یوحنا دی اِنجیل

20 ہفتے دے پہلے دن*‏ سویرے سویرے جدوں حالے نھیرا ای سی مریم مگدلینی قبر تے آئی۔ اوہنے ویکھیا کہ قبر دے مُونہہ تے رکھیا ہویا پتھر پہلاں ای ہٹیا ہویا اے۔ 2 اوہ بھجی بھجی شمعون پطرس تے اوس شاگرد کول آئی جنہوں یسوع پیار کردا سی تے اوہناں نُوں کہیا:‏ ”‏اوہ مالک نُوں قبر چوں کڈھ کے لے گئے نیں تے سانوں نئیں پتہ کہ اوہناں نے اوہنوں کتھے رکھیا اے۔“‏

3 فیر پطرس تے اوہ شاگرد قبر وَل گئے۔ 4 اوہ دونویں بھجن لگ پئے۔ پر دُوجا شاگرد پطرس توں اَگے نکل گیا تے اوہدے توں پہلاں قبر تے پونچ گیا۔ 5 جدوں اوہنے جُھک کے قبر دے اندر جھاتی ماری تے اوہنے ویکھیا کہ اندر لیلن دِیاں پٹیاں پئیاں ہوئیاں نیں۔ پر اوہ اندر نئیں گیا۔ 6 اوہدے پچھے پچھے شمعون پطرس وی اوتھے پونچ گیا تے قبر دے اندر چلا گیا۔ تے اوہنے وی ویکھیا کہ اوتھے لیلن دِیاں پٹیاں پئیاں ہوئیاں نیں۔ 7 جیہڑا کپڑا اوہدے سِر دَوالے بنھیا گیا سی اوہ دُوجیاں پٹیاں توں وَکھرا تے لویٹیا ہویا اِک پاسے پیا سی۔ 8 فیر اوہ شاگرد وی جیہڑا قبر تے پہلاں پونچیا سی اندر گیا تے اوہنے سب کجھ ویکھیا تے اوہنوں یقین آگیا۔ 9 پر اوہ دونویں پاک کلام چ لکھی ایس گل نُوں حالے وی نئیں سمجھے سن کہ اوہنے مُردیاں چوں زندہ ہونا سی۔ 10 ایس لئی اوہ شاگرد واپس اپنے اپنے گھر چلے گئے۔‏

11 پر مریم قبر دے کول کھلو کے روندی رہی تے روندے ہوئیاں اوہنے جُھک کے قبر دے اندر جھاتی ماری۔ 12 اوتھے اوہنے دو فرشتے ویکھے جنہاں نے چِٹے کپڑے پائے ہوئے سن۔ اوہ اوس جگہ بیٹھے ہوئے سن جِتھے یسوع دی لاش رکھی ہوئی سی۔ اِک سِر والے پاسے تے دُوجا پیراں والے پاسے۔ 13 اوہناں نے مریم نُوں کہیا:‏ ”‏بی‌بی، تُوں کیوں رو رہی ایں؟“‏ مریم نے کہیا:‏ ”‏اوہ میرے مالک نُوں لے گئے نیں تے پتہ نئیں اوہنوں کتھے رکھیا نیں۔“‏ 14 ایہہ کہن دے بعد جدوں اوہ مُڑی تے اوہنے یسوع نُوں پچھے کھلوتے ویکھیا۔ پر اوہ اوہنوں پچھان نہ سکی۔ 15 یسوع نے اوہنوں کہیا:‏ ”‏بی‌بی، تُوں کیوں رو رہی ایں؟ تُوں کِنہوں لبھ رہی ایں؟“‏ مریم نے اوہنوں مالی سمجھ کے کہیا:‏ ”‏بھراوا، جے تُوں اوہنوں کِتے لے گیا ایں تے مینوں دَس کہ اوہنوں کتھے رکھیا ای تاکہ مَیں اوہنوں لے جاواں۔“‏ 16 یسوع نے اوہنوں کہیا:‏ ”‏مریم!‏“‏ ایہہ سُن کے اوہ پچھے مُڑی تے عبرانی چ کہیا:‏ ”‏ربونی!‏“‏ (‏جدا مطلب اے ”‏اُستاد۔“‏)‏ 17 یسوع نے اوہنوں کہیا:‏ ”‏مینوں پھڑی نہ رکھ کیونکہ حالے مَیں باپ کول اُتے نئیں گیا۔ پر جا کے میرے بھراواں نُوں دَس کہ مَیں اپنے باپ تے تواڈے باپ تے اپنے خدا تے تواڈے خدا کول اُتے جا رہیا واں۔“‏ 18 مریم مگدلینی نے آ کے شاگرداں نُوں خبر دِتی:‏ ”‏مَیں مالک نُوں ویکھیا اے۔“‏ اوہنے اوہناں نُوں اوہ سب کجھ دَسیا جو یسوع نے کہیا سی۔‏

19 اوسے دن شام نُوں جیہڑا ہفتے دا پہلا دن سی شاگرد اِک گھر چ جمع سن تے اوہناں نے یہودیاں دے ڈر توں دروازیاں تے تالے مارے ہوئے سن۔ فیر اچانک یسوع اوہناں دے وچکار آ کے کھلو گیا تے اوہناں نُوں کہیا:‏ ”‏سلامت رہوو۔“‏ 20 ایہہ کہن دے بعد یسوع نے شاگرداں نُوں اپنے ہتھ تے اپنی وَکھی وکھائی۔ شاگرد مالک نُوں ویکھ کے بڑے خوش ہوئے۔ 21 یسوع نے اوہناں نُوں فیر کہیا:‏ ”‏سلامت رہوو۔ جیویں باپ نے مینوں گھلیا اے، مَیں وی توانوں گھل رہیا واں۔“‏ 22 ایہہ کہہ کے یسوع نے اوہناں اُتے پُھوک ماری تے کہیا:‏ ”‏پاک روح پاؤ۔ 23 جے تُسی کسے دے گُناہ معاف کرو گے تے اوہ معاف ہون گے۔ پر جے تُسی کسے دے گُناہ معاف نئیں کرو گے تے اوہ معاف نئیں ہون گے۔“‏

24 پر جدوں یسوع اوتھے آیا تے توما شاگرداں دے نال نئیں سی۔ اوہ 12 شاگرداں وچوں اِک سی تے اوہنوں جُڑواں کہیا جاندا سی۔ 25 ایس لئی باقی شاگرداں نے اوہنوں دَسیا:‏ ”‏اَسی مالک نُوں ویکھیا اے۔“‏ پر اوہنے کہیا:‏ ”‏جدوں تک مَیں اوہدے ہتھاں چ کِلّاں دے زخم*‏ نہ ویکھ لواں تے اوہناں چ اپنی اُنگلی نہ پا لواں تے اوہدی وَکھی دے زخم چ اپنا ہتھ نہ پا لواں، اوہدوں تک مَیں تواڈی گل دا یقین نئیں کراں گا۔“‏

26 ایہدے اَٹھ دن بعد شاگرد فیر اِک گھر چ جمع سن تے توما وی اوہناں دے نال سی۔ بھانویں کہ دروازیاں تے تالے لگے ہوئے سن پر فیر وی یسوع اندر آ گیا تے اوہناں دے وچکار کھلو کے اوہناں نُوں کہیا:‏ ”‏سلامت رہوو۔“‏ 27 فیر یسوع نے توما نُوں کہیا:‏ ”‏ایہہ ویکھ میرے ہتھ، ایہناں چ اپنی اُنگلی پا تے میری وَکھی چ اپنا ہتھ پا۔ شک کرنا چھڈ سگوں یقین کر۔“‏ 28 توما نے جواب دِتا:‏ ”‏میرے مالک تے میرے خدا!‏“‏ 29 یسوع نے اوہنوں کہیا:‏ ”‏کیہہ مینوں ویکھ کے ہُن تینوں یقین آ گیا اے؟ خوش نیں اوہ جیہڑے بغیر ویکھے یقین کردے نیں۔“‏

30 بے‌شک یسوع نے اپنے شاگرداں دے سامنے ہور وی بوہت سارے معجزے کیتے جیہڑے ایس کتاب چ نئیں لکھے گئے۔ 31 پر جیہڑے معجزے لکھے گئے، اوہ ایس لئی لکھے گئے تاکہ تُسی ایمان لیاؤ کہ یسوع خدا دا پُتر تے مسیح اے تے ایس ایمان دی وجہ توں توانوں اوہدے ناں تے زندگی ملے۔‏