کُلسّیوں دے ناں خط
2 مَیں توانوں دَسنا چاہنا واں کہ مَیں تواڈی خاطر، لودیکیہ چ رہن والے بھراواں دی خاطر تے اوہناں ساریاں دی خاطر کِنّی محنت کر رہیا واں جیہڑے مینوں کدی نئیں ملے۔ 2 مَیں ایہہ محنت ایس لئی کر رہیا واں تاکہ اوہناں دے دِلاں نُوں تسلی ملے تے اوہ پیار دے بندھن چ بجھے رہن۔ نالے اوہناں نُوں اوہ ساریاں برکتاں* مِلن جیہڑیاں سچائی نُوں پوری طرحاں سمجھن نال مِلدیاں نیں۔ اِنج اوہناں نُوں خدا دے مُقدس راز یعنی مسیح بارے صحی علم حاصل ہوئے گا۔ 3 خدا نے اوہدے چ علم تے حکمت دے سارے خزانے لُکا کے رکھے ہوئے نیں۔ 4 مَیں ایہہ ایس لئی کہہ رہیا واں تاکہ کوئی وی توانوں دل موہ لین والیاں گلاں نال دھوکھا نہ دے سکے۔ 5 بھانویں کہ مَیں تواڈے نال نئیں آں، پر مَیں تواڈے بارے سوچدا رہنا واں۔ مَیں ایس گلوں بڑا خوش آں کہ تُسی سلیقے نال چل رہے او تے مسیح تے پکا ایمان رکھدے او۔
6 تُسی مالک مسیح یسوع نُوں قبول کر لیا اے۔ ایس لئی ہُن تُسی اوہدے پچھے پچھے چلدے رہوو 7 تے جیویں توانوں سکھایا گیا سی، اوہدے چ تواڈیاں جڑاں ڈُونگیاں تے مضبوط ہوندیاں جان تے تواڈا ایمان مضبوط ہوندا جائے تے تُسی ہمیشاں خدا دی شکرگزاری کر دے رہوو۔
8 خبردار رہوو کہ کوئی توانوں ایہو جہی کھوکھلی حکمت تے فضول گلاں نال پھسا* نہ لوے جیہڑیاں انسانی رویتاں تے دُنیا دی سوچ دے مطابق نیں نہ کہ مسیح دی تلیم دے مطابق 9 کیونکہ مسیح چ خدا دِیاں ساریاں صفتاں بھریاں ہوئیاں نیں۔ 10 ایس لئی توانوں سب کجھ مسیح دے ذریعے مِل گیا اے جیہڑا سارے اِختیار تے ساریاں حکومتاں دا سردار اے۔ 11 اوہدے شاگرد ہون دی وجہ توں تواڈا ختنہ ہو گیا اے۔ پر ایہہ اوہ ختنہ نئیں اے جیہڑا انساناں دے ہتھیں ہوندا اے سگوں ایہہ اوہ ختنہ اے جیہڑا گُناہگار جسم دے کماں نُوں چھڈن* نال ہوندا اے جیویں کہ مسیح دے خادماں دا ہونا وی چاہی دا اے۔ 12 تُسی مسیح ورگا بپتسمہ لے کے اوہدے نال دفن ہو گئے تے اوہدے شاگرد ہون دی وجہ توں اوہدے نال جی اُٹھے کیونکہ تُسی خدا دی طاقت تے ایمان لیائے جنہے اوہنوں مُردیاں چوں زندہ کیتا۔
13 ایس توں علاوہ بھانویں کہ تُسی اپنے گُناہواں دی وجہ توں مُردہ سو تے تواڈا ختنہ نئیں ہویا سی، پر فیر وی خدا نے توانوں زندہ کر کے مسیح نال ملا دِتا۔ خدا نے رحم کر کے ساڈے سارے گُناہ معاف کر دِتے۔ 14 ہتھاں نال لکھی شریعت توں ظاہر ہویا کہ اَسی گُناہگار آں۔ پر خدا نے اوہدے سارے قانوناں سمیت اوہنوں مٹا دِتا تے سُولی* تے کِلّاں نال ٹھوک کے ختم کر دِتا۔ 15 اوہنے سُولی* دے ذریعے حکمراناں تے اِختیار والیاں نُوں ہرا دِتا۔ ہُن اوہ اپنی فتح دے جلوس چ اوہناں دی نمائش قیدیاں دے طور تے کر رہیا اے۔
16 ایس لئی کسے نُوں ایہہ حق نہ دَوو کہ اوہ توانوں کھان پین دے معاملے چ ٹوکے یاں توانوں دَسے کہ توانوں نویں چن دا دن یاں عیداں یاں سبت دا دن منانا چاہی دا اے۔ 17 ایہہ سب کجھ تے آن والیاں چیزاں دا پرچھانواں اے۔ پر اصلی چیزاں دا تعلق مسیح نال اے۔ 18 ایہو جہے لوکاں توں خبردار رہوو جیہڑے خاکساری دا دِکھاوا کردے نیں تے فرشتیاں دی پوجا کردے نیں کیونکہ اوہ تواڈا انعام کھو سکدے نیں۔ اوہ ایس گل تے شیخی ماردے نیں کہ اوہ رُویاواں* ویکھدے نیں۔ اوہ بِلاوجہ غرور چ آ جاندے نیں کیونکہ اوہناں دی سوچ جسمانی ہوندی اے 19 تے اوہ سِر یعنی مسیح نال نئیں جُڑے ہوندے۔ سِر دے ذریعے سارے جسم نُوں خوراک مِلدی اے تے ایہدے ای ذریعے جسم دا ہر حصہ جوڑاں تے پٹھیاں دی مدد نال جُڑیا رہندا اے۔ سِر دے ای ذریعے خدا دی مرضی دے مطابق جسم یعنی کلیسیا ودھدی پُھلدی اے۔
20 جے تُسی دُنیا دی سوچ نُوں ٹھکرا کے مسیح دے نال مر گئے سو تے فیر ہُن تُسی دُنیا دے لوکاں وانگوں زندگی کیوں گزار رہے او تے ایہو جہے قانوناں تے کیوں چل رہے او جیویں کہ 21 ”ایہنوں نہ پھڑو، ایہنوں نہ چکھو، ایہنوں ہتھ نہ لاؤ“؟ 22 ایہہ قانون انساناں دے حکماں تے تلیم دے مطابق نیں تے اوہناں چیزاں بارے نیں جیہڑیاں استمال دے بعد ختم ہو جاندیاں نیں۔ 23 ایہناں قانوناں تے عمل کرن والیاں نُوں شاید لگے کہ اوہ سمجھدار نیں تے خاکساری نال خدا دی عبادت کر رہے نیں۔ پر اصل چ اوہ خدا دی عبادت اپنی مرضی مطابق کرنا چاہندے نیں۔ اوہ اپنے جسم تے ظلم کر دے نیں پر ایہدے توں اوہناں نُوں اپنیاں غلط خواہشاں تے قابو پان چ کوئی مدد نئیں مِلدی۔