رسولاں دے اعمال
18 ایہدے بعد پولُس ایتھنز توں شہر کُرنتھس آ گیا۔ 2 اوتھے اوہنوں اکوِلہ ناں دا اِک یہودی ملیا جیہڑا پُنطُس چ پیدا ہویا سی۔ اوہ کجھ عرصہ پہلاں ای اپنی بیوی پرِسکِلّہ نال اِٹلی توں آیا سی کیونکہ بادشاہ کلودِیُس نے سارے یہودیاں نُوں روم چوں نِکلن دا حکم دِتا سی۔ پولُس اوہناں دونواں نُوں مِلن گیا 3 تے اوہناں دے گھر ٹھہریا کیونکہ اوہدے وانگوں اوہ دونویں وی خیمے بنان دا کم کردے سن۔ ایس لئی اوہ اوہناں نال مِل کے ایہہ کم کرن لگ پیا۔ 4 پولُس ہر سبت دے دن یہودیاں دی عبادتگاہ چ تلیم دیندا ہوندا سی تے یہودیاں تے یونانیاں نُوں قائل* کر لیندا سی۔
5 جدوں سیلاس تے تیمُتھیُس مقدونیہ توں آئے تے پولُس ہور وی ودھچڑھ کے خدا دا کلام سُنان لگ پیا۔ اوہ یہودیاں نُوں گواہی دے کے ثابت کردا ہوندا سی کہ یسوع ای مسیح اے۔ 6 پر یہودی پولُس دی مخالفت کردے رہے تے اوہنوں بُرا بھلا کہندے رہے۔ ایس لئی پولُس نے اپنے کپڑے جھاڑے تے اوہناں نُوں کہیا: ”مَیں تواڈی جان دا ذمےدار نئیں آں۔ تواڈا خون تواڈے سِر لگے۔ ہُن توں مَیں جا کے غیریہودی لوکاں نُوں کلام سُناواں گا۔“ 7 ایس لئی پولُس یہودیاں دی عبادتگاہ چوں نکل کے اِک بندے دے گھر چلا گیا جدا ناں طِطُس یُوستُس سی۔ اوہ خدا دی عبادت کردا سی تے اوہدا گھر عبادتگاہ دے نال ای سی۔ 8 عبادتگاہ دا نگران کرِسپُس تے اوہدے سارے گھر والے مالک تے ایمان لے آئے۔ نالے کُرنتھس دے ہور بوہت سارے لوکاں نے وی خدا دا کلام سُنیا تے ایمان لیا کے بپتسمہ لیا۔ 9 فیر رات نُوں مالک یسوع نے اِک رُویا چ پولُس نُوں کہیا: ”چپ نہ رہوِیں سگوں خدا دا کلام سُناندا رہوِیں۔ تُوں ڈرِیں نہ 10 کیونکہ مَیں تیرے نال آں۔ کوئی وی تیرے تے حملہ کر کے تینوں نقصان نئیں پونچائے گا کیونکہ ایس شہر دے بوہت سارے لوک میرے تے ایمان لیان گے۔“* 11 ایس لئی پولُس ڈیڈھ سال تک کُرنتھس چ رہ کے لوکاں نُوں خدا دے کلام دی تلیم دیندا رہیا۔
12 اوہناں دِناں چ گلیو صوبہ اخیہ* دا حاکم سی۔ اوہدوں یہودیاں نے رَل کے پولُس تے حملہ کیتا تے اوہنوں پھڑ کے عدالت دے تخت سامنے لے گئے 13 تے کہیا: ”ایہہ بندہ لوکاں نُوں اپنے مغر لا کے خدا دی عبادت کرن دا ایہو جیہا طریقہ سکھا رہیا اے جیہڑا قانون دے خلاف اے۔“ 14 پولُس حالے کجھ کہن ای والا سی کہ گلیو نے یہودیاں نُوں کہیا: ”یہودیو، جے ایس بندے نے کوئی غلط کم یاں کوئی وڈا جُرم کیتا ہوندا تے مَیں تواڈی گل دھیان نال ضرور سُن دا۔ 15 پر جے جھگڑا صرف لفظاں، نانواں تے تواڈی شریعت دا اے تے تُسی آپ ایس معاملے نُوں ویکھو۔ مَیں ایس جھگڑے چ نئیں پینا چاہندا۔“ 16 ایہہ کہہ کے اوہنے اوہناں نُوں اوتھوں* کڈھ دِتا۔ 17 ایس لئی اوہناں ساریاں نے یہودیاں دی عبادتگاہ دے نگران سوستھینس نُوں پھڑ لیا تے اوہنوں عدالت دے تخت دے سامنے کُٹن لگ پئے۔ پر گلیو فیر وی ایس معاملے چ نہ پیا۔
18 پولُس کُرنتھس چ کجھ ہور دن رہیا۔ فیر اوہنے بھراواں نُوں خدا حافظ کہیا تے سمندری جہاز چ بیٹھ کے سُوریہ دے صوبے وَل نکل پیا۔ پرِسکِلّہ تے اکوِلہ وی اوہدے نال گئے۔ پر پولُس نے جان توں پہلاں کنخریہ* چ اپنے وال چھوٹے کروائے کیونکہ اوہنے اِک منت منی ہوئی سی۔ 19 جدوں اوہ اِفسس پونچے تے پولُس نے باقیاں نُوں شہر چ چھڈیا تے آپ یہودیاں دی عبادتگاہ چ گیا تاکہ لوکاں نُوں دلیلاں دے کے پاک کلام دِیاں گلاں سمجھائے۔ 20 اوہناں نے وار وار پولُس نُوں اِفسس چ کجھ عرصہ ہور رُکن لئی کہیا، پر اوہ نہ منیا 21 سگوں اوہنے اوہناں نُوں کہیا: ”جے یہوواہ دی مرضی ہوئی تے مَیں فیر توانوں مِلن آواں گا۔“ ایہدے بعد اوہنے بھراواں نُوں خدا حافظ کہیا تے سمندری جہاز چ بیٹھ کے اِفسس توں چلا گیا 22 تے قیصریہ آ گیا۔ فیر اوہ یروشلم چ کلیسیا دے بھین بھراواں نُوں مِلن گیا تے فیر اوتھوں انطاکیہ چلا گیا۔*
23 کجھ عرصہ اوتھے رہن دے بعد اوہ گلتیہ تے فروگیہ دے فرق فرق علاقیاں چ گیا تاکہ اوتھے رہن والے شاگرداں دا حوصلہ ودھائے۔
24 ایس دوران اپلّوس ناں دا اِک یہودی اِفسس چ آیا جیہڑا شہر اِسکندریہ چ پیدا ہویا سی۔ اوہدے کول پاک کلام دا بڑا علم سی تے اوہدا گل کرن دا طریقہ بوہت ودھیا سی۔* 25 اپلّوس نُوں یہوواہ دی راہ بارے سکھایا گیا سی۔ اوہ پاک روح نال بھریا ہویا سی تے بڑے جوش نال گل کردا سی۔ اوہ یسوع بارے صحی تلیم دے رہیا سی، پر اوہنوں صرف اوس بپتسمے بارے پتہ سی جیہڑا یوحنا دیندا ہوندا سی۔ 26 اپلّوس یہودیاں دی عبادتگاہ چ جا کے بڑی دلیری نال تلیم دین لگ پیا۔ جدوں پرِسکِلّہ تے اکوِلہ نے اوہدیاں گلاں سُنیاں تے اوہ اوہنوں اپنے نال لے گئے تے خدا دی راہ بارے ہور چنگی طرحاں سمجھایا۔ 27 اپلّوس سمندر پار اخیہ دے صوبے چ جانا چاہندا سی۔ ایس لئی اِفسس دے بھراواں نے اخیہ دے بھراواں نُوں اِک خط چ لکھیا کہ اوہ اپلّوس نُوں خوشی نال مِلن تے اوہدا خیال رکھن۔ جدوں اپلّوس اوتھے پونچیا تے اوہنے اوہناں لوکاں دی بڑی مدد کیتی جیہڑے خدا دی عظیم رحمت دی وجہ توں ایمان لیائے سن 28 کیونکہ اوہنے بڑے جوش تے دلیری نال یہودیاں نُوں ساریاں دے سامنے غلط ثابت کیتا تے پاک کلام چوں وکھایا کہ یسوع ای مسیح اے۔