! تُوں تھوڑیاں چیزاں وچ بھروسےمند ثابت ہویا ایں۔ ایس لئی مَیں تینوں بوہت ساریاں چیزاں دا مختار بنانواں گا۔ تُوں وی میری خوشی چ شریک ہو۔“ 22 فیر جنہوں دو من چاندی ملی سی اوہنے آ کے اپنے مالک نُوں کہیا: ”مالک، تُسی مینوں دو من چاندی دِتی سی، ویکھو، مَیں ایہدے نال دو من ہور کما لئی اے۔“ 23 ایہہ سُن کے مالک نے اوہنوں کہیا: ”شاباش چنگے تے وفادار غلام! تُوں تھوڑیاں چیزاں چ بھروسےمند ثابت ہویا ایں۔ ایس لئی مَیں تینوں بوہت ساریاں چیزاں دا مختار بنانواں گا۔ تُوں وی میری خوشی چ شریک ہو۔“
24 آخر چ اوہ غلام اَگے آیا جنہوں اِک من چاندی ملی سی۔ اوہنے کہیا: ”مالک، مینوں پتہ اے کہ تُوں بڑا سخت آدمی ایں۔ تُوں اوہ فصل وڈھ لینا ایں جیہڑی تُوں نئیں بیجی تے اوہ اناج لے لینا ایں جیہڑا تُوں نئیں چھٹیا۔ 25 ایس لئی مَیں ڈردے مارے تیری چاندی زمین چ دَب دِتی سی۔ ایہہ لے اپنی چاندی۔“ 26 مالک نے اوہنوں کہیا: ”اَے بھیڑے تے سُست غلام، تینوں پتہ سی کہ جیہڑی فصل مَیں نئیں بیجی، اوہ مَیں وڈھ لینا واں تے جیہڑا اناج مَیں نئیں چھٹیا، اوہ لے لینا واں۔ 27 ایس لئی تینوں چاہی دا سی کہ تُوں میری چاندی ساہوکاراں نُوں دے دیندا تے جدوں مَیں آندا تے مینوں بیاج سمیت میری چاندی واپس مِلدی۔
28 ایس لئی ایس غلام کولوں چاندی لے کے اوس غلام نُوں دے دَوو جدے کول دَس من چاندی اے 29 کیونکہ جدے کول ہے وے، اوہنوں ہور دِتا جائے گا تے اوہدے کول بوہت زیادہ ہو جائے گا۔ پر جدے کول نئیں اے، اوہدے کولوں اوہ وی لے لیا جائے گا جو اوہدے کول ہے وے۔ 30 ایس نکمّے غلام نُوں باہر نھیرے چ سُٹ دَوو جِتھے ایہہ اپنی ماڑی حالت دی وجہ توں روئے گا تے کچیچیاں وَٹے گا۔“
31 جدوں انسان دا بیٹا* اپنی پوری شان تے اپنے سارے فرشتیاں نال آئے گا تے اوہدوں اوہ اپنے عالیشان تخت تے بہووے گا۔ 32 فیر ساریاں قوماں اوہدے سامنے جمع کیتیاں جان گیاں تے اوہ لوکاں نُوں اُنج ای اِک دُوجے توں وَکھ کرے گا جیویں چرواہا بھیڈاں نُوں بکریاں توں وَکھ کردا اے۔ 33 اوہ بھیڈاں نُوں اپنے سجے پاسے تے بکریاں نُوں اپنے کھبے پاسے کھڑا کرے گا۔
34 فیر بادشاہ اپنے سجے پاسے کھلوتے ہوئیاں نُوں کہوے گا: ”میرا باپ تواڈے تے مہربان اے۔ آؤ، اوس بادشاہی نُوں حاصل کرو* جیہڑی تواڈے لئی ایس دُنیا دی نِیہہ رکھن دے ویلے توں تیار کیتی گئی اے 35 کیونکہ جدوں مَیں بُھکھا ساں تے تُسی مینوں کجھ کھان لئی دِتا۔ جدوں مَیں پیاسا ساں تے تُسی مینوں کجھ پین لئی دِتا۔ جدوں مَیں اجنبی ساں تے تُسی مینوں اپنے گھر رکھیا۔ 36 جدوں مَیں ننگا* ساں تے تُسی مینوں پان لئی کپڑے دِتے۔ جدوں مَیں بیمار ساں تے تُسی میری دیکھبھال کیتی۔ جدوں مَیں جیل چ ساں تے تُسی مینوں مِلن لئی آئے۔“ 37 فیر نیک لوک بادشاہ نُوں پچھن گے: ”مالک، اَسی کدوں تینوں بُھکھا ویکھ کے کجھ کھان لئی دِتا یاں پیاسا ویکھ کے کجھ پین لئی دِتا؟ 38 اَسی کدوں تینوں اجنبی ویکھیا تے تینوں اپنے گھر رکھیا یاں ننگا ویکھ کے تینوں پان لئی کپڑے دِتے؟ 39 تے اَسی کدوں تینوں بیمار ویکھیا یاں جیل چ ویکھیا تے تینوں مِلن آئے؟“ 40 بادشاہ اوہناں نُوں کہوے گا: ”مَیں توانوں سچ کہنا واں کہ جے تُسی میرے بھراواں وچوں سب توں چھوٹے لئی اِنج کیتا تے سمجھو میرے لئی کیتا۔“
41 فیر اوہ اپنے کھبے پاسے کھلوتے ہوئیاں نُوں کہوے گا: ”اَے لعنتیو، میرے توں دُور ہو جاؤ تے ہمیشاں بلدی رہن والی اوس اَگ وچ چلے جاؤ جیہڑی شیطان تے اوہدے فرشتیاں لئی بال کے رکھی گئی اے 42 کیونکہ جدوں مَیں بُھکھا ساں تے تُسی مینوں کھان لئی کجھ نئیں دِتا۔ مَیں پیاسا ساں تے تُسی مینوں پین لئی کجھ نئیں دِتا۔ 43 مَیں اجنبی ساں تے تُسی مینوں اپنے گھر نئیں رکھیا۔ جدوں مَیں ننگا ساں تے تُسی مینوں پان لئی کپڑے نئیں دِتے۔ جدوں مَیں بیمار ساں تے جیل وچ ساں تے تُسی میری دیکھبھال نئیں کیتی۔“ 44 فیر اوہ وی اوہنوں پچھن گے: ”مالک، اَسی کدوں تینوں بُھکھا یاں پیاسا، اجنبی یاں ننگا، بیمار یاں جیل چ ویکھیا تے تیری خدمت نئیں کیتی؟“ 45 فیر بادشاہ اوہناں نُوں کہوے گا: ”مَیں توانوں سچ کہنا واں کہ جے تُسی میرے بھراواں وچوں سب توں چھوٹے لئی اِنج نئیں کیتا تے سمجھو میرے لئی وی نئیں کیتا۔“ 46 ایہہ لوک ہمیشاں لئی ہلاک ہو جان گے پر نیک لوک ہمیشاں دی زندگی پان گے۔“