رومیوں دے ناں خط
15 پر جے ساڈا ایمان مضبوط اے تے سانوں صرف اپنی خوشی بارے نئیں سوچنا چاہی دا سگوں اوہناں دا لحاظ رکھنا چاہی دا اے جنہاں دا ایمان مضبوط نئیں اے۔ 2 آؤ اَسی دُوجیاں دی خوشی بارے سوچئے تے اوہناں نال بھلا کر کے اوہناں دا حوصلہ ودھائیے 3 کیونکہ مسیح نے وی صرف اپنی خوشی دا نئیں سوچیا سی جیویں کہ پاک کلام چ لکھیا اے: ”مَیں اوہناں لوکاں دے طعنے سہے جیہڑے تیری بےعزتی کر رہے سن۔“ 4 پاک کلام چ پہلاں جو کجھ وی لکھیا گیا اے، اوہ ساڈی رہنمائی لئی لکھیا گیا اے تاکہ اَسی صبر نال مشکلاں برداشت کر سکئے تے تسلی حاصل کر سکئے۔ ایس صبر تے تسلی دی وجہ توں سانوں امید مِلدی اے۔ 5 دُعا اے کہ خدا توانوں ایہہ صبر تے تسلی دَوے تے تواڈی مدد کرے تاکہ تواڈے ساریاں دی سوچ مسیح یسوع ورگی ہوئے۔ 6 اِنج تُسی مِل کے اِک آواز نال ساڈے مالک یسوع مسیح دے خدا تے باپ دی وڈیائی کر سکو گے۔
7 جیویں مسیح نے توانوں قبول کیتا اے، تُسی وی اِک دُوجے نُوں قبول کرو* تاکہ خدا دی وڈیائی ہوئے۔ 8 مسیح ایہہ گل ظاہر کرن لئی یہودیاں* دا خادم بنیا کہ خدا ہمیشاں سچ بولدا اے تے اوہنے ساڈے پیو دادیاں نال جیہڑے وعدے کیتے سن، اوہ سچے نیں۔ 9 نالے ایس لئی وی تاکہ غیریہودی خدا دے رحم دی وجہ توں اوہدی وڈیائی کرن جیویں کہ پاک کلام چ لکھیا اے: ”مَیں قوماں سامنے تیری وڈیائی کراں گا تے تیرے ناں دے گُن گاواں گا۔“ 10 خدا نے ایہہ وی کہیا: ”اَے قومو، خدا دے بندیاں نال مِل کے خوشی مناؤ۔“ 11 ایہہ وی لکھیا اے: ”ہر قوم دے لوکو، یہوواہ دی وڈیائی کرو۔ سارے لوک اوہدی تعریف کرن۔“ 12 نالے یسعیاہ نبی نے وی کہیا: ”یسی* دی اِک جڑ ہوئے گی جیہڑی قوماں تے حکمرانی کرن لئی اُٹھے گی تے قوماں اوہدے تے امید لان گیاں۔“ 13 ایس لئی دُعا اے کہ امید دین والا خدا توانوں خوشی نال بھر دَوے تے توانوں اِطمینان دَوے کیونکہ تُسی اوہدے تے بھروسا کردے او۔ ہاں، اوہ توانوں پاک روح دی طاقت نال بھر دَوے تاکہ تواڈی امید ہور وی پکی ہو جائے۔
14 بھراوو، مینوں تواڈے تے پورا بھروسا اے کہ تُسی چنگے کماں چ لگے رہندے او، علم نال بھرے ہوئے او تے اِک دُوجے نُوں تلیم دین* دے قابل او۔ 15 پر مَیں توانوں کجھ گلاں یاد دَوان لئی صاف صاف لفظاں چ لکھ رہیا واں۔ خدا نے میرے تے عظیم رحمت کیتی اے۔ 16 ایس لئی مَیں مسیح یسوع دے غلام دے طور تے اِک مُقدس کم کر رہیا واں یعنی غیریہودیاں نُوں خدا دی خوشخبری سُنا رہیا واں تاکہ اوہ خدا دے حضور ایہو جہیاں قربانیاں وانگوں ہون جنہاں نُوں اوہ قبول کرے تے پاک روح دے ذریعے مُقدس کرے۔
17 مَیں بڑا خوش آں کہ مَیں مسیح یسوع دا شاگرد آں تے خدا دی خدمت کرنا واں۔ 18 مَیں اپنے کسے کم بارے نئیں سگوں صرف اوہناں کماں بارے دَسنا چاہنا واں جیہڑے مسیح نے میرے ذریعے کیتے۔ اوہنے میرے کماں تے تلیم دے ذریعے غیریہودی لوکاں دی مدد کیتی تاکہ اوہ اوہدے فرمانبردار بنن۔ 19 اوہ لوک ایس لئی فرمانبردار بنے کیونکہ اوہناں نے پاک روح دے ذریعے کیتے گئے معجزے تے نشانیاں ویکھیاں سن۔ ایسے طرحاں مَیں یروشلم توں لے کے اِلرِکم تک مسیح بارے خوشخبری دی چنگی طرحاں مُنادی کیتی۔ 20 اصل چ مَیں ارادہ کیتا سی کہ مَیں اوتھے خوشخبری نئیں سُناواں گا جِتھے لوکاں نے پہلاں ای مسیح دے ناں بارے سُن لیا اے کیونکہ مَیں اوس بنیاد تے عمارت نئیں بنانا چاہنا ساں جیہڑی کسے ہور نے رکھی اے۔* 21 مَیں پاک کلام چ لکھی ایس گل دے مطابق چلنا واں: ”جنہاں لوکاں نے اوہدے بارے نئیں سُنیا، اوہ اوہدے بارے جانن گے تے اوہنوں سمجھن گے۔“
22 ایسے وجہ توں مَیں کئی وار چاہ کے وی تواڈے کول نئیں آ سکیا۔ 23 ہُن ایہناں علاقیاں چ وی کوئی ایہو جہی جگہ نئیں بچی جِتھے مَیں مُنادی نئیں کیتی۔ نالے مَیں کئی* سالاں توں توانوں مِلن لئی ترس رہیا واں۔ 24 ایس لئی امید اے کہ مَیں سپین جاندے ویلے توانوں وی مِلن آواں گا تے کجھ دیر تواڈے نال ٹھہراں گا۔ فیر جدوں مَیں سپین وَل سفر جاری رکھاں گا تے مینوں امید اے کہ تُسی میرے نال تھوڑی دُور تک آؤ گے۔ 25 پر حالے مَیں یروشلم جا رہیا واں تاکہ مُقدس لوکاں دی مدد* کر سکاں۔ 26 مقدونیہ تے اخیہ دے بھین بھراواں نے خوشی نال یروشلم چ اوہناں مُقدس لوکاں لئی اِمداد گھلی اے جیہڑے غریب نیں۔ 27 ایہہ چنگی گل اے کہ اوہناں نے خوشی نال اِنج کیتا اے۔ پر اصل چ اوہ بھین بھرا یروشلم دے مُقدس لوکاں دے قرضدار سن جنہاں نے غیریہودیاں نُوں اوہناں چیزاں چ حصےدار بنایا جیہڑیاں اوہناں نُوں خدا وَلّوں ملیاں سن۔ ایس لئی اوہناں دا وی فرض سی کہ اوہ اپنیاں چیزاں نال یروشلم دے بھین بھراواں دی مدد کرن۔ 28 جدوں مَیں ایہہ اِمداد یروشلم دے بھین بھراواں کول پونچا دَواں گا تے مَیں سپین جان توں پہلاں تواڈے کول آواں گا۔ 29 مینوں پتہ اے کہ جدوں مَیں تواڈے کول آواں گا تے مَیں تواڈے لئی مسیح وَلّوں بوہت ساریاں برکتاں لے کے آواں گا۔
30 بھراوو، ساڈے مالک یسوع مسیح اُتے ایمان رکھن تے پاک روح دے ذریعے مِلن والی محبت دی بِنا تے مَیں درخاست کرنا واں کہ تُسی وی خدا کولوں میرے لئی اِلتجا کرو 31 کہ اوہ مینوں یہودیہ چ غیرایمان لوکاں دے ہتھوں بچا لوے تے یروشلم چ خدا دے لوک ایس اِمداد نُوں خوشی نال قبول کرن۔ 32 فیر جے خدا دی مرضی ہوئی تے مَیں تواڈے کول خوشی خوشی آ سکاں گا تے اِک دُوجے نُوں مِل کے ساڈے ساریاں دا حوصلہ ودھے گا۔ 33 دُعا اے کہ اِطمینان دین والا خدا تواڈے ساریاں دے نال ہوئے۔ آمین۔